ಬೆಂಗಳೂರು: ಅಪ್ಪು ಎಂಬ ಬೆಲೆ ಕಟ್ಟಲಾಗದ ಬೆಟ್ಟದ ಹೂ ಎಲ್ಲರನ್ನು ಅಗಲಿ ನಾಲ್ಕು ವರ್ಷವಾಯ್ತು. ಅಭಿಮಾನಿಗಳು ಈಗಲೂ ಅವರನ್ನ ಜೀವಂತವಾಗಿದ್ದಾರೆಂಬಂತೆಯೇ ಆರಾಧಿಸುತ್ತಿದ್ದಾರೆ. ನಗುವಿನ ಒಡೆಯನ ನಗುವನ್ನ ನೋಡಿ ಅಭಿಮಾನಿಗಳು ಸಂಭ್ರಮಿಸುತ್ತಿದ್ದಾರೆ. ದೈಹಿಕವಾಗಿ ದೂರಾದ ಅಪ್ಪುವನ್ನ ಪ್ರತಿದಿನ ಪೂಜಿಸುತ್ತಾ, ನಮ್ಮ ಜೊತೆಗೆ ಇದ್ದಾರೆಂದು ಬದುಕುತ್ತಿರುವ ಸಾವಿರಾರು ಜೀವಗಳು ಇಂದು ಅಪ್ಪು ಸ್ಮಾರಕದ ಬಳಿ ಬಂದು, ಹೂ ನೀಡಿ ದರ್ಶನ ಪಡೆದು ಹೋಗುತ್ತಿದ್ದಾರೆ.
ಕುಟುಂಬಸ್ಥರು ಕೂಡ ಅಪ್ಪು ಸ್ಮಾರಕದ ಬಳಿ ಬಂದು, ಪೂಜೆ ಸಲ್ಲಿಸಿ, ಅವರಿಗೆ ಇಷ್ಟವಾದಂತ ಆಹಾರಗಳನ್ನೆಲ್ಲಾ ಎಡೆ ಇಟ್ಟು, ಪೂಜೆ ಮಾಡಿದ್ದಾರೆ. ಅಶ್ವಿನಿ ಪುನೀತ್ ರಾಜ್ಕುಮಾರ್, ರಾಘವೇಂದ್ರ ರಾಜ್ಕುಮಾರ್, ಶಿವಣ್ಣ, ಯುವ ರಾಜ್ಕುಮಾರ್, ವಿನಯ್ ರಾಜ್ಕುಮಾರ್ ಸೇರಿದಂತೆ ಕುಟುಂಬಸ್ಥರೆಲ್ಲಾ ಬಂದು ಪೂಜೆ ಸಲ್ಲಿಸಿದ್ದಾರೆ.
ಈ ವೇಳೆ ಮಾತನಾಡಿದ ಶಿವಣ್ಣ, ಅಪ್ಪು ತಂದೆಗೆ ತಕ್ಕ ಮಗ 100%. ಅವನು ಇಲ್ಲ ಅಂತ ಅನ್ಕೊಂಡ್ರೆ ಕಷ್ಟ ಆಗುತ್ತೆ ಅವನ ನೆನಪಲ್ಲಿ ಬಾಳಬೇಕು. ನಮ್ಮಲ್ಲಿ ಅವನನ್ನ ತೋರ್ಸೋಕೆ ಪ್ರಯತ್ನ ಪಡ್ತಿದೀವಿ. ಯಾವಾಗ್ಲೂ ಅವನ ಮೇಲೆ ಪ್ರೀತಿ ಇರುತ್ತೆ. ಅವನ ನಡುವಳಿಕೆನೆ ಹಾಗೆ ಎಲ್ಲರೂ ಇಷ್ಟ ಪಡ್ತಾರೆ. ಅಪ್ಪಾಜಿ.. ಅಪ್ಪು ಬಗ್ಗೆ ಮಾತಾಡ್ದೆ ಇರೋ ದಿನನೇ ಇಲ್ಲ. ಅವ್ನು ಇದ್ದಾನೆ ಅಂತ ಅನ್ಕೊಂಡೆ ಮಾತಾಡ್ತೀನಿ. ನಮಗೆ ಹೆಲ್ಫಿಂಗ್ ನೇಚರ್ ದೊಡ್ಡೋರಿಂದ ಬಂದಿದ್ದು. ಯಾರಿಗೂ ಗೊತ್ತಾಗಲ್ಲ ಹಾಗೆ ಸಹಾಯ ಮಾಡಬೇಕು. AI ಯಿಂದ ಸಿನಿಮಾ ಮಾಡೋದಾದ್ರೆ ಅಚ್ಚುಕಟ್ಟಾಗಿ ಬರ್ಬೇಕು ಆರ್ಟಿಫಿಷಿಯಲ್ ಅನ್ನಿಸಬಾರದು. ಹಾಗಿದ್ದಾಗ ಮಾಡೋಣ ಎಂದಿದ್ದಾರೆ ಶಿವಣ್ಣ.
ಯುವ ರಾಜ್ಕುಮಾರ್ ಮಾತನಾಡಿ, ನಾನು ಹೊಸ ಸ್ಟಂಟ್ಸ್ ಪ್ರಾಕ್ಟೀಸ್ ಮಾಡಿದ್ರೆ ಅಪ್ಪು ಚಿಕ್ಕಪ್ಪನು ಮಾಡ್ತಿದ್ರು. ಅವ್ರಿಗೆ ಎಲ್ಲಾ ಗೋತ್ತಿದ್ರು ನನ್ನ ಕೇಳ್ತಿದ್ರು ಹೇಗೆ ಮಾಡ್ದೆ ಹೇಗೆ ಕಲಿತೆ ಅಂತ. ವರ್ಕೌಟ್ ಬಗ್ಗೆ ತುಂಬಾ ಮಾತಾಡ್ತಿದ್ವಿ ಇಬ್ಬರು. ಚಿಕ್ಕಪ್ಪನ ನನ್ನಲ್ಲಿ ನೋಡ್ತಾರೆ ಅದೆಲ್ಲ ಆಗಲ್ಲ, ಸುಮ್ನೆ ಇರಿ. ಜೂ.ಅಪ್ಪು ಅಂತಾರೆ ಅದೆಲ್ಲ ಜನರ ಪ್ರೀತಿ ಅಷ್ಟೇ ಎಂದಿದ್ದಾರೆ.