ನವದೆಹಲಿ: ಹದಿಹರೆಯದ ಬಾಲಕಿಯರ ಮಾಸಿಕ ಧರ್ಮದ ಕುರಿತು AIIMS ದೆಹಲಿ ನಡೆಸುತ್ತಿರುವ ಸ್ಕ್ರೀನಿಂಗ್ನಲ್ಲಿ ಮಹತ್ವದ ಮಾಹಿತಿ ಹೊರಬಿದ್ದಿದೆ. 2023ರಿಂದ ಸರ್ಕಾರಿ ಮತ್ತು ಖಾಸಗಿ ಶಾಲೆಗಳಲ್ಲಿ ನಡೆಯುತ್ತಿರುವ ಈ ಅಧ್ಯಯನದಲ್ಲಿ ಇದುವರೆಗೆ ಸುಮಾರು 4,000 ಬಾಲಕಿಯರನ್ನು ತಪಾಸಣೆ ಮಾಡಲಾಗಿದ್ದು, ಅವರಲ್ಲಿ ಐವರಲ್ಲಿ ಒಬ್ಬರು ಅನಿಯಮಿತ ಪೀರಿಯಡ್ಸ್ ಇರುವುದಾಗಿ ತಿಳಿಸಿದ್ದಾರೆ. ಆದರೆ ಅನಿಯಮಿತ ಪೀರಿಯಡ್ಸ್ ಇದ್ದರೆ ಮಾತ್ರ ಅದನ್ನು PCOS ಎಂದು ಪರಿಗಣಿಸಬಾರದು ಎಂದು ತಜ್ಞರು ಸ್ಪಷ್ಟಪಡಿಸಿದ್ದಾರೆ.
AIIMSನ ಪೀಡಿಯಾಟ್ರಿಕ್ ಎಂಡೋಕ್ರೈನಾಲಜಿ ವಿಭಾಗದ ಪ್ರೊಫೆಸರ್ ಡಾ. ರಜಿನಿ ಶರ್ಮಾ ಅವರ ಪ್ರಕಾರ, ಮೊದಲ ಬಾರಿಗೆ ಪೀರಿಯಡ್ಸ್ ಆರಂಭವಾದ ನಂತರದ ಆರಂಭಿಕ ಅವಧಿಯಲ್ಲಿ ಕೆಲವು ಅನಿಯಮಿತತೆ ಸಹಜವಾಗಿರಬಹುದು. ಹೀಗಾಗಿ ಬಾಲಕಿಯ ವಯಸ್ಸು, ಮೊದಲ ಪೀರಿಯಡ್ಸ್ ಆದ ಬಳಿಕ ಕಳೆದಿರುವ ಸಮಯ ಹಾಗೂ ಇತರ ಆರೋಗ್ಯ ಲಕ್ಷಣಗಳನ್ನು ಪರಿಗಣಿಸಿಯೇ ವೈದ್ಯಕೀಯವಾಗಿ ಮೌಲ್ಯಮಾಪನ ಮಾಡಬೇಕು. ಅನಿಯಮಿತ ಪೀರಿಯಡ್ಸ್ಗೆ ಥೈರಾಯ್ಡ್ ಸಮಸ್ಯೆ, ಹಾರ್ಮೋನ್ಗಳ ಬದಲಾವಣೆ ಸೇರಿದಂತೆ ಹಲವು ಕಾರಣಗಳಿರಬಹುದು. ಆದ್ದರಿಂದ ಕೇವಲ ಪೀರಿಯಡ್ಸ್ ಸರಿಯಾಗಿ ಆಗುತ್ತಿಲ್ಲ ಎಂಬ ಕಾರಣಕ್ಕೆ PCOS ಇದೆ ಎಂದು ನಿರ್ಧರಿಸುವುದು ಸರಿಯಲ್ಲ.
ಕಿಶೋರಿಯರ ಅಲ್ಟ್ರಾಸೌಂಡ್ನಲ್ಲಿ ಅಂಡಾಶಯಗಳು ‘ಪಾಲಿಸಿಸ್ಟಿಕ್’ ರೀತಿಯಲ್ಲಿ ಕಾಣಿಸಿಕೊಂಡರೆ ಮಾತ್ರ PCOS ಎಂದು ಹೇಳಲು ಸಾಧ್ಯವಿಲ್ಲ ಎಂದು ತಜ್ಞರು ಎಚ್ಚರಿಸಿದ್ದಾರೆ. ನಿರಂತರ ಮಾಸಿಕ ಧರ್ಮದ ಅಸಮರ್ಪಕತೆ ಜೊತೆಗೆ ಮುಖ ಅಥವಾ ದೇಹದ ಮೇಲೆ ಅತಿಯಾದ ಕೂದಲು ಬೆಳವಣಿಗೆ, ತೀವ್ರ ಮೊಡವೆಗಳು ಅಥವಾ ಆಂಡ್ರೋಜನ್ ಹಾರ್ಮೋನ್ಗಳ ಹೆಚ್ಚಳಕ್ಕೆ ಸಂಬಂಧಿಸಿದ ಇತರ ಲಕ್ಷಣಗಳು ಇದ್ದಾಗ ಮಾತ್ರ ವೈದ್ಯರು ಸೂಕ್ತ ಪರೀಕ್ಷೆಗಳ ಮೂಲಕ ನಿರ್ಣಯಕ್ಕೆ ಬರುತ್ತಾರೆ.
AIIMS ನಡೆಸುತ್ತಿರುವ ಈ ಸಮೀಕ್ಷೆಯಲ್ಲಿ ಕಂಡುಬಂದ ಶೇ.20ರಷ್ಟು ಅನಿಯಮಿತ ಪೀರಿಯಡ್ಸ್ ಪ್ರಮಾಣವನ್ನು PCOS ಇರುವ ಬಾಲಕಿಯರ ಪ್ರಮಾಣ ಎಂದು ಅರ್ಥೈಸಬಾರದು. ನಿಜವಾಗಿ ಎಷ್ಟು ಬಾಲಕಿಯರು PCOSನ ವೈದ್ಯಕೀಯ ಮಾನದಂಡಗಳನ್ನು ಪೂರೈಸುತ್ತಾರೆ ಎಂಬುದನ್ನು ಅಧ್ಯಯನದ ಮುಂದಿನ ಹಂತಗಳಲ್ಲಿ ನಿರ್ಧರಿಸಲಾಗುತ್ತದೆ.
ಯಾವಾಗ ವೈದ್ಯರನ್ನು ಸಂಪರ್ಕಿಸಬೇಕು?
ಪೀರಿಯಡ್ಸ್ಗಳ ನಡುವೆ 21 ದಿನಗಳಿಗಿಂತ ಕಡಿಮೆ ಅಂತರವಿದ್ದರೆ.
ಪೀರಿಯಡ್ಸ್ಗಳ ನಡುವೆ 35 ದಿನಗಳಿಗಿಂತ ಹೆಚ್ಚು ಅಂತರವಿದ್ದರೆ.
ಮೊದಲ ಪೀರಿಯಡ್ಸ್ ಆದ ಬಳಿಕ ಒಂದು ವರ್ಷ ಕಳೆದ ನಂತರವೂ ಚಕ್ರ ನಿರಂತರವಾಗಿ ಅನಿಯಮಿತವಾಗಿದ್ದರೆ.
ಮೂರು ತಿಂಗಳಿಗೂ ಹೆಚ್ಚು ಕಾಲ ಪೀರಿಯಡ್ಸ್ ಆಗದಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಅಗತ್ಯ.
PCOS ಅಥವಾ PMOS ಕೇವಲ ಮಾಸಿಕ ಧರ್ಮಕ್ಕೆ ಸಂಬಂಧಿಸಿದ ಸಮಸ್ಯೆಯಲ್ಲ. ಇನ್ಸುಲಿನ್ ಪ್ರತಿರೋಧ, ಬೊಜ್ಜು, ಕೊಲೆಸ್ಟ್ರಾಲ್ ಅಸಮತೋಲನ, ಟೈಪ್-2 ಮಧುಮೇಹ ಮತ್ತು ಫ್ಯಾಟಿ ಲಿವರ್ನಂತಹ ಮೆಟಬಾಲಿಕ್ ಸಮಸ್ಯೆಗಳೊಂದಿಗೆ ಇದು ಸಂಬಂಧ ಹೊಂದಿರಬಹುದು. ಕೆಲ ಬಾಲಕಿಯರಲ್ಲಿ ತೂಕ ಹೆಚ್ಚಳ ಅಥವಾ ದೇಹದಲ್ಲಿನ ಬದಲಾವಣೆಗಳಿಂದ ಆತಂಕ, ಖಿನ್ನತೆ ಹಾಗೂ ದೇಹದ ಬಗ್ಗೆ ಆತ್ಮವಿಶ್ವಾಸದ ಕೊರತೆಯಂತಹ ಸಮಸ್ಯೆಗಳೂ ಕಾಣಿಸಿಕೊಳ್ಳಬಹುದು.
ತಜ್ಞರು ಅನಗತ್ಯವಾಗಿ ಔಷಧಿಗಳನ್ನು ಬಳಸುವುದಕ್ಕಿಂತ ಆರೋಗ್ಯಕರ ಜೀವನಶೈಲಿಗೆ ಆದ್ಯತೆ ನೀಡುವಂತೆ ಸಲಹೆ ನೀಡಿದ್ದಾರೆ. ನಿಯಮಿತ ದೈಹಿಕ ಚಟುವಟಿಕೆ, ಪೌಷ್ಟಿಕ ಆಹಾರ, ಹಣ್ಣು-ತರಕಾರಿ ಮತ್ತು ಸಾಕಷ್ಟು ಪ್ರೋಟೀನ್ ಸೇವನೆ, ಸಂಸ್ಕರಿತ ಆಹಾರದ ಪ್ರಮಾಣ ಕಡಿಮೆ ಮಾಡುವುದು ಹಾಗೂ ಮಕ್ಕಳ ಬೆಳವಣಿಗೆ ಮತ್ತು ತೂಕವನ್ನು ನಿಯಮಿತವಾಗಿ ಗಮನಿಸುವುದು ಮುಖ್ಯವಾಗಿದೆ.
ಸೂಚನೆ: ಈ AIIMS ಅಧ್ಯಯನದ ‘ಐವರಲ್ಲಿ ಒಬ್ಬರಿಗೆ ಅನಿಯಮಿತ ಪೀರಿಯಡ್ಸ್’ ಎಂಬ ಅಂಕಿ PCOS ಪ್ರಮಾಣವಲ್ಲ; ಇದು ಮಾಸಿಕ ಧರ್ಮದ ಅನಿಯಮಿತತೆಯ ಬಗ್ಗೆ ಸಿಕ್ಕಿರುವ ಪ್ರಾಥಮಿಕ ಮಾಹಿತಿ ಮಾತ್ರ.
