ಸುದ್ದಿಒನ್.ಸೆಪ್ಟೆಂಬರ್.05: ಇತ್ತೀಚಿನ ದಿನಗಳಲ್ಲಿ ಹೃದಯ ಸಂಬಂಧಿ ಕಾಯಿಲೆಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ, ನಮ್ಮ ಹೃದಯದ ಆರೋಗ್ಯದ ಬಗ್ಗೆ ನಿಗಾ ಇಡುವುದು ಅತ್ಯಂತ ಅಗತ್ಯ. ಯಾವುದೇ ಲ್ಯಾಬ್ ಪರೀಕ್ಷೆಗಳಿಲ್ಲದೆ, ಮನೆಯಲ್ಲೇ ಕುಳಿತು ಕೆಲವು ಪ್ರಾಥಮಿಕ ಲಕ್ಷಣಗಳ ಮೂಲಕ ನಿಮ್ಮ ಹೃದಯ ಎಷ್ಟು ಬಲಿಷ್ಠವಾಗಿದೆ ಎಂಬುದನ್ನು ಅಂದಾಜಿಸಬಹುದು. ದೆಹಲಿಯ ಮೇದಾಂತ ಮೂಲ್ಚಂದ್ ಆಸ್ಪತ್ರೆಯ ಹೃದ್ರೋಗ ತಜ್ಞ ಪ್ರೊ. ಡಾ. ತರುಣ್ ಕುಮಾರ್ ಅವರು ಈ ಕುರಿತು ಪ್ರಮುಖ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ.
ಸ್ಥಿರ ರಕ್ತದೊತ್ತಡ (BP) ಮತ್ತು ಉಸಿರಾಟ: ಹೃದಯ ಸಮರ್ಪಕವಾಗಿ ಕಾರ್ಯನಿರ್ವಹಿಸಲು ರಕ್ತದೊತ್ತಡ ನಿಯಂತ್ರಣದಲ್ಲಿರುವುದು ಮುಖ್ಯ. 120/80 mmHg ಅನ್ನು ಆರೋಗ್ಯಕರ ಬಿಪಿ ಎಂದು ಗುರುತಿಸಲಾಗುತ್ತದೆ. 40 ವರ್ಷ ದಾಟಿದವರು ನಿಯಮಿತವಾಗಿ ಬಿಪಿ ತಪಾಸಣೆ ಮಾಡಿಸಿಕೊಳ್ಳುವುದು ಕಡ್ಡಾಯ. ಜತೆಗೆ, ವೇಗವಾಗಿ ನಡೆದಾಗ ಅಥವಾ ಮೆಟ್ಟಿಲು ಹತ್ತಿದಾಗ ಅತಿಯಾದ ಉಸಿರಾಟದ ತೊಂದರೆ ಅಥವಾ ಆಯಾಸ ಕಾಣಿಸಿಕೊಳ್ಳದಿರುವುದು ಸದೃಢ ಹೃದಯದ ಲಕ್ಷಣ.
ವ್ಯಾಯಾಮದ ನಂತರ ಚೇತರಿಕೆ (Recovery Rate): ವ್ಯಾಯಾಮ ಅಥವಾ ಓಟದ ಸಮಯದಲ್ಲಿ ಹೃದಯ ಬಡಿತ ಹೆಚ್ಚಾಗುವುದು ಸಹಜ. ಆದರೆ ದೈಹಿಕ ಶ್ರಮ ನಿಲ್ಲಿಸಿದ ಕೆಲವೇ ಕ್ಷಣಗಳಲ್ಲಿ ಪಲ್ಸ್ ರೇಟ್ ಮತ್ತೆ ಸಾಮಾನ್ಯ ಸ್ಥಿತಿಗೆ ಮರಳಿದರೆ, ನಿಮ್ಮ ಹೃದಯನಾಳದ ವ್ಯವಸ್ಥೆ ಅತ್ಯಂತ ಬಲಿಷ್ಠವಾಗಿದೆ ಎಂದರ್ಥ.
ಎದೆ ನೋವು ಮತ್ತು ಕಾಲುಗಳ ಊತ ಇಲ್ಲದಿರುವುದು: ದೈನಂದಿನ ಕೆಲಸಗಳನ್ನು ಮಾಡುವಾಗ ಎದೆಯಲ್ಲಿ ಬಿಗಿತ, ಅತಿಯಾದ ಒತ್ತಡ ಅಥವಾ ಅಸ್ವಸ್ಥತೆ ಕಾಣಿಸದಿರುವುದು ಉತ್ತಮ. ಯಾವುದೇ ಸಣ್ಣ ಎದೆನೋವು ಕಾಣಿಸಿಕೊಂಡರೂ ಅದನ್ನು ನಿರ್ಲಕ್ಷಿಸಬಾರದು. ಇನ್ನೊಂದೆಡೆ, ಕಾಲುಗಳು, ಪಾದಗಳು ಅಥವಾ ಕೀಲುಗಳಲ್ಲಿ ಯಾವುದೇ ಕಾರಣವಿಲ್ಲದೆ ಊತ ಕಾಣಿಸಿಕೊಳ್ಳದಿದ್ದರೆ ರಕ್ತ ಪರಿಚಲನೆ ಸರಿಯಾಗಿದೆ ಎಂಬುದನ್ನು ಸೂಚಿಸುತ್ತದೆ. ಹೃದಯದ ಪಂಪಿಂಗ್ ಸಾಮರ್ಥ್ಯ ಕುಸಿದಾಗ ಮಾತ್ರ ದೇಹದ ಕೆಳಭಾಗದಲ್ಲಿ ನೀರು ಶೇಖರಣೆಯಾಗಿ ಊತ ಬರುತ್ತದೆ.
ವೈದ್ಯರ ಸಲಹೆ ಮುಖ್ಯ:
ಈ ಮೇಲಿನ ಅಂಶಗಳು ಹೃದಯದ ಸಾಮರ್ಥ್ಯವನ್ನು ಅಂದಾಜಿಸಲು ನೆರವಾದರೂ, ಇಷ್ಟಕ್ಕೇ ಸಂಪೂರ್ಣ ಆರೋಗ್ಯವನ್ನು ದೃಢೀಕರಿಸಲಾಗದು. ಸಮತೋಲಿತ ಆಹಾರ, ನಿತ್ಯ ವ್ಯಾಯಾಮ, ತೂಕ ಮತ್ತು ಮಧುಮೇಹವನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳುವುದು ಅತ್ಯಗತ್ಯ. ದೇಹದಲ್ಲಿ ಯಾವುದೇ ಅಸಾಮಾನ್ಯ ಲಕ್ಷಣಗಳು ಕಂಡುಬಂದರೆ ಸ್ವಯಂ ನಿರ್ಧಾರಗಳನ್ನು ತೆಗೆದುಕೊಳ್ಳದೆ ತಕ್ಷಣವೇ ಪರಿಣಿತ ವೈದ್ಯರನ್ನು ಸಂಪರ್ಕಿಸಿ ಸೂಕ್ತ ತಪಾಸಣೆ ಮಾಡಿಸಿಕೊಳ್ಳುವುದು ಒಳಿತು.
