ಲಖನೌ: ಇಂದಿನ ದಿನಗಳಲ್ಲಿ ಸ್ಮಾರ್ಟ್‌ಫೋನ್ ಪ್ರತಿಯೊಬ್ಬರ ಜೀವನದ ಅವಿಭಾಜ್ಯ ಅಂಗವಾಗಿದೆ. ಕರೆ ಮಾಡುವುದರಿಂದ ಹಿಡಿದು ಡಿಜಿಟಲ್ ಪಾವತಿಯವರೆಗೆ ಪ್ರತಿಯೊಂದಕ್ಕೂ ಮೊಬೈಲ್ ಅತ್ಯಗತ್ಯ. ಆದರೆ, ಅನುಕೂಲ ಕಲ್ಪಿಸುವ ಇದೇ ಮೊಬೈಲ್ ವ್ಯಕ್ತಿಯೊಬ್ಬರ ಪ್ರಾಣಕ್ಕೆ ಕಂಟಕವಾದ ಘಟನೆ ಉತ್ತರ ಪ್ರದೇಶದ ಮುಜಫರ್‌ನಗರದಲ್ಲಿ ನಡೆದಿದೆ.
ಮುಜಫರ್‌ನಗರದ ನಿವಾಸಿ 40 ವರ್ಷದ ವಿಕಾಸ್ ಅಂತಲ್ ಎಂಬುವವರು ಬೈಕ್‌ನಲ್ಲಿ ಮನೆಗೆ ಮರಳುತ್ತಿದ್ದಾಗ, ಅವರ ಪ್ಯಾಂಟ್ ಜೇಬಿನಲ್ಲಿದ್ದ ಸ್ಮಾರ್ಟ್‌ಫೋನ್ ಬ್ಯಾಟರಿ ಏಕಾಏಕಿ ಸ್ಫೋಟಗೊಂಡಿದೆ. ಪರಿಣಾಮವಾಗಿ ಬೈಕ್ ನಿಯಂತ್ರಣ ತಪ್ಪಿ ರಸ್ತೆಗೆ ಬಿದ್ದಿದ್ದಾರೆ. ತೀವ್ರವಾಗಿ ಗಾಯಗೊಂಡಿದ್ದ ಅವರನ್ನು ತಕ್ಷಣ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ.
ಈ ಘಟನೆಯು ಸ್ಮಾರ್ಟ್‌ಫೋನ್ ಬಳಕೆದಾರರಲ್ಲಿ ಆತಂಕ ಮೂಡಿಸಿದ್ದು, ಮೊಬೈಲ್ ಬ್ಯಾಟರಿ ಸ್ಫೋಟಗೊಳ್ಳುವ ಮುನ್ನ ಕಂಡುಬರುವ ಪ್ರಮುಖ ಮುನ್ಸೂಚನೆಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಅನಿವಾರ್ಯವಾಗಿದೆ.
ಬ್ಯಾಟರಿ ಸ್ಫೋಟಗೊಳ್ಳುವ ಮುನ್ನ ಕಾಣಿಸಿಕೊಳ್ಳುವ 5 ಮುಖ್ಯ ಲಕ್ಷಣಗಳು
ಹಿಂಬದಿಯ ಪ್ಯಾನೆಲ್ (Back Panel) ಊದಿಕೊಳ್ಳುವುದು: ಮೊಬೈಲ್‌ನ ಹಿಂಭಾಗ ಉಬ್ಬಿದಂತೆ ಕಂಡರೆ ಅಥವಾ ಬ್ಯಾಕ್ ಪ್ಯಾನೆಲ್ ಬಾಡಿಯಿಂದ ಪ್ರತ್ಯೇಕಗೊಂಡು ಅಂತರ ಕಂಡುಬಂದರೆ, ಬ್ಯಾಟರಿ ಹಾಳಾಗಿದೆ ಎಂದರ್ಥ.
ಡಿಸ್ಪ್ಲೇ ಹೊರಬರುವುದು: ಬ್ಯಾಟರಿ ಊದಿಕೊಂಡಾಗ ಸ್ಕ್ರೀನ್ ಅಥವಾ ಡಿಸ್ಪ್ಲೇ ಮುಂಭಾಗಕ್ಕೆ ತಳ್ಳಲ್ಪಡುತ್ತದೆ. ಇಂತಹ ಲಕ್ಷಣ ಕಂಡ ಕೂಡಲೇ ಅಧಿಕೃತ ಸರ್ವೀಸ್ ಸೆಂಟರ್‌ಗೆ ಭೇಟಿ ನೀಡಿ ಬ್ಯಾಟರಿ ಬದಲಾಯಿಸಬೇಕು.
ಮೊಬೈಲ್ ಅತಿಯಾಗಿ ಬಿಸಿಯಾಗುವುದು: ಯಾವುದೇ ಅಪ್ಲಿಕೇಶನ್ ಬಳಸದೇ ಇದ್ದರೂ ಮೊಬೈಲ್ ಇದ್ದಕ್ಕಿದ್ದಂತೆ ವಿಪರೀತ ಬಿಸಿಯಾಗುತ್ತಿದ್ದರೆ, ಅದನ್ನು ನಿರ್ಲಕ್ಷಿಸಬೇಡಿ. ಬ್ಯಾಟರಿಯಲ್ಲಿ ದೋಷವಿರುವ ಸ್ಪಷ್ಟ ಲಕ್ಷಣವಿದು.
ಸುಟ್ಟ ವಾಸನೆ ಅಥವಾ ವಿಚಿತ್ರ ಗಂಧ: ಫೋನ್‌ನಿಂದ ಹಠಾತ್ ಸುಟ್ಟ ವಾಸನೆ ಅಥವಾ ಕೆಮಿಕಲ್ ವಾಸನೆ ಬರುತ್ತಿದ್ದರೆ, ತಕ್ಷಣ ಅದನ್ನು ಆಫ್ ಮಾಡಿ ತಜ್ಞರಿಗೆ ತೋರಿಸಿ.
ತಪ್ಪಾದ ಅಥವಾ ಅಸಲಿ ಅಲ್ಲದ ಚಾರ್ಜರ್ ಬಳಕೆ: ನಿಗದಿತ ಸಾಮರ್ಥ್ಯಕ್ಕಿಂತ ಹೆಚ್ಚಿನ ಪವರ್ ಇರುವ ಅಥವಾ ಲೋಕಲ್ ಚಾರ್ಜರ್‌ಗಳನ್ನು ಬಳಸುವುದರಿಂದ ಬ್ಯಾಟರಿ ಶೀಘ್ರವಾಗಿ ಹಾಳಾಗುತ್ತದೆ ಮತ್ತು ಸ್ಫೋಟದ ಅಪಾಯ ಹೆಚ್ಚುತ್ತದೆ.
ಸ್ಮಾರ್ಟ್‌ಫೋನ್‌ಗಳಲ್ಲಿ ಲಿಥಿಯಂ-ಐಯಾನ್ (Lithium-ion) ಬ್ಯಾಟರಿಗಳನ್ನು ಬಳಸಲಾಗುತ್ತದೆ. ಲೋಕಲ್ ಬ್ಯಾಟರಿಗಳ ಬಳಕೆ ಅಥವಾ ಬ್ಯಾಟರಿ ಸೋರಿಕೆಯಾದರೆ ಸ್ಫೋಟಗೊಳ್ಳುವ ಸಾಧ್ಯತೆ ಹೆಚ್ಚು. ಆದ್ದರಿಂದ ಯಾವಾಗಲೂ ಅಧಿಕೃತ ಮತ್ತು ಪ್ರಮಾಣೀಕೃತ ಕಂಪನಿಯ ಬ್ಯಾಟರಿ ಹಾಗೂ ಚಾರ್ಜರ್‌ಗಳನ್ನೇ ಬಳಸುವಂತೆ ತಜ್ಞರು ಸಲಹೆ ನೀಡಿದ್ದಾರೆ.
