ಮಹಾನ್ ವಿದ್ವಾಂಸ ಹಾಗೂ ರಾಜನೀತಿಜ್ಞ ಆಚಾರ್ಯ ಚಾಣಕ್ಯರು ತಮ್ಮ ‘ಚಾಣಕ್ಯ ನೀತಿ’ಯಲ್ಲಿ ಮಾನವ ಜೀವನ, ಸಂಬಂಧಗಳು, ಹಣಕಾಸು ಹಾಗೂ ಸಮಾಜದ ಬಗ್ಗೆ ಅನೇಕ ಮಹತ್ವದ ಮಾರ್ಗದರ್ಶನಗಳನ್ನು ನೀಡಿದ್ದಾರೆ. ಚಾಣಕ್ಯರ ಪ್ರಕಾರ, ಬುದ್ಧಿವಂತೆ ಹಾಗೂ ಗುಣವಂತೆ ಆದ ಮಹಿಳೆ ಒಂದು ಮನೆಗೆ ಸೊಸೆಯಾಗಿ ಹೋದರೆ ಆ ಮನೆಯಲ್ಲಿ ಅದೃಷ್ಟ ಮತ್ತು ಸುಖ-ಶಾಂತಿ ನೆಲೆಸುತ್ತದೆ.
ಒಬ್ಬ ಮಹಿಳೆ ಬುದ್ಧಿವಂತೆಯೇ ಅಥವಾ ಅಲ್ಲವೇ ಎಂಬುದನ್ನು ಕೇವಲ ಆಕೆಯ ಸೌಂದರ್ಯ, ಶ್ರೀಮಂತಿಕೆ ಅಥವಾ ಪದವಿಗಳು ನಿರ್ಧರಿಸುವುದಿಲ್ಲ; ಬದಲಿಗೆ ಆಕೆಯ ನಡವಳಿಕೆ ಮತ್ತು ಜೀವನ ಮೌಲ್ಯಗಳು ನಿರ್ಧರಿಸುತ್ತವೆ. ಚಾಣಕ್ಯರ ಪ್ರಕಾರ ಜಾಣ ಮಹಿಳೆಯನ್ನು ಗುರುತಿಸುವ ಪ್ರಮುಖ ಲಕ್ಷಣಗಳು ಇಲ್ಲಿವೆ.
ಯೋಚಿಸಿ ಮಾತನಾಡುವುದು.
ಬುದ್ಧಿವಂತೆ ಮಹಿಳೆ ಮಾತನಾಡುವ ಮುನ್ನ ಎಚ್ಚರಿಕೆಯಿಂದ ಯೋಚಿಸುತ್ತಾಳೆ. ಆಕೆ ವ್ಯರ್ಥ ಮಾತುಗಳನ್ನಾಡುವುದಿಲ್ಲ ಮತ್ತು ಟೀಕೆ-ಟಿಪ್ಪಣಿಗಳಿಗೆ ತಕ್ಷಣವೇ ಆವೇಶದಿಂದ ಪ್ರತಿಕ್ರಿಯಿಸುವುದಿಲ್ಲ. ಸರಿಯಾದ ಸಮಯ ಬಂದಾಗ ಸೂಕ್ತವಾಗಿ ಉತ್ತರಿಸುವ ಸಂಯಮ ಆಕೆಗಿರುತ್ತದೆ.
ಭಾವನೆಗಳ ಮೇಲಿನ ನಿಯಂತ್ರಣ
ಜೀವನದಲ್ಲಿ ಸುಖ-ದುಃಖ, ಜಯ-ಅಪಜಯಗಳು ಸಹಜ. ಕಷ್ಟದ ಸಂದರ್ಭಗಳಲ್ಲಿ ಹತಾಶರಾಗದೆ, ಅತಿಯಾದ ಸಂತೋಷದಲ್ಲಿ ಮೈಮರೆಯದೆ ತನ್ನ ಭಾವನೆಗಳನ್ನು ಹತೋಟಿಯಲ್ಲಿಟ್ಟುಕೊಂಡು ಪ್ರಬುದ್ಧವಾಗಿ ವರ್ತಿಸುವ ಮಹಿಳೆ ಅತ್ಯಂತ ಜಾಣೆಯಾಗಿರುತ್ತಾಳೆ.
ಹಣದ ಮೌಲ್ಯ ಅರಿತಿರುವುದು:
ಎಷ್ಟೇ ಸಂಪಾದಿಸಿದರೂ ಕೆಲವರ ಕೈಯಲ್ಲಿ ಹಣ ಉಳಿಯುವುದಿಲ್ಲ. ಆದರೆ ಬುದ್ಧಿವಂತೆ ಮಹಿಳೆಗೆ ಹಣದ ಸದ್ಬಳಕೆ ಹಾಗೂ ಉಳಿತಾಯದ ಅರಿವಿರುತ್ತದೆ. ಮನೆಯ ಆರ್ಥಿಕತೆಯನ್ನು ಸಮತೋಲನದಲ್ಲಿಟ್ಟುಕೊಂಡು ಕುಟುಂಬದ ಭವಿಷ್ಯವನ್ನು ಕಾಪಾಡುತ್ತಾಳೆ.
ನಿರಂತರ ಕಲಿಕೆಯ ಆಸಕ್ತಿ:
ಯಾವಾಗಲೂ ಹೊಸ ವಿಷಯಗಳನ್ನು ಕಲಿಯಲು ಹಾಗೂ ಜ್ಞಾನವನ್ನು ವೃದ್ಧಿಸಿಕೊಳ್ಳಲು ಉತ್ಸುಕಳಾಗಿರುವ ಮಹಿಳೆ ಸದಾ ಶ್ರೇಷ್ಠಳು ಎಂದು ಚಾಣಕ್ಯರು ಹೇಳುತ್ತಾರೆ. ಇಂತಹ ಗುಣವುಳ್ಳ ಮಹಿಳೆ ತನ್ನೊಂದಿಗೆ ಇಡೀ ಕುಟುಂಬವನ್ನೂ ಪ್ರಗತಿಯ ಹಾದಿಯಲ್ಲಿ ಮುನ್ನಡೆಸುತ್ತಾಳೆ.
ಸಂಕಷ್ಟದ ಸಮಯದಲ್ಲಿ ಧೈರ್ಯ ಮತ್ತು ಸಹನೆ:
ಕುಟುಂಬಕ್ಕೆ ಎದುರಾಗುವ ಸವಾಲುಗಳನ್ನು ಧೈರ್ಯದಿಂದ ಎದುರಿಸಿ, ಎಲ್ಲರನ್ನೂ ಒಗ್ಗಟ್ಟಾಗಿ ಕರೆದೊಯ್ಯುವ ಸಾಮರ್ಥ್ಯ ಬುದ್ಧಿವಂತೆ ಮಹಿಳೆಗೆ ಮಾತ್ರ ಇರುತ್ತದೆ.
ಹಿರಿಯರಿಗೆ ಗೌರವ, ಕಿರಿಯರಿಗೆ ವಾತ್ಸಲ್ಯ:
ಸಂಬಂಧಗಳ ಮೌಲ್ಯವನ್ನು ಅರಿತು ಹಿರಿಯರನ್ನು ಗೌರವಿಸುವ, ಕಿರಿಯರಿಗೆ ಪ್ರೀತಿ-ಮಾರ್ಗದರ್ಶನ ನೀಡುವ ಸಂಸ್ಕಾರವಂತೆ ಮಹಿಳೆ ಮನೆಯ ಘನತೆಯನ್ನು ಸದಾ ಎತ್ತಿಹಿಡಿಯುತ್ತಾಳೆ.
