ಶಿರಸಿ: ಹಿರಿಯ ಕಲಾವಿದೆ ಹಾಗೂ ನಿವೃತ್ತ ಪ್ರಾಧ್ಯಾಪಕಿ ಡಾ. ವಿಜಯನಳಿನಿ ರಮೇಶ್ ಅವರಿಗೆ ಪ್ರತಿಷ್ಠಿತ ‘ಚಂದುಬಾಬು ಪ್ರಶಸ್ತಿ’ ಪ್ರಕಟಿಸಲಾಗಿದೆ. ಶಿರಸಿಯ ಯಕ್ಷಸಂಭ್ರಮ ಟ್ರಸ್ಟ್ ವತಿಯಿಂದ ಆಯೋಜಿಸಿರುವ ‘ಪಂಚವಲ್ಲರೀ’ ತಾಳಮದ್ದಳೆ ಸರಣಿಯ ಸಮಾರೋಪ ಸಮಾರಂಭದಲ್ಲಿ ಅ.9ರಂದು ಪ್ರಶಸ್ತಿ ಪ್ರದಾನ ಮಾಡಲಾಗುತ್ತದೆ. ‘ಚಂದುಬಾಬು ಪ್ರಶಸ್ತಿ’ ಶಿರಸಿಯ ಯಕ್ಷಸಂಭ್ರಮ ಟ್ರಸ್ಟ್ ವತಿಯಿಂದ ಯಕ್ಷಗಾನ ಹಾಗೂ ತಾಳಮದ್ದಳೆ ಕ್ಷೇತ್ರದಲ್ಲಿ ಗಮನಾರ್ಹ ಸೇವೆ ಸಲ್ಲಿಸಿದ ಕಲಾವಿದರು/ಸಾಧಕರನ್ನು ಗುರುತಿಸಿ ನೀಡುವ ಗೌರವ ಪ್ರಶಸ್ತಿಯಾಗಿದೆ.
ಶಿರಸಿಯ ಡಾ. ವಿಜಯನಳಿನಿ ರಮೇಶ್ ಅವರು ಯಕ್ಷಗಾನ ಕ್ಷೇತ್ರದಲ್ಲಿ ಕಲಾವಿದೆ, ಸಂಘಟಕಿ ಹಾಗೂ ಅಧ್ಯಯನಶೀಲರಾಗಿ ಗುರುತಿಸಿಕೊಂಡಿದ್ದಾರೆ. ಯಕ್ಷಗಾನ ಮತ್ತು ಅದರ ಪರಂಪರೆಯನ್ನು ಜನರಿಗೆ ತಲುಪಿಸುವ ಹಲವು ಚಟುವಟಿಕೆಗಳಲ್ಲಿ ಅವರು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಜೊತೆಗೆ ನಿವೃತ್ತ ಪ್ರಾಧ್ಯಾಪಕಿಯಾಗಿಯೂ ಸೇವೆ ಸಲ್ಲಿಸಿದ್ದಾರೆ.ಯಕ್ಷಗಾನ ಕ್ಷೇತ್ರಕ್ಕೆ ನೀಡಿದ ಕೊಡುಗೆಗಾಗಿ ಅವರಿಗೆ 2020ನೇ ಸಾಲಿನ ಯಕ್ಷಗಾನ ಅಕಾಡೆಮಿಯ ಗೌರವ ಪ್ರಶಸ್ತಿ ಲಭಿಸಿದೆ. ಪ್ರಶಸ್ತಿ ಸ್ವೀಕರಿಸುವ ಸಂದರ್ಭದಲ್ಲಿ ಪ್ರಶಸ್ತಿಯ ಹಣವನ್ನು ಯಕ್ಷಗಾನ ಕ್ಷೇತ್ರಕ್ಕೆ ಸಮರ್ಪಿಸುವುದಾಗಿ ಅವರು ಹೇಳಿದ್ದರು.
ಯಕ್ಷಗಾನ ಕಲೆಯ ಪ್ರದರ್ಶನ, ಸಂಘಟನೆ, ಅಧ್ಯಯನ ಮತ್ತು ದಾಖಲಾತಿ—ಈ ಹಲವು ಆಯಾಮಗಳಲ್ಲಿ ತೊಡಗಿಸಿಕೊಂಡಿರುವ ಡಾ. ವಿಜಯನಳಿನಿ ರಮೇಶ್ ಅವರಿಗೆ ಇದೀಗ ‘ಚಂದುಬಾಬು ಪ್ರಶಸ್ತಿ’ ಘೋಷಣೆಯಾಗಿರುವುದು ಅವರ ಕಲಾ ಸೇವೆಗೆ ದೊರೆತ ಮತ್ತೊಂದು ಗೌರವವಾಗಿದೆ.
ಯಕ್ಷಸಂಭ್ರಮ ಟ್ರಸ್ಟ್ ವತಿಯಿಂದ ಪ್ರತಿವರ್ಷ ನಡೆಯುವ ‘ಪಂಚವಲ್ಲರೀ’ ತಾಳಮದ್ದಳೆ ಸರಣಿಯ 12ನೇ ವರ್ಷದ ಕಾರ್ಯಕ್ರಮ ಅ.5ರಿಂದ 9ರವರೆಗೆ ಪ್ರತಿದಿನ ಸಂಜೆ 4 ಗಂಟೆಗೆ ನಗರದ ಟಿಎಂಎಸ್ ಸಭಾಭವನದಲ್ಲಿ ನಡೆಯಲಿದೆ ಎಂದು ಟ್ರಸ್ಟ್ನ ಪ್ರಮುಖರಾದ ಸೀತಾರಾಮ ಚಂದು ಹಾಗೂ ಇಂದಿರಾ ಹೆಗಡೆ ತಿಳಿಸಿದ್ದಾರೆ.
ಅ.9ರಂದು ಸಂಜೆ 4 ಗಂಟೆಗೆ ನಡೆಯುವ ಸಮಾರೋಪ ಸಮಾರಂಭದಲ್ಲಿ ಜೀವ ಜಲ ಕಾರ್ಯಪಡೆ ಅಧ್ಯಕ್ಷ ಶ್ರೀನಿವಾಸ ಹೆಬ್ಬಾರ್ ಅತಿಥಿಯಾಗಿ ಭಾಗವಹಿಸಲಿದ್ದು, ಕಲಾವಿದೆ ನಿರ್ಮಲಾ ಹೆಗಡೆ ಗೊಳಿಕೊಪ್ಪ ಅಭಿನಂದನಾ ನುಡಿಗಳನ್ನಾಡಲಿದ್ದಾರೆ. ಟ್ರಸ್ಟ್ ಅಧ್ಯಕ್ಷ ಕೇಶವ ಹೆಗಡೆ ಗಡೀಕೈ ಅಧ್ಯಕ್ಷತೆ ವಹಿಸಲಿದ್ದಾರೆ.
ಅ.5ರಂದು ಟಿಎಂಎಸ್ ಅಧ್ಯಕ್ಷ ಜಿ.ಟಿ. ಹೆಗಡೆ ತಟ್ಟೀಸರ ಅವರು ಸರಣಿ ಉದ್ಘಾಟಿಸಲಿದ್ದು, ಟ್ರಸ್ಟ್ ಅಧ್ಯಕ್ಷ ಕೇಶವ ಹೆಗಡೆ ಗಡೀಕೈ ಅಧ್ಯಕ್ಷತೆ ವಹಿಸಲಿದ್ದಾರೆ. ಧಾರವಾಡ ಹಾಲು ಒಕ್ಕೂಟದ ಉಪಾಧ್ಯಕ್ಷ ಸುರೇಶ್ಚಂದ್ರ ಹೆಗಡೆ ಕೇಶಿನ್ಮನೆ ಅತಿಥಿಯಾಗಿ ಭಾಗವಹಿಸಲಿದ್ದಾರೆ.
ಮೊದಲ ದಿನ ಹೊಸ್ತೋಟ ಮಂಜುನಾಥ ಭಾಗವತ ವಿರಚಿತ ‘ವೀರವರ್ಮ ಕಾಳಗ’ ತಾಳಮದ್ದಳೆ ನಡೆಯಲಿದೆ. ಭಾಗವತರಾಗಿ ರಾಮಕೃಷ್ಣ ಹೆಗಡೆ ಹಿಲ್ಲೂರು ಹಾಗೂ ರವಿಚಂದ್ರ ಕನ್ನಡಿಗಟ್ಟೆ, ಮೃದಂಗದಲ್ಲಿ ಶಂಕರ ಭಾಗವತ ಯಲ್ಲಾಪುರ ಹಾಗೂ ಚೈತನ್ಯ ಪದ್ಯಾಣ, ಚೆಂಡೆಯಲ್ಲಿ ಭಾರ್ಗವ ಹೆಗ್ಗೋಡು ಪಾಲ್ಗೊಳ್ಳಲಿದ್ದಾರೆ. ಅರ್ಥಧಾರಿಗಳಾಗಿ ವಿಶ್ವೇಶ್ವರ ಭಟ್ಟ ಸುಣ್ಣಂಬಳ, ವಾಸುದೇವರಂಗ ಭಟ್ಟ, ಡಾ. ಗಣಪತಿ ಭಟ್ಟ ಸಂಕದಗುಂಡಿ, ಹರೀಶ್ ಬೊಳಂತಿಮೊಗರು, ಪವನ್ ಕಿರಣಕೆರೆ, ಆರ್.ಟಿ. ಭಟ್ಟ ಕಬ್ಬಗಾಲ್ ಹಾಗೂ ಗಣೇಶ್ ಶೆಟ್ಟಿ ಕನ್ನಡಿಗಟ್ಟೆ ಭಾಗವಹಿಸಲಿದ್ದಾರೆ.
ಅ.6ರಂದು ಹಲಸಿನಹಳ್ಳಿ ನರಸಿಂಹ ಶಾಸ್ತ್ರಿ ವಿರಚಿತ ‘ಭೀಷ್ಮವಿಜಯ’ ತಾಳಮದ್ದಳೆ ನಡೆಯಲಿದೆ. ಅ.7ರಂದು ಕವಿ ದೇವಿದಾಸ ವಿರಚಿತ ‘ಶ್ರೀಕೃಷ್ಣ ಸಂಧಾನ’, ಅ.8ರಂದು ಪಾಂಡೇಶ್ವರ ವೆಂಕಟ ಹಾಗೂ ಕೆರೆಮನೆ ವೆಂಕಟಾಚಲ ಭಟ್ಟ ವಿರಚಿತ ‘ಕರ್ಣಪರ್ವ’ ತಾಳಮದ್ದಳೆಗಳು ನಡೆಯಲಿವೆ.ಅ.9ರಂದು ಸೂರ್ಯನಾರಾಯಣ ಉಪಾಧ್ಯಾಯ ವಿರಚಿತ ‘ಗುರುದಕ್ಷಿಣೆ–ಜಾಬಾಲಿ ನಂದಿನಿ’ ತಾಳಮದ್ದಳೆ ನಡೆಯಲಿದ್ದು, ಇದರೊಂದಿಗೆ ಐದು ದಿನಗಳ ‘ಪಂಚವಲ್ಲರೀ’ ಸರಣಿ ಸಮಾರೋಪಗೊಳ್ಳಲಿದೆ.
