ಬೆಸ್ಕಾಂ ಗ್ರಾಹಕರ ಗಮನಕ್ಕೆ ; 21 ದಿನ ಈ 20 ಪಟ್ಟಣಗಳಲ್ಲಿ ಆನ್‌ ಲೈನ್ ಸೇವೆ ಬಂದ್, ಬಿಲ್ ಪಾವತಿ ಸೇರಿ ಹಲವು ಸೌಲಭ್ಯ ಸ್ಥಗಿತ

ಬೆಂಗಳೂರು: ಬೆಸ್ಕಾಂ ವ್ಯಾಪ್ತಿಯ ಹಲವು ಪಟ್ಟಣಗಳ ಗ್ರಾಹಕರಿಗೆ ಮಹತ್ವದ ಮಾಹಿತಿ ಹೊರಬಿದ್ದಿದೆ. ಹೊಸ ತಂತ್ರಾಂಶ ಅಳವಡಿಕೆ ಪ್ರಕ್ರಿಯೆ ಹಿನ್ನೆಲೆಯಲ್ಲಿ ಸುಮಾರು 21 ದಿನಗಳ ಕಾಲ ಆನ್‌ಲೈನ್ ಸೇವೆಗಳು ಲಭ್ಯವಿರುವುದಿಲ್ಲ ಎಂದು ಬೆಸ್ಕಾಂ ಪ್ರಕಟಿಸಿದೆ. ಈ ಅವಧಿಯಲ್ಲಿ ವಿದ್ಯುತ್ ಬಿಲ್ ಪಾವತಿ ಸೇರಿದಂತೆ ಹಲವು ಸೇವೆಗಳು ತಾತ್ಕಾಲಿಕವಾಗಿ ಸ್ಥಗಿತಗೊಳ್ಳಲಿವೆ.

ಹೊಸ ಸಾಫ್ಟ್‌ವೇರ್ ಅಳವಡಿಕೆಗೆ ಬೆಸ್ಕಾಂ ನಿರ್ಧಾರ

ಸಮಗ್ರ ವಿದ್ಯುತ್ ಅಭಿವೃದ್ಧಿ ಯೋಜನೆ (IPDS) ಹಂತ-2ರಡಿ, ನಗರ ಪ್ರದೇಶಗಳಲ್ಲಿ ಬಳಸಲಾಗುತ್ತಿರುವ ಐಪಿಡಿಎಸ್ ಐಟಿ ಅಪ್ಲಿಕೇಶನ್ ಅನ್ನು ಬೆಸ್ಕಾಂ ವ್ಯಾಪ್ತಿಯ 20 ಐಪಿಡಿಎಸ್ ಪಟ್ಟಣಗಳಿಗೂ ವಿಸ್ತರಿಸಲು ನಿರ್ಧರಿಸಲಾಗಿದೆ.ಈ ತಂತ್ರಾಂಶ ವರ್ಗಾವಣೆಗೆ ಅಗತ್ಯವಾದ ದತ್ತಾಂಶ ವರ್ಗಾವಣೆ ಕಾರ್ಯ ನಡೆಯಲಿರುವುದರಿಂದ, ಜೂನ್ 10ರಿಂದ ಜೂನ್ 30ರವರೆಗೆ ಆನ್‌ಲೈನ್ ಸೇವೆಗಳಲ್ಲಿ ವ್ಯತ್ಯಯ ಉಂಟಾಗಲಿದೆ ಎಂದು ಬೆಸ್ಕಾಂ ಸ್ಪಷ್ಟಪಡಿಸಿದೆ.

ಯಾವ ಸೇವೆಗಳು ಲಭ್ಯವಿರುವುದಿಲ್ಲ?

ಪ್ರಸ್ತುತ ಬಳಸಲಾಗುತ್ತಿರುವ ಟಿಆರ್‌ಎಮ್ (TRM) ಸಾಫ್ಟ್‌ವೇರ್ ಬದಲಿಗೆ ಹೊಸ ಐಪಿಡಿಎಸ್ ಐಟಿ ವ್ಯವಸ್ಥೆ ಜಾರಿಗೆ ಬರುತ್ತಿರುವ ಹಿನ್ನೆಲೆಯಲ್ಲಿ ಕೆಳಕಂಡ ಸೇವೆಗಳು ತಾತ್ಕಾಲಿಕವಾಗಿ ಸ್ಥಗಿತಗೊಳ್ಳಲಿವೆ.

ಹೊಸ ವಿದ್ಯುತ್ ಸಂಪರ್ಕಕ್ಕಾಗಿ ಅರ್ಜಿ ಸಲ್ಲಿಕೆ

ಹೆಸರು ಬದಲಾವಣೆ ಅಥವಾ ವರ್ಗಾವಣೆ

ಲೋಡ್ ಹೆಚ್ಚಳಕ್ಕೆ ಸಂಬಂಧಿಸಿದ ಸೇವೆಗಳು

ಬೆಸ್ಕಾಂನ ಅಧಿಕೃತ ಆನ್‌ ಲೈನ್ ಬಿಲ್ ಪಾವತಿ ವ್ಯವಸ್ಥೆ

ಇತರೆ ಆನ್‌ ಲೈನ್ ಗ್ರಾಹಕ ಸೇವೆಗಳು

ಗೂಗಲ್ ಪೇ, ಫೋನ್ ಪೇ ಮೂಲಕ ಬಿಲ್ ಪಾವತಿಗೆ ಅವಕಾಶ

ಆದರೆ ಗ್ರಾಹಕರು ಆತಂಕ ಪಡುವ ಅಗತ್ಯವಿಲ್ಲ. Google Pay, PhonePe ಸೇರಿದಂತೆ ತೃತೀಯ ಪಕ್ಷದ ಪಾವತಿ ವೇದಿಕೆಗಳ ಮೂಲಕ ವಿದ್ಯುತ್ ಬಿಲ್ ಪಾವತಿಯನ್ನು ಮುಂದುವರಿಸಬಹುದು ಎಂದು ಬೆಸ್ಕಾಂ ತಿಳಿಸಿದೆ.

ಯಾವ ಪಟ್ಟಣಗಳಲ್ಲಿ ಸೇವೆ ಸ್ಥಗಿತವಾಗಲಿದೆ?

ಕೆಳಕಂಡ 20 ಪಟ್ಟಣಗಳ ಗ್ರಾಹಕರು ಈ ಬದಲಾವಣೆಯ ಪರಿಣಾಮ ಎದುರಿಸಲಿದ್ದಾರೆ:

ಬಾಗೇಪಲ್ಲಿ
ದೇವನಹಳ್ಳಿ
ಗುಡಿಬಂಡೆ
ಮಾಗಡಿ
ಮಾಲೂರು
ನೆಲಮಂಗಲ
ಶ್ರೀನಿವಾಸಪುರ
ವಿಜಯಪುರ
ಚನ್ನಗಿರಿ
ಚಿಕ್ಕನಾಯಕನಹಳ್ಳಿ
ಗುಬ್ಬಿ
ಹೊಳಲ್ಕೆರೆ
ಹೊನ್ನಾಳಿ
ಹೊಸದುರ್ಗ
ಜಗಳೂರು
ಕೊರಟಗೆರೆ
ಮಧುಗಿರಿ
ಮೊಳಕಾಲ್ಮೂರು
ಪಾವಗಡ
ತುರುವೇಕೆರೆ
ಬೆಸ್ಕಾಂ ಮನವಿ
ಹೊಸ ತಂತ್ರಾಂಶ ಅಳವಡಿಕೆಯಿಂದ ಸೇವೆಗಳಲ್ಲಿ ತಾತ್ಕಾಲಿಕ ಅಡಚಣೆ ಉಂಟಾಗುತ್ತಿರುವ ಹಿನ್ನೆಲೆಯಲ್ಲಿ, ಸಂಬಂಧಿತ ಪಟ್ಟಣಗಳ ಗ್ರಾಹಕರು ಸಹಕರಿಸಬೇಕು ಎಂದು ಬೆಸ್ಕಾಂ ಮನವಿ ಮಾಡಿದೆ.