ಸಾರ್ವಜನಿಕ ಸ್ಥಳಗಳಲ್ಲಿ ಫೋನ್ ಚಾರ್ಜ್ ಮಾಡುವ ಇರಲಿ ಎಚ್ಚರ!

ದೆಹಲಿ.ಸೆಪ್ಟೆಂಬರ್.05: ಪ್ರಯಾಣದ ಸಮಯದಲ್ಲಿ ಮೊಬೈಲ್ ಬ್ಯಾಟರಿ ಖಾಲಿಯಾದರೆ ಸಾಕು, ಹೆಚ್ಚಿನವರ ಕಣ್ಣು ಹುಡುಕುವುದು ಚಾರ್ಜಿಂಗ್ ಪಾಯಿಂಟ್‌ಗಳನ್ನೇ. ವಿಮಾನ ನಿಲ್ದಾಣ (Airport), ರೈಲ್ವೆ ನಿಲ್ದಾಣ, ಬಸ್ ನಿಲ್ದಾಣ ಅಥವಾ ಶಾಪಿಂಗ್ ಮಾಲ್‌ಗಳಲ್ಲಿ ಉಚಿತವಾಗಿ ಸಿಗುವ ಸಾರ್ವಜನಿಕ ಯುಎಸ್‌ಬಿ (Public USB) ಚಾರ್ಜಿಂಗ್ ಪೋರ್ಟ್‌ಗಳು ಅತ್ಯಂತ ಅನುಕೂಲಕರವೆನಿಸುತ್ತವೆ. ಆದರೆ, ಇಂತಹ ಅಪರಿಚಿತ ಯುಎಸ್‌ಬಿ ಪೋರ್ಟ್‌ಗಳು ಹಾಗೂ ಅಲ್ಲಿರುವ ಕೇಬಲ್‌ಗಳು ನಿಮ್ಮ ಸೈಬರ್ ಭದ್ರತೆಗೆ ಕುತ್ತು ತರಬಹುದು ಎಂಬುದು ನಿಮಗೆ ತಿಳಿದಿದೆಯೇ?

ಹೌದು, ಸಾರ್ವಜನಿಕ ಚಾರ್ಜಿಂಗ್ ಸ್ಟೇಷನ್‌ಗಳ ಮೂಲಕ ನಡೆಯುವ ಸೈಬರ್ ದಾಳಿಯ ಅಪಾಯವನ್ನು ‘ಜ್ಯೂಸ್ ಜ್ಯಾಕಿಂಗ್’ (Juice Jacking) ಎಂದು ಕರೆಯಲಾಗುತ್ತದೆ. ಭಾರತೀಯ ಸೈಬರ್ ಭದ್ರತಾ ಏಜೆನ್ಸಿಗಳು ಸಹ ಇಂತಹ ಅಪರಿಚಿತ ಸಾರ್ವಜನಿಕ ಯುಎಸ್‌ಬಿ ಚಾರ್ಜಿಂಗ್ ಪೋರ್ಟ್‌ಗಳ ಬಳಕೆಯಿಂದ ದೂರವಿರಲು ಎಚ್ಚರಿಕೆ ನೀಡಿವೆ.

ಏನಿದು ಜ್ಯೂಸ್ ಜ್ಯಾಕಿಂಗ್?

ಸಾಮಾನ್ಯವಾಗಿ ಯುಎಸ್‌ಬಿ (USB) ಕೇಬಲ್ ಕೇವಲ ವಿದ್ಯುತ್ ಪೂರೈಕೆಗೆ (Charging) ಮಾತ್ರವಲ್ಲದೆ, ಡೇಟಾ ವರ್ಗಾವಣೆಗೂ (Data Transfer) ಬಳಕೆಯಾಗುತ್ತದೆ. ಸೈಬರ್ ಅಪರಾಧಿಗಳು ಸಾರ್ವಜನಿಕ ಸ್ಥಳಗಳಲ್ಲಿರುವ ಯುಎಸ್‌ಬಿ ಪೋರ್ಟ್‌ಗಳನ್ನು ತಿರುಚಿ (tamper ಮಾಡಿ), ಅವುಗಳ ಮೂಲಕ ನಿಮ್ಮ ಮೊಬೈಲ್ ಫೋನ್‌ಗೆ ಮಾಲ್‌ವೇರ್ ಅಥವಾ ವೈರಸ್‌ಗಳನ್ನು ರವಾನಿಸಬಹುದು. ಈ ಮೂಲಕ ಫೋನ್‌ನಲ್ಲಿರುವ ಡೇಟಾವನ್ನು ಸುಲಭವಾಗಿ ಕದಿಯುವ ತಂತ್ರವನ್ನೇ ‘ಜ್ಯೂಸ್ ಜ್ಯಾಕಿಂಗ್’ ಎನ್ನಲಾಗುತ್ತದೆ.

ಬ್ಯಾಂಕಿಂಗ್ ಹಾಗೂ ವೈಯಕ್ತಿಕ ವಿವರಗಳಿಗೆ ಆಪತ್ತು

ಇಂದಿನ ದಿನಗಳಲ್ಲಿ ಮೊಬೈಲ್ ಫೋನ್ ಕೇವಲ ಫೋಟೋ ಅಥವಾ ಸಂಪರ್ಕ ಸಂಖ್ಯೆಗಳಿಗೆ ಸೀಮಿತವಾಗಿಲ್ಲ. ಯುಪಿಐ (UPI), ನೆಟ್ ಬ್ಯಾಂಕಿಂಗ್, ಇಮೇಲ್, ಸೋಶಿಯಲ್ ಮೀಡಿಯಾ ಹಾಗೂ ಅನೇಕ ಸೂಕ್ಷ್ಮ ಆರ್ಥಿಕ ವಿವರಗಳು ಫೋನ್‌ನಲ್ಲಿರುತ್ತವೆ. ಒಮ್ಮೆ ಮೊಬೈಲ್‌ನ ಭದ್ರತೆಗೆ ಧಕ್ಕೆಯಾದರೆ, ಸೈಬರ್ ವಂಚಕರು ನಿಮ್ಮ ಬ್ಯಾಂಕ್ ಖಾತೆಗೆ ಕನ್ನ ಹಾಕುವ ಅಥವಾ ವೈಯಕ್ತಿಕ ಮಾಹಿತಿ ದುರುಪಯೋಗಪಡಿಸಿಕೊಳ್ಳುವ ಅಪಾಯ ಹೆಚ್ಚಿರುತ್ತದೆ.

ಸುರಕ್ಷಿತವಾಗಿರಲು ಏನು ಮಾಡಬೇಕು?

ಎಸಿ ಸಾಕೆಟ್ (Wall Socket) ಬಳಸಿ: ಸಾರ್ವಜನಿಕ ಸ್ಥಳಗಳಲ್ಲಿ ಚಾರ್ಜ್ ಮಾಡುವುದು ಅನಿವಾರ್ಯವಾದರೆ, ನೇರ ಯುಎಸ್‌ಬಿ ಪೋರ್ಟ್ ಬದಲು ಸಾಮಾನ್ಯ ಗೋಡೆ ಸಾಕೆಟ್‌ಗಳನ್ನು (Normal Electric Sockets) ಆಯ್ದುಕೊಳ್ಳಿ.

ಸ್ವಂತ ಅಡಾಪ್ಟರ್ ಮತ್ತು ಕೇಬಲ್: ಯಾವಾಗಲೂ ನಿಮ್ಮದೇ ಆದ ಒರಿಜಿನಲ್ ಚಾರ್ಜರ್ ಅಡಾಪ್ಟರ್ ಮತ್ತು ಕೇಬಲ್ ಬಳಸಿ.

ಪವರ್ ಬ್ಯಾಂಕ್ ಇರಲಿ: ಪ್ರಯಾಣ ಮಾಡುವಾಗ ನಿಮ್ಮೊಂದಿಗೆ ವಿಶ್ವಾಸಾರ್ಹ ಕಂಪನಿಯ ಪವರ್ ಬ್ಯಾಂಕ್ ಇಟ್ಟುಕೊಳ್ಳುವುದು ಅತ್ಯಂತ ಸುರಕ್ಷಿತ ವಿಧಾನ. ಇದರಿಂದ ಅಪರಿಚಿತ ಪೋರ್ಟ್‌ಗಳ ಮೇಲಿನ ಅವಲಂಬನೆ ತಪ್ಪುತ್ತದೆ.

ಯುಎಸ್‌ಬಿ ಡೇಟಾ ಬ್ಲಾಕರ್: ಅನಿವಾರ್ಯವಾಗಿ ಯುಎಸ್‌ಬಿ ಪೋರ್ಟ್ ಬಳಸಬೇಕಾದ ಪರಿಸ್ಥಿತಿ ಬಂದರೆ, ಮಾರುಕಟ್ಟೆಯಲ್ಲಿ ದೊರೆಯುವ ‘USB Data Blocker’ ಸಾಧನವನ್ನು ಬಳಸಬಹುದು. ಇದು ಡೇಟಾ ವರ್ಗಾವಣೆಯನ್ನು ತಡೆದು ಕೇವಲ ಚಾರ್ಜಿಂಗ್‌ಗೆ ಮಾತ್ರ ಅವಕಾಶ ನೀಡುತ್ತದೆ.

ಮುನ್ನೆಚ್ಚರಿಕೆ:

ಬ್ಯಾಟರಿ ತೀರ ಕಡಿಮೆಯಾದಾಗ ಆತುರದಲ್ಲಿ ಕಂಡ ಕಂಡಲ್ಲಿ ಫೋನ್ ಪ್ಲಗ್ ಮಾಡುವ ಬದಲು, ಮುನ್ನೆಚ್ಚರಿಕೆ ವಹಿಸುವುದು ನಿಮ್ಮ ಡಿಜಿಟಲ್ ಸುರಕ್ಷತೆಯ ದೃಷ್ಟಿಯಿಂದ ಅತ್ಯಗತ್ಯ.