ದೆಹಲಿ.ಸೆಪ್ಟೆಂಬರ್. 28: ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಮೊಬೈಲ್ ರೀಚಾರ್ಜ್ ನಿಯಮಗಳಲ್ಲಿ ಮಹತ್ವದ ತಿದ್ದುಪಡಿ ತಂದಿದ್ದು, ಇಂಟರ್ನೆಟ್ ಡೇಟಾ ರಹಿತ ರೀಚಾರ್ಜ್ ಆಯ್ಕೆಗಳನ್ನು ಕಡ್ಡಾಯವಾಗಿ ಒದಗಿಸುವಂತೆ ಟೆಲಿಕಾಂ ಕಂಪನಿಗಳಿಗೆ ಸೂಚಿಸಿದೆ.
ಈ ಹೊಸ ನಿಯಮದ ಪ್ರಕಾರ, ರಿಲಯನ್ಸ್ ಜಿಯೋ, ಭಾರ್ತಿ ಏರ್ಟೆಲ್ ಹಾಗೂ ವೊಡಾಫೋನ್ ಐಡಿಯಾ ಸಂಸ್ಥೆಗಳು ಕರೆ ಮತ್ತು ಎಸ್ಎಂಎಸ್ ಮಾತ್ರ ಒಳಗೊಂಡಿರುವ ಕಡಿಮೆ ದರದ ಪ್ಲಾನ್ಗಳನ್ನು ಗ್ರಾಹಕರಿಗೆ ನೀಡಬೇಕಾಗುತ್ತದೆ. ಇಂಟರ್ನೆಟ್ ಬಳಕೆ ಮಾಡದ ಕಡಿಮೆ ಆದಾಯದ ಜನರು, ಹಿರಿಯ ನಾಗರಿಕರು ಮತ್ತು ಕೇವಲ ವೈ-ಫೈ ಆಶ್ರಯಿಸಿರುವ ಗ್ರಾಹಕರು ಅಗತ್ಯವಿಲ್ಲದ ಮೊಬೈಲ್ ಡೇಟಾಗೆ ಅನಗತ್ಯವಾಗಿ ಹಣ ವ್ಯಯಿಸುವುದನ್ನು ತಪ್ಪಿಸಲು ಈ ಹೆಜ್ಜೆ ಇಡಲಾಗಿದೆ.
ಈ ನಿಯಮದನ್ವಯ, ಟೆಲಿಕಾಂ ಆಪರೇಟರ್ಗಳು 30 ದಿನ ಅಥವಾ ಅದಕ್ಕಿಂತ ಕಡಿಮೆ ಅವಧಿಯ ಕಾಲಿಂಗ್, ಡೇಟಾ ಮತ್ತು ಎಸ್ಎಂಎಸ್ ಸಂಯೋಜಿತ ಪ್ಲಾನ್ಗಳನ್ನು ಹೊಂದಿರುವ ಪ್ರತಿಯೊಂದು ಮಾದರಿಗೂ ಪ್ರತ್ಯೇಕವಾಗಿ ಡೇಟಾ ರಹಿತ ಪ್ಲಾನ್ಗಳನ್ನು ಪರಿಚಯಿಸಬೇಕಾಗುತ್ತದೆ. ಇವುಗಳ ದರವು ಡೇಟಾ ಒಳಗೊಂಡಿರುವ ಪ್ಲಾನ್ಗಳಿಗಿಂತ ಗಣನೀಯವಾಗಿ ಕಡಿಮೆಯಿರಬೇಕು. ಇದರ ಜೊತೆಗೆ, ಗ್ರಾಹಕರು ಪ್ರತಿ ತಿಂಗಳು ನಿರ್ದಿಷ್ಟ ದಿನಾಂಕದಂದೇ ನವೀಕರಿಸಿಕೊಳ್ಳಲು ಅನುಕೂಲವಾಗುವಂತೆ ಕನಿಷ್ಠ ಒಂದು ಮಾಸಿಕ ಪ್ಲಾನ್ ಹಾಗೂ ದೀರ್ಘಾವಧಿಯ ಸಿಂಧುತ್ವ ಹೊಂದಿರುವ ಕನಿಷ್ಠ ಒಂದು ವಾಯ್ಸ್-ಎಸ್ಎಂಎಸ್ ಪ್ಲಾನ್ ನೀಡುವುದನ್ನೂ ಕಡ್ಡಾಯಗೊಳಿಸಲಾಗಿದೆ.
ಟೆಲಿಕಾಂ ಕಂಪನಿಗಳು ಇಂತಹ ವಾಯ್ಸ್-ಎಸ್ಎಂಎಸ್ ಪ್ಲಾನ್ಗಳನ್ನು ಸೀಮಿತವಾಗಿ ಮತ್ತು ದೀರ್ಘಾವಧಿಗೆ ಮಾತ್ರ ನೀಡುತ್ತಿದ್ದ ಕಾರಣ, ಕಡಿಮೆ ಅವಧಿಗೆ ರೀಚಾರ್ಜ್ ಮಾಡುವ ಬಡ ವರ್ಗದ ಗ್ರಾಹಕರಿಗೆ ಹೊರೆಯಾಗುತ್ತಿತ್ತು. ಇದನ್ನು ಸರಿಪಡಿಸಲು ಟ್ರಾಯ್ ಸಾರ್ವಜನಿಕರು ಮತ್ತು ಪಾಲುದಾರರಿಂದ ಬಂದ ಸಲಹೆಗಳನ್ನು ಪರಿಶೀಲಿಸಿ ಟೆಲಿಕಾಂ ಗ್ರಾಹಕರ ರಕ್ಷಣೆ ತಿದ್ದುಪಡಿ ನಿಯಮಾವಳಿ-2026 ಅನ್ನು ಅಂತಿಮಗೊಳಿಸಿದೆ. ಸಾಮಾನ್ಯ 28 ದಿನಗಳ ಪ್ಲಾನ್ಗಳ ಬದಲು ಕ್ಯಾಲೆಂಡರ್ ತಿಂಗಳ ದಿನಾಂಕಕ್ಕೆ ಸರಿಯಾಗಿ ರೀಚಾರ್ಜ್ ಸೌಲಭ್ಯ ಸಿಗುವುದರಿಂದ ಗ್ರಾಹಕರಿಗೆ ನೆನಪಿಟ್ಟುಕೊಳ್ಳಲು ಸುಲಭವಾಗಲಿದ್ದು, ಡೇಟಾ ಬಳಸದ ಮೊಬೈಲ್ ಬಳಕೆದಾರರ ರೀಚಾರ್ಜ್ ವೆಚ್ಚವೂ ತಗ್ಗಲಿದೆ.
