ಪಾರು ಸೀರಿಯಲ್ ಹೀರೋಗಳಿಗೆ ಕಂಕಣ ಭಾಗ್ಯ : ಆದಿ ಆಯ್ತು ಈಗ ಪ್ರೀತು ಸರದಿ

ಚಿತ್ರರಂಗದಲ್ಲಿ ಮದುವೆ ಬಾಗ್ಯಗಳು ಜೋರಾಗಿದೆ. ಹಿರಿತೆರೆ ಮತ್ತು ಕಿರುತೆರೆಯಲ್ಲಿ ಮುದುವೆಯ ದಿಬ್ಬಣ ಜೋರಾಗಿಯೇ ಹೊರಟಿದೆ. ಇತ್ತಿಚೆಗಷ್ಟೇ ಸತ್ಯ ಸೀರಿಯಲ್ ಕಾರ್ತಿಕ್ ಅಲಿಯಾಸ್ ಸಾಗರ್, ಪಾರು ಧಾರಾವಾಹಿಯ ಆದಿ ಅಲಿಯಾಸ್ ಶರತ್ ಹೊಸ ಜೀವನಕ್ಕೆ ಕಾಲಿಟ್ಟಿದ್ದರು. ಇದೀಗ ಅಣ್ಣನ ಮದುವೆಯಾದ ಬಳಿಕ ತಮ್ಮನ ಮದುವೆ ಕೆಲಸಗಳು ಆರಂಭವಾಗಿದೆ. ಅಂದ್ರೆ ಪಾರು ಧಾರಾವಾಹಿಯ ಪ್ರೀತು ಅಲಿಯಾಸ್ ಸಿದ್ದು‌ಮೂಲಿಮನಿ ಮದುವೆ ಡೇಟ್ ಫಿಕ್ಸ್ ಆಗಿದೆ‌.

ಗಟ್ಟಿಮೇಳ ಧಾರಾವಾಹಿಯ ಅದಿತಿ ಅಲಿಯಾಸ್ ಪ್ರಿಯಾ ಆಚಾರ್ಯ ಮತ್ತು ಸಿದ್ದು ಮೂಲಿಮನಿ ರಿಯಾಲಿಟಿ ಶೋ ಒಂದರ ಮೂಲಕ ಪರಿಚಯವಾಗಿ, ಬಳಿಕ ಧಮಾಕ ಸಿನಿಮಾದಲ್ಲೂ ಒಟ್ಟಿಗೆ ನಟಿಸಿದ್ದರು. ಈ ವೇಳೆ ಇಬ್ಬರ ನಡುವೆ ಇದ್ದ ಸ್ನೇಹ ಪ್ರೇಮವಾಗಿ ಬದಲಾಗಿದೆ. ಮನೆಯವರ ಒಪ್ಪಿಗೆ ತೆಗೆದುಕೊಂಡು ಇತ್ತಿಚೆಗಷ್ಟೇ ಎಂಗೇಜ್ಮೆಂಟ್ ಕೂಡ ಮಾಡಿಕೊಂಡಿದ್ದರು. ಇದೀಗ ಮದುವೆ ದಿನಾಂಕ ನಿಗದಿಯಾಗಿದೆ.

ಫೆಬ್ರವರಿ ತಿಂಗಳಲ್ಲಿಯೇ ಇಬ್ಬರು ಮದುವೆಯಾಗುತ್ತಿದ್ದಾರೆ. ಖಾಸಗಿ ರೆಸಾರ್ಟ್ ಒಂದರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಡುತ್ತಿದ್ದಾರೆ. ಧಾರಾವಾಹಿ ಮತ್ತು ಸಿನಿಮಾಗಳನ್ನು ಒಟ್ಟೊಟ್ಟಿಗೆ ಬ್ಯಾಲೆನ್ಸ್ ಮಾಡುತ್ತಿರುವ ಈ ಜೋಡಿ ಮದುವೆಯ ಬಂಧನಕ್ಕೆ ಒಳಗಾಗುತ್ತಿದ್ದಾರೆ.