ಬೈಕ್ಗಿಂತಲೂ ಕಿರಿದಾದ, ತೆಳುವಾದ ಕಾರೊಂದಿದೆ ಎಂದರೆ ಯಾರಾದರೂ ನಂಬಲು ಸಾಧ್ಯವೇ? ರಸ್ತೆಯಲ್ಲಿ ಇದನ್ನು ನೋಡಿದರೆ ನಿಜವಾದ ಕಾರಲ್ಲ, ಫೋಟೋಶಾಪ್ ಅಥವಾ AI ಮೂಲಕ ಸೃಷ್ಟಿಸಿದ ಚಿತ್ರವಿರಬಹುದು ಎಂದೇ ಅನ್ನಿಸುತ್ತದೆ. ಆದರೆ ಇದು ಅಕ್ಷರಶಃ ರಸ್ತೆಯಲ್ಲಿ ಓಡುವ ಅಸಲಿ ಕಾರು! ಕೇವಲ 50.20 ಸೆಂಟಿಮೀಟರ್ ಅಗಲವಿರುವ ಈ ವಿನೂತನ ವಾಹನವೀಗ ‘ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್’ ಪುಟ ಸೇರಿದೆ. ಇಟಲಿಯ ಆಂಡ್ರಿಯಾ ಮರಾಜಿ ಎಂಬ ಮೆಕ್ಯಾನಿಕ್ ಮಾಡಿದ ಈ ಅದ್ಭುತ ಪ್ರಯೋಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.
ಹಳೆಯ ‘ಫಿಯಟ್ ಪಾಂಡಾ’ ಕಾರಿಗೆ ಬಂತು ಮರುಜೀವ!
ಆಂಡ್ರಿಯಾ ಮರಾಜಿ ಈ ವಿಚಿತ್ರ ಸಾಹಸಕ್ಕಾಗಿ 1993ರ ಹಳೆಯ ‘ಫಿಯಟ್ ಪಾಂಡಾ’ ಕಾರನ್ನು ಬಳಸಿಕೊಂಡಿದ್ದಾರೆ. ಗುಜರಿಗೆ ಸೇರಬೇಕಿದ್ದ ಆ ಕಾರಿಗೆ ಹೊಸ ರೂಪ ನೀಡಲು ನಿರ್ಧರಿಸಿದ ಅವರು, ತಮ್ಮ ಕುಟುಂಬದ ಆಟೋ ಡಿಸ್ಮ್ಯಾಂಟ್ಲಿಂಗ್ ಮತ್ತು ರಿಸೈಕ್ಲಿಂಗ್ ಗ್ಯಾರೇಜ್ನಲ್ಲೇ ಈ ಕೆಲಸ ಆರಂಭಿಸಿದರು. ಸಾಮಾನ್ಯ ಫಿಯಟ್ ಪಾಂಡಾ ಕಾರು ಸುಮಾರು 1.46 ಮೀಟರ್ ಅಗಲವಿರುತ್ತದೆ. ಆದರೆ ಮರಾಜಿ ಅದರ ಮಧ್ಯಭಾಗವನ್ನು ಕತ್ತರಿಸಿ, ಅಗಲವನ್ನು ಮೂರನೇ ಒಂದರಷ್ಟಕ್ಕೆ ಅಂದರೆ ಕೇವಲ 50.20 ಸೆಂ.ಮೀ.ಗೆ ಇಳಿಸಿದರು. ಈ ಪವಾಡ ಸದೃಶ ರೂಪಾಂತರಕ್ಕೆ ಅವರಿಗೆ ಬರೋಬ್ಬರಿ 12 ತಿಂಗಳು ಹಿಡಿಯಿತು.
ಶೇ. 99ರಷ್ಟು ಹಳೆಯ ಬಿಡಿಭಾಗಗಳೇ ಬಳಕೆ!
ಈ ಯೋಜನೆಯ ಮತ್ತೊಂದು ವಿಶೇಷತೆಯೆಂದರೆ ಇದಕ್ಕಾಗಿ ಹೊಸ ಭಾಗಗಳನ್ನು ಬಳಸಿಲ್ಲ. 1993ರ ಮೂಲ ಕಾರಿನಲ್ಲಿದ್ದ ಶೇಕಡಾ 99ರಷ್ಟು ಬಿಡಿಭಾಗಗಳನ್ನೇ ಈ ಕಿರಿದಾದ ಆಕಾರಕ್ಕೆ ತಕ್ಕಂತೆ ಮರುಜೋಡಿಸಲಾಗಿದೆ. ನಾಲ್ಕು ಚಕ್ರಗಳು ಮತ್ತು ಬಾಡಿ ಭಾಗಗಳನ್ನು ಅತ್ಯಂತ ನಾಜೂಕಾಗಿ ಕತ್ತರಿಸಿ ಜೋಡಿಸಲಾಗಿದೆ. ಹೊರಗಿನಿಂದ ನೋಡಿದರೆ ಈ ಕಾರು ಕೇವಲ 2D (ದ್ವಿಪರಿಮಾಣ) ಚಿತ್ರದಂತೆ ಕಂಡರೂ, ಇದು ನೈಜವಾಗಿ ಚಲಿಸುವ ಸಾಮರ್ಥ್ಯ ಹೊಂದಿದೆ.
Andrea Marazzi has built the world's narrowest drivable car.
At just 50.20 cm wide, parking this thing should be easy…#GWR2027 pic.twitter.com/B4UeBkdXxa
— Guinness World Records (@GWR) September 10, 2026
ಕಾರಿನ ಪ್ರಮುಖ ವೈಶಿಷ್ಟ್ಯಗಳು
ಆಸನ ವ್ಯವಸ್ಥೆ: ಕೇವಲ ಒಬ್ಬ ವ್ಯಕ್ತಿ ಮಾತ್ರ ಕುಳಿತು ಚಲಾಯಿಸಬಹುದಾದ ಜಾಗವಿದೆ. ಚಾಲಕನಿಗಾಗಿ ಸಣ್ಣ ಸ್ಟೀರಿಂಗ್ ವ್ಹೀಲ್ ಅಳವಡಿಸಲಾಗಿದೆ.
ಎಂಜಿನ್ ಮತ್ತು ವೇಗ: ಮೂಲ ಪೆಟ್ರೋಲ್ ಎಂಜಿನ್ ಬದಲಿಗೆ ಎಲೆಕ್ಟ್ರಿಕ್ ಮೋಟಾರ್ ಬಳಸಲಾಗಿದೆ. ಇದು ಗಂಟೆಗೆ ಗರಿಷ್ಠ 15 ಕಿ.ಮೀ ವೇಗದಲ್ಲಿ ಚಲಿಸುತ್ತದೆ.
ಬ್ಯಾಟರಿ ಸಾಮರ್ಥ್ಯ: ಪೂರ್ಣ ಚಾರ್ಜ್ ಮಾಡಿದರೆ ಸುಮಾರು 25 ಕಿಲೋಮೀಟರ್ ದೂರ ಪ್ರಯಾಣಿಸಬಲ್ಲದು.
ಅಳತೆ ಮತ್ತು ತೂಕ: 3.40 ಮೀಟರ್ ಉದ್ದ, 1.45 ಮೀಟರ್ ಎತ್ತರ ಹಾಗೂ ಸುಮಾರು 264 ಕೆಜಿ ತೂಕ ಹೊಂದಿದೆ. ಮುಂದೆ ಒಂದು ಹೆಡ್ಲೈಟ್ ಹಾಗೂ ಹಿಂಭಾಗದಲ್ಲಿ ಎರಡು ದೀಪಗಳನ್ನು ನೀಡಲಾಗಿದೆ.
ಗಿನ್ನೆಸ್ ದಾಖಲೆಯ ಮನ್ನಣೆ
2025ರ ಜೂನ್ 21ರಂದು ಇಟಲಿಯ ಬಾಗ್ನೋಲೊ ಕ್ರೆಮಾಸ್ಕೊದಲ್ಲಿ ಈ ಕಾರನ್ನು ಅಧಿಕೃತವಾಗಿ ಅಳೆಯಲಾಯಿತು. ಇದರ ಅಗಲ ಕೇವಲ 50.20 ಸೆಂ.ಮೀ ಎಂದು ದೃಢಪಟ್ಟ ನಂತರ, ಗಿನ್ನೆಸ್ ಸಂಸ್ಥೆಯು ಇದಕ್ಕೆ ‘ವಿಶ್ವದಲ್ಲೇ ಚಲಿಸಬಲ್ಲ ಅತ್ಯಂತ ಕಿರಿದಾದ ಕಾರು’ (Narrowest driveable car) ಎಂಬ ಹೆಗ್ಗಳಿಕೆಯನ್ನು ನೀಡಿತು. ಸುರಕ್ಷತೆ ಮತ್ತು ಗಾತ್ರದ ನಿಯಮಗಳಿಂದಾಗಿ ಇದನ್ನು ಸಾಮಾನ್ಯ ರಸ್ತೆಗಳಲ್ಲಿ ದಿನನಿತ್ಯದ ಬಳಕೆಗೆ ಓಡಿಸಲು ಅನುಮತಿಯಿಲ್ಲ. ಹೀಗಾಗಿ ಇದನ್ನು ಪ್ರದರ್ಶನಗಳು ಹಾಗೂ ಆಟೋಮೊಬೈಲ್ ಈವೆಂಟ್ಗಳಿಗಾಗಿ ಮಾತ್ರ ಬಳಸಲಾಗುತ್ತಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಈ “ಫ್ಲಾಟ್ ಫಿಯಟ್” (Flat Fiat) ವಿಡಿಯೋಗಳು ವೈರಲ್ ಆಗಿದ್ದು, ಮೆಕ್ಯಾನಿಕ್ ಆಂಡ್ರಿಯಾ ಮರಾಜಿ ಅವರ ಸೃಜನಶೀಲತೆ ಮತ್ತು ಕಠಿಣ ಪರಿಶ್ರಮಕ್ಕೆ ಜಗತ್ತಿನಾದ್ಯಂತ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
