ನವದೆಹಲಿ: ಹೆಚ್ಚುತ್ತಿರುವ ಸೈಬರ್ ವಂಚನೆ ಹಾಗೂ ಗುರುತು ಕಳ್ಳತನಕ್ಕೆ (Identity Theft) ಕಡಿವಾಣ ಹಾಕಲು ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಅತ್ಯಾಧುನಿಕ ಭದ್ರತಾ ವೈಶಿಷ್ಟ್ಯಗಳನ್ನೊಳಗೊಂಡ ನೂತನ ಆಧಾರ್ ಆ್ಯಪ್ ಬಿಡುಗಡೆ ಮಾಡಿದೆ. ಹಳೆಯ ‘mAadhaar’ ಆ್ಯಪ್ ಬದಲಿಗೆ ಬಂದಿರುವ ಈ ಹೊಸ ಆ್ಯಪ್ ಮೂಲಕ ನಾಗರಿಕರು ತಮ್ಮ ಬೆರಳ ತುದಿಯಲ್ಲೇ ಕೇವಲ ಒಂದೇ ಕ್ಲಿಕ್‌ನಲ್ಲಿ ಆಧಾರ್‌ಗೆ ಸಂಬಂಧಿಸಿದ ಮಹತ್ವದ ಭದ್ರತಾ ನಿಯಂತ್ರಣವನ್ನು ಸಾಧಿಸಬಹುದಾಗಿದೆ.
ಹಿಂದೆ ಆಧಾರ್ ಕೇಂದ್ರಗಳಿಗೆ ಅಲೆದಾಡಿ ಮಾಡಿಸಬೇಕಾಗಿದ್ದ ಹಲವು ಪ್ರಮುಖ ಕೆಲಸಗಳನ್ನು ಇನ್ಮುಂದೆ ಮನೆಯಲ್ಲೇ ಕುಳಿತು ಈ ಆ್ಯಪ್ ಮೂಲಕ ಸುಲಭವಾಗಿ ಪೂರ್ಣಗೊಳಿಸಬಹುದು.
ಒಂದೇ ಟ್ಯಾಪ್‌ನಲ್ಲಿ ಬಯೋಮೆಟ್ರಿಕ್ ಲಾಕ್ ಮಾಡುವುದು ಹೇಗೆ?
ಮೊದಲಿಗೆ ನಿಮ್ಮ ಮೊಬೈಲ್‌ನಲ್ಲಿ ನೂತನ ಆಧಾರ್ ಆ್ಯಪ್ ಡೌನ್‌ಲೋಡ್ ಮಾಡಿ ಇನ್‌ಸ್ಟಾಲ್ ಮಾಡಿಕೊಳ್ಳಿ.
ನಿಮ್ಮ ಆಧಾರ್ ಸಂಖ್ಯೆಯನ್ನು ನಮೂದಿಸಿ ಲಾಗಿನ್ ಆಗಿ.
ಲಾಗಿನ್ ಆದ ನಂತರ ಕೆಳಭಾಗದಲ್ಲಿ ಕಾಣುವ ‘Services’ ಆಯ್ಕೆಯ ಮೇಲೆ ಕ್ಲಿಕ್ ಮಾಡಿ.
ಅಲ್ಲಿ ನಿಮಗೆ ಬಯೋಮೆಟ್ರಿಕ್ ಲಾಕ್ (Biometric Lock) ಮಾಡುವ ಆಯ್ಕೆ ಸಿಗುತ್ತದೆ.
ನಿಮ್ಮ ಬಯೋಮೆಟ್ರಿಕ್ ಡೇಟಾ ಲಾಕ್ ಆಗಿರದಿದ್ದರೆ, ಅದರ ಮೇಲೆ ಟ್ಯಾಪ್ ಮಾಡುವ ಮೂಲಕ ತಕ್ಷಣವೇ ಲಾಕ್ ಸಕ್ರಿಯಗೊಳಿಸಬಹುದು.
ಅಗತ್ಯವಿದ್ದಾಗ ಇದೇ ಆಯ್ಕೆಯ ಮೂಲಕವೇ ಬಯೋಮೆಟ್ರಿಕ್ ಅನ್‌ಲಾಕ್ ಕೂಡ ಮಾಡಿಕೊಳ್ಳಬಹುದು.
ಪ್ರಮುಖ ಭದ್ರತಾ ವೈಶಿಷ್ಟ್ಯ: ಸಿಮ್ ಬೈಂಡಿಂಗ್ (SIM Binding)
ಭದ್ರತೆಯನ್ನು ಇನ್ನಷ್ಟು ಹೆಚ್ಚಿಸಲು ಯುಐಡಿಎಐ ಈ ಆ್ಯಪ್‌ನಲ್ಲಿ ‘ಸಿಮ್ ಬೈಂಡಿಂಗ್’ ಸೌಲಭ್ಯವನ್ನು ಅಳವಡಿಸಿದೆ. ಇದರನ್ವಯ, ಆಧಾರ್‌ಗೆ ನೋಂದಾಯಿಸಲಾದ ಮೊಬೈಲ್ ಸಂಖ್ಯೆಯ ಸಿಮ್ ಕಾರ್ಡ್ ನೀವು ಬಳಸುತ್ತಿರುವ ಮೊಬೈಲ್‌ನಲ್ಲೇ ಇದ್ದರೆ ಮಾತ್ರ ಆ್ಯಪ್ ಲಾಗಿನ್ ಆಗಲು ಸಾಧ್ಯ. ಇದು ಅನಧಿಕೃತ ವ್ಯಕ್ತಿಗಳು ನಿಮ್ಮ ಖಾತೆಯನ್ನು ಪ್ರವೇಶಿಸುವುದನ್ನು ಸಂಪೂರ್ಣವಾಗಿ ತಡೆಯುತ್ತದೆ.
ಇದರೊಂದಿಗೆ, ಒಂದೇ ಮೊಬೈಲ್ ಸಂಖ್ಯೆಯನ್ನು ಬಳಸಿಕೊಂಡು ಕುಟುಂಬದ ಒಟ್ಟು 5 ಸದಸ್ಯರ ಆಧಾರ್ ಪ್ರೊಫೈಲ್‌ಗಳನ್ನು ಇದೇ ಆ್ಯಪ್‌ನಲ್ಲಿ ಜೋಡಿಸುವ (Link) ಅವಕಾಶವನ್ನೂ ಕಲ್ಪಿಸಲಾಗಿದೆ.
ನೂತನ ಆಧಾರ್ ಆ್ಯಪ್‌ನ ಪ್ರಮುಖ ಸೌಲಭ್ಯಗಳು
ಮೊಬೈಲ್ ಸಂಖ್ಯೆ ಅಪ್‌ಡೇಟ್: ಆಧಾರ್ ಕೇಂದ್ರಕ್ಕೆ ತೆರಳದೆ ಮನೆಯಲ್ಲೇ ಕುಳಿತು ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಯನ್ನು ಬದಲಾಯಿಸಿಕೊಳ್ಳುವ ಅವಕಾಶ.
ವಿಳಾಸ ಬದಲಾವಣೆ: ಆನ್‌ಲೈನ್ ಮೂಲಕ ಸುಲಭವಾಗಿ ವಿಳಾಸ ನವೀಕರಣ.
ಬಯೋಮೆಟ್ರಿಕ್ ಲಾಕ್/ಅನ್‌ಲಾಕ್: ಬೆರಳಚ್ಚು ಹಾಗೂ ಐರಿಸ್ ಡೇಟಾ ದುರ್ಬಳಕೆಯಾಗದಂತೆ ತಡೆಯುವ ಸೌಲಭ್ಯ.
ಕ್ಯೂಆರ್ ಕೋಡ್ ಪರಿಶೀಲನೆ: ಕ್ಯೂಆರ್ ಕೋಡ್ ಸ್ಕ್ಯಾನ್ ಮೂಲಕ ಸುರಕ್ಷಿತ ದೃಢೀಕರಣ.
ಆಯ್ದ ವಿವರಗಳ ಹಂಚಿಕೆ: ಅಗತ್ಯವಿರುವ ಮಾಹಿತಿಯನ್ನು ಮಾತ್ರ ಸುರಕ್ಷಿತವಾಗಿ ಹಂಚಿಕೊಳ್ಳುವ ಆಯ್ಕೆ.
ದೃಢೀಕರಣ ಇತಿಹಾಸ: ನಿಮ್ಮ ಆಧಾರ್ ಅನ್ನು ಎಲ್ಲಿ, ಯಾವಾಗ ಬಳಸಲಾಗಿದೆ ಎಂಬುದರ ಪರಿಶೀಲನೆ (Authentication History).
