ದೆಹಲಿ: ಪ್ರತಿಯೊಬ್ಬರ ಅಡುಗೆ ಮನೆಯಲ್ಲೂ ನಿತ್ಯ ಬಳಕೆಯಾಗುವ ಅಗತ್ಯ ವಸ್ತುಗಳಲ್ಲಿ ಎಲ್ಪಿಜಿ (LPG) ಗ್ಯಾಸ್ ಸಿಲಿಂಡರ್ ಪ್ರಮುಖವಾದದ್ದು. ಅಡುಗೆ ಮಾಡುವುದರಿಂದ ಹಿಡಿದು ಬಿಸಿನೀರು ಕಾಯಿಸುವವರೆಗೆ ಎಲ್ಲದಕ್ಕೂ ಗ್ಯಾಸ್ ಅಗತ್ಯ. ಆದರೆ, ಅಡುಗೆ ಮಾಡುವಾಗ ನಾವು ಮಾಡುವ ಸಣ್ಣಪುಟ್ಟ ತಪ್ಪುಗಳಿಂದ ಸಿಲಿಂಡರ್ ಬೇಗನೆ ಖಾಲಿಯಾಗುತ್ತದೆ. ಕೆಲವೊಂದು ಉತ್ತಮ ಅಭ್ಯಾಸಗಳನ್ನು ರೂಢಿಸಿಕೊಂಡರೆ ಗ್ಯಾಸ್ ಉಳಿತಾಯ ಮಾಡುವುದರ ಜೊತೆಗೆ ಸಿಲಿಂಡರ್ ಹೆಚ್ಚು ದಿನ ಬಾಳಿಕೆ ಬರುವಂತೆ ನೋಡಿಕೊಳ್ಳಬಹುದು. ಅದಕ್ಕಾಗಿ ಪಾಲಿಸಬೇಕಾದ 4 ಪ್ರಮುಖ ಸಲಹೆಗಳು ಇಲ್ಲಿವೆ.
ಫ್ರಿಡ್ಜ್ನಿಂದ ತಂದ ತಕ್ಷಣ ಆಹಾರ ಬಿಸಿ ಮಾಡಬೇಡಿ
ಅನೇಕರು ಫ್ರಿಡ್ಜ್ನಲ್ಲಿಟ್ಟ ತಣ್ಣನೆಯ ಆಹಾರ ಪದಾರ್ಥಗಳು ಅಥವಾ ಹಾಲನ್ನು ತೆಗೆದ ತಕ್ಷಣ ಗ್ಯಾಸ್ ಒಲೆಯ ಮೇಲೆ ಇಟ್ಟು ಬಿಸಿ ಮಾಡುತ್ತಾರೆ. ಇದರಿಂದ ತಣ್ಣಗಿರುವ ಆಹಾರ ಬಿಸಿಯಾಗಲು ಹೆಚ್ಚು ಸಮಯ ಹಾಗೂ ಗ್ಯಾಸ್ ವ್ಯಯವಾಗುತ್ತದೆ. ಬದಲಾಗಿ, ಬಿಸಿ ಮಾಡುವ 15–20 ನಿಮಿಷಗಳ ಮುಂಚೆಯೇ ಆಹಾರವನ್ನು ಫ್ರಿಡ್ಜ್ನಿಂದ ಹೊರತೆಗೆದಿಡಿ. ಅದು ಸಾಮಾನ್ಯ ಕೋಣೆಯ ಉಷ್ಣಾಂಶಕ್ಕೆ (Room Temperature) ಬಂದ ನಂತರ ಬಿಸಿ ಮಾಡಿದರೆ ಗ್ಯಾಸ್ ಸಾಕಷ್ಟು ಉಳಿತಾಯವಾಗುತ್ತದೆ.
ಪಾತ್ರೆಗೆ ಮುಚ್ಚಳ ಮುಚ್ಚಿ ಅಡುಗೆ ಮಾಡಿ
ಪಾತ್ರೆಯನ್ನು ತೆರೆದಿಟ್ಟು ಅಡುಗೆ ಮಾಡುವುದರಿಂದ ಉಷ್ಣತೆ ವ್ಯರ್ಥವಾಗಿ ಆಹಾರ ಬೇಯಲು ಹೆಚ್ಚು ಸಮಯ ತಗಲುತ್ತದೆ. ಆದ್ದರಿಂದ ಅಡುಗೆ ಅಥವಾ ಸಾರು ಮಾಡುವಾಗ ಪಾತ್ರೆಗೆ ಮುಚ್ಚಳ ಮುಚ್ಚಿ ಬೇಯಿಸುವುದನ್ನು ರೂಢಿಸಿಕೊಳ್ಳಿ. ಇದು ಹಬೆಯ ಮೂಲಕ ಆಹಾರವನ್ನು ಬೇಗನೆ ಬೇಯಿಸುತ್ತದೆ ಮತ್ತು ಗ್ಯಾಸ್ ಉಳಿಸುತ್ತದೆ.
ಪ್ರೆಶರ್ ಕುಕ್ಕರ್ ಬಳಕೆ ಹೆಚ್ಚಿಸಿ
ಬೇಳೆ, ಅನ್ನ ಹಾಗೂ ತರಕಾರಿಗಳನ್ನು ತೆರೆದ ಪಾತ್ರೆಯಲ್ಲಿ ಬೇಯಿಸುವುದಕ್ಕಿಂತ ಪ್ರೆಶರ್ ಕುಕ್ಕರ್ನಲ್ಲಿ ಬೇಯಿಸುವುದು ಹೆಚ್ಚು ಸೂಕ್ತ. ಕುಕ್ಕರ್ನಲ್ಲಿ ಆಹಾರ ಅತಿ ಕಡಿಮೆ ಸಮಯದಲ್ಲಿ ಬೇಯುವುದರಿಂದ ನಿತ್ಯದ ಗ್ಯಾಸ್ ಬಳಕೆಯಲ್ಲಿ ಗಣನೀಯ ಉಳಿತಾಯ ಕಾಣಬಹುದು.
ಗ್ಯಾಸ್ ಬರ್ನರ್ ಸ್ವಚ್ಛವಾಗಿರಲಿ
ಗ್ಯಾಸ್ ಬರ್ನರ್ನಲ್ಲಿ ಧೂಳು, ಕಸ ಅಥವಾ ಅಡುಗೆಯ ಎಣ್ಣೆ ಜಿಡ್ಡು ತುಂಬಿಕೊಂಡರೆ ಜ್ವಾಲೆ (Flame) ಸರಿಯಾಗಿ ಬರುವುದಿಲ್ಲ ಮತ್ತು ಹಳದಿ ಬಣ್ಣಕ್ಕೆ ತಿರುಗುತ್ತದೆ. ಬರ್ನರ್ ಕೊಳೆಯಾಗಿದ್ದರೆ ಪಾತ್ರೆಗೆ ಸಮರ್ಪಕವಾಗಿ ಶಾಖ ತಲುಪದೆ ಹೆಚ್ಚು ಗ್ಯಾಸ್ ವ್ಯರ್ಥವಾಗುತ್ತದೆ. ಆದ್ದರಿಂದ ನಿಯಮಿತವಾಗಿ ಗ್ಯಾಸ್ ಬರ್ನರ್ ಅನ್ನು ಸ್ವಚ್ಛಗೊಳಿಸಿ, ನೀಲಿ ಜ್ವಾಲೆ ಬರುವಂತೆ ನೋಡಿಕೊಳ್ಳಿ.
ದೈನಂದಿನ ಅಡುಗೆ ಶೈಲಿಯಲ್ಲಿ ಈ ನಾಲ್ಕು ಸರಳ ಬದಲಾವಣೆಗಳನ್ನು ಮಾಡಿಕೊಂಡರೆ ಪ್ರತಿ ತಿಂಗಳು ಗ್ಯಾಸ್ ಉಳಿತಾಯ ಮಾಡುವುದರ ಜೊತೆಗೆ ಜೇಬಿನ ಮೇಲಿನ ಹೊರೆಯನ್ನೂ ತಗ್ಗಿಸಿಕೊಳ್ಳಬಹುದು.
