ಬೆಂಗಳೂರು: ರಾಜ್ಯ ಸರ್ಕಾರದ ಎಲ್ಲಾ ಅಧಿಕಾರಿಗಳು ಮತ್ತು ಸಿಬ್ಬಂದಿಯವರು ಇನ್ನು ಮುಂದೆ ಪ್ರತಿದಿನ ಬೆಳಿಗ್ಗೆ 10.00 ಗಂಟೆಗೆ ‘ಕರ್ತವ್ಯ (KAMS) ಆಪ್’ ಮೂಲಕ ತಮ್ಮ ಹಾಜರಾತಿಯನ್ನು ಕಡ್ಡಾಯವಾಗಿ ದಾಖಲಿಸಬೇಕೆಂದು ಆರ್ಥಿಕ ಇಲಾಖೆಯ ಮಾನವ ಸಂಪನ್ಮೂಲ ನಿರ್ವಹಣಾ ವ್ಯವಸ್ಥೆ-2.0 (HRMS) ನಿರ್ದೇಶನಾಲಯವು ಆದೇಶಿಸಿದೆ. ಸರ್ಕಾರದ ನಿರ್ದೇಶನದ ಹಿನ್ನೆಲೆಯಲ್ಲಿ ಈ ಹೊಸ ನಿಯಮವನ್ನು ಜಾರಿಗೆ ತರಲಾಗುತ್ತಿದ್ದು, ಕಚೇರಿಗಳ ನಿಖರವಾದ ಭೌಗೋಳಿಕ ನಿರ್ದೇಶಾಂಕಗಳನ್ನು (Geo Coordinates) ದೃಢೀಕರಿಸಲು ಕಡ್ಡಾಯ ಮಾರ್ಗಸೂಚಿಗಳನ್ನು ಹೊರಡಿಸಲಾಗಿದೆ.
ಜಿಯೋ ಕೋಆರ್ಡಿನೇಟ್ಸ್ ಸಂಗ್ರಹಣೆ ಏಕೆ ಮುಖ್ಯ?
ಸ್ಥಳ ಆಧಾರಿತ ಸೇವೆಗಳನ್ನು ಉತ್ತಮಗೊಳಿಸಲು ಮತ್ತು ‘ಕರ್ನಾಟಕ ಹಾಜರಾತಿ ನಿರ್ವಹಣಾ ವ್ಯವಸ್ಥೆ’ (KAMS) ಅನ್ನು ಪರಿಣಾಮಕಾರಿಯಾಗಿ ಅನುಷ್ಠಾನಗೊಳಿಸಲು ಸರ್ಕಾರಿ ಕಚೇರಿಗಳ ನಿಖರವಾದ ವಿಳಾಸ ಹಾಗೂ ಜಿಯೋ ಕೋಆರ್ಡಿನೇಟ್ಸ್ ಮಾಹಿತಿ ಅತ್ಯಗತ್ಯವಾಗಿದೆ. ಜಿಐಎಸ್ (GIS) ಆಧಾರಿತ ಸ್ಥಳ ಪರಿಶೀಲನೆಯ ಮೂಲಕ ಉತ್ತಮ ಸರ್ಕಾರಿ ಸೇವೆಗಳನ್ನು ತಲುಪಿಸಲು ಇದು ಸಹಕಾರಿಯಾಗಲಿದೆ.
ಅಧಿಕಾರಿಗಳ ಜವಾಬ್ದಾರಿಗಳು:
ಅಪ್ರೂವರ್ (Approver) ಪಾತ್ರ: ಪ್ರತಿ ಇಲಾಖೆಯ ಅಪ್ರೂವರ್ಗಳು HRMS 2.0 ವೆಬ್ ಪೋರ್ಟಲ್ಗೆ ಲಾಗಿನ್ ಆಗಿ ಕಚೇರಿಯ ವಿಳಾಸವನ್ನು ನವೀಕರಿಸಬೇಕು. ಜಿಯೋ ಕೋಆರ್ಡಿನೇಟ್ಸ್ ಸೆರೆಹಿಡಿಯಲು ತಮ್ಮ ಕಚೇರಿಯಿಂದ ಒಬ್ಬರು ಗ್ರೂಪ್ ‘ಬಿ’ ಅಥವಾ ಅದಕ್ಕಿಂತ ಮೇಲ್ಪಟ್ಟ ದರ್ಜೆಯ ಅಧಿಕಾರಿಯನ್ನು ನಾಮನಿರ್ದೇಶನ ಮಾಡಬೇಕು. (ಡಿಡಿಓ ಅವರು ಸ್ವತಃ ತಾವೇ ನಾಮನಿರ್ದೇಶನಗೊಳ್ಳಬಹುದು) .
ನಾಮನಿರ್ದೇಶಿತ ಅಧಿಕಾರಿಯ ಕಾರ್ಯ: ನಾಮನಿರ್ದೇಶನಗೊಂಡ ಅಧಿಕಾರಿಯು ಕಡ್ಡಾಯವಾಗಿ ಕಚೇರಿಯ ಸ್ಥಳದಲ್ಲಿ ಭೌತಿಕವಾಗಿ ಹಾಜರಿದ್ದು, ‘HRMS2-ESS’ ಮೊಬೈಲ್ ಅಪ್ಲಿಕೇಶನ್ ಮೂಲಕವೇ ಕಚೇರಿಯ ಜಿಯೋ ಕೋಆರ್ಡಿನೇಟ್ಸ್ ಅನ್ನು ಸೆರೆಹಿಡಿದು ಸಬ್ಮಿಟ್ ಮಾಡಬೇಕಾಗುತ್ತದೆ. ವೆಬ್ ಅಪ್ಲಿಕೇಶನ್ ಮೂಲಕ ಇದನ್ನು ಮಾಡಲು ಅವಕಾಶವಿರುವುದಿಲ್ಲ.
ಪ್ರಮುಖ ನಿಯಮಗಳು ಮತ್ತು ತಾಂತ್ರಿಕ ಮಾಹಿತಿ:
ಜಿಯೋ ಕೋಆರ್ಡಿನೇಟ್ಸ್ ಯಶಸ್ವಿಯಾಗಿ ದಾಖಲಾದ ನಂತರವಷ್ಟೇ ಆಪ್ನಲ್ಲಿ ‘ಗ್ರೀನ್ ಟಿಕ್’ (ಹಸಿರು ಗುರುತು) ಕಾಣಿಸಿಕೊಳ್ಳುತ್ತದೆ.
ಜಿಯೋ ಕೋಆರ್ಡಿನೇಟ್ಸ್ ಸಂಗ್ರಹಿಸುವವರೆಗೆ ಮಾತ್ರವೇ ನಾಮನಿರ್ದೇಶಿತ ಅಧಿಕಾರಿಯನ್ನು ಬದಲಾಯಿಸಲು ಅಪ್ರೂವರ್ಗೆ ಅವಕಾಶವಿರುತ್ತದೆ.
ಪ್ರಸ್ತುತ ಈ ಜಿಯೋ ಕೋಆರ್ಡಿನೇಟ್ಸ್ ಸೆರೆಹಿಡಿಯುವ ಪ್ರಕ್ರಿಯೆಯು ಎಲ್ಲಾ ಆಂಡ್ರಾಯ್ಡ್ ಮೊಬೈಲ್ ಸಾಧನಗಳಲ್ಲಿ ಲಭ್ಯವಿದೆ.
ನೆರವಿಗಾಗಿ ಸಹಾಯವಾಣಿ:
ಹಾಜರಾತಿ ದಾಖಲಿಸುವಾಗ ಯಾವುದೇ ತಾಂತ್ರಿಕ ಸಮಸ್ಯೆಗಳು ಎದುರಾದಲ್ಲಿ ಸಿಇಜಿ (CEG) ಸಹಾಯವಾಣಿ ಸಂಖ್ಯೆ: 8277078123 ಅಥವಾ ಇಮೇಲ್: KAMS.helpdesk@karnataka.gov.in ಅನ್ನು ಸಂಪರ್ಕಿಸಲು ಕೋರಲಾಗಿದೆ. ಕಚೇರಿ ಅಥವಾ ನೌಕರರ ಮ್ಯಾಪಿಂಗ್ಗೆ ಸಂಬಂಧಿಸಿದ ಸಮಸ್ಯೆಗಳಿದ್ದಲ್ಲಿ ಆಯಾ ಇಲಾಖೆಯ ಹೆಚ್.ಆರ್.ಎಂ.ಎಸ್ ನೋಡಲ್ ಅಧಿಕಾರಿಯನ್ನು ಸಂಪರ್ಕಿಸಲು ಸೂಚಿಸಲಾಗಿದೆ.
HRMS 2_KAAMS_GeoCordinates_Circular
