ಅಹಮದಾಬಾದ್ : ಆಗಸ್ಟ್.19 : ಅಹಮದಾಬಾದ್ನಲ್ಲಿ ನಡೆದ ₹1.5 ಕೋಟಿ ಮೌಲ್ಯದ ವಾಟ್ಸಾಪ್ ಆಧಾರಿತ ‘ಬಾಸ್ ಸ್ಕ್ಯಾಮ್’ (CEO ಹೆಸರಿನಲ್ಲಿ ನಡೆಯುವ ವಂಚನೆ) ತನಿಖೆ ನಡೆಸಿದ ಅಹಮದಾಬಾದ್ ಸೈಬರ್ ಕ್ರೈಂ ಪೊಲೀಸರು, ಭಾರತ, ಚೀನಾ, ಪಾಕಿಸ್ತಾನ ಮತ್ತು ಹಾಂಗ್ ಕಾಂಗ್ಗೆ ವ್ಯಾಪಿಸಿರುವ ಬೃಹತ್ ಅಂತರರಾಷ್ಟ್ರೀಯ ಸೈಬರ್ ವಂಚನೆ ಜಾಲವನ್ನು ಬಯಲಿಗೆಳೆದಿದ್ದಾರೆ. ಈ ಸಂಬಂಧ ಪಶ್ಚಿಮ ಬಂಗಾಳದಲ್ಲಿ ಇಬ್ಬರು ಪ್ರಮುಖ ಆರೋಪಿಗಳನ್ನು ಬಂಧಿಸಲಾಗಿದೆ.
ಬಂಧಿತರನ್ನು ಇಮ್ರಾನ್ ಅಲಿ ಪಿಯಾದಾ ಮತ್ತು ಇಂಜಮ್ಮುಲ್ ಮೊಲ್ಲಾ ಎಂದು ಗುರುತಿಸಲಾಗಿದೆ. ಕಳೆದ ಜೂನ್ ತಿಂಗಳಲ್ಲಿ ಅಹಮದಾಬಾದ್ನ ಉದ್ಯಮಿಯೊಬ್ಬರಿಗೆ ವಾಟ್ಸಾಪ್ ಮೂಲಕ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಹೆಸರಿನಲ್ಲಿ ನಕಲಿ ಜಿಪ್ (ZIP) ಫೈಲ್ ಕಳುಹಿಸಲಾಗಿತ್ತು. ಖಾತೆಯಲ್ಲಿ ಸಂಶಯಾಸ್ಪದ ಚಟುವಟಿಕೆ ನಡೆಯುತ್ತಿದೆ ಎಂದು ನಂಬಿಸಿ, ಬಳಿಕ ಆ ಕಂಪನಿಯ ಮಾಲೀಕ ಅಥವಾ ಸಿಇಒ ಹೆಸರಿನಲ್ಲಿ ಅಕೌಂಟೆಂಟ್ಗೆ ಸಂದೇಶ ರವಾನಿಸಿ ₹1.5 ಕೋಟಿ ಹಣವನ್ನು ವರ್ಗಾಯಿಸಿಕೊಳ್ಳಲಾಗಿತ್ತು. ಸಂತ್ರಸ್ತರು ತಕ್ಷಣ ರಾಷ್ಟ್ರೀಯ ಸೈಬರ್ ಸಹಾಯವಾಣಿ ‘1930’ಗೆ ದೂರು ನೀಡಿದ್ದರಿಂದ ₹1.13 ಕೋಟಿ ಹಣವನ್ನು ಪೊಲೀಸರು ತಡೆಹಿಡಿದು ವಶಕ್ಕೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದರು.
ಬಂಧಿತರಿಂದ ಬಯಲಾದ ಆಘಾತಕಾರಿ ಸತ್ಯಗಳು
4,500 ಸಿಮ್ ಕಾರ್ಡ್ಗಳ ದುರ್ಬಳಕೆ: ಟೆಲಿಕಾಂ ಪಾಯಿಂಟ್ ಆಫ್ ಸೇಲ್ (POS) ಏಜೆಂಟ್ ಆಗಿದ್ದ ಇಮ್ರಾನ್, ಗ್ರಾಹಕರ ಬಯೋಮೆಟ್ರಿಕ್ ಹೆಬ್ಬೆರಳಿನ ಗುರುತನ್ನು ದುರುಪಯೋಗಪಡಿಸಿಕೊಂಡು ಅಕ್ರಮವಾಗಿ 4,500ಕ್ಕೂ ಹೆಚ್ಚು ಸಿಮ್ ಕಾರ್ಡ್ಗಳನ್ನು ಸಕ್ರಿಯಗೊಳಿಸಿದ್ದ.
21,000 ಒಟಿಪಿ ಮಾರಾಟ: ಇ-ಕಾಮರ್ಸ್ ಮತ್ತು ಗೇಮಿಂಗ್ ಆ್ಯಪ್ಗಳಿಗಾಗಿ 21,000ಕ್ಕೂ ಹೆಚ್ಚು ಒಟಿಪಿಗಳನ್ನು (OTP) ಹಾಗೂ ವಾಟ್ಸಾಪ್ ಸಕ್ರಿಯಗೊಳಿಸಲು 900 ಒಟಿಪಿಗಳನ್ನು ಸೈಬರ್ ಅಪರಾಧಿಗಳಿಗೆ ಮಾರಾಟ ಮಾಡಿ ಲಕ್ಷಾಂತರ ರೂಪಾಯಿ ಕಮಿಷನ್ ಪಡೆದಿದ್ದ.
ದೇಶಾದ್ಯಂತ 252 ದೂರುಗಳು: ಆರೋಪಿಗಳು ಪೂರೈಸಿದ ಸಿಮ್ ಕಾರ್ಡ್ಗಳ ಮೂಲಕ ದೇಶದ 26 ರಾಜ್ಯಗಳಲ್ಲಿ ಬರೋಬ್ಬರಿ 252 ಸೈಬರ್ ವಂಚನೆ ಪ್ರಕರಣಗಳು ನಡೆದಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ವಂಚನೆಗೆ ಬಳಸಲಾದ ಮಾಲ್ವೇರ್ ಅನ್ನು ಚೀನಾದ ಹ್ಯಾಕರ್ಗಳು ಅಭಿವೃದ್ಧಿಪಡಿಸಿದ್ದಾರೆ ಎಂದು ಶಂಕಿಸಲಾಗಿದೆ.
ವಂಚನೆಗೆ ಸಂಬಂಧಿಸಿದ ಕಾಲ್ ಸೆಂಟರ್ ಪಾಕಿಸ್ತಾನದ ಇಸ್ಲಾಮಾಬಾದ್ನಲ್ಲಿ ಕಾರ್ಯಾಚರಿಸುತ್ತಿತ್ತು ಎಂಬುದು ತಿಳಿದುಬಂದಿದೆ.
ಹಣ ವರ್ಗಾವಣೆಯ ಬ್ಯಾಂಕ್ ಖಾತೆಗಳನ್ನು ನಿರ್ವಹಿಸಲು ಚೀನಾ ಮೂಲದ ವಿಪಿಎನ್ (VPN) ಬಳಸಲಾಗಿದೆ.
ಈ ಜಾಲವು ‘ಸೈಬರ್ ಕ್ರೈಂ-ಆ್ಯಸ್-ಎ-ಸರ್ವೀಸ್’ (CaaS) ಮಾದರಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ಅಪರಾಧಿಗಳಿಗೆ ಸಿಮ್, ಒಟಿಪಿ ಮತ್ತು ವಾಟ್ಸಾಪ್ ಖಾತೆಗಳನ್ನು ಒದಗಿಸುತ್ತಿತ್ತು. ಪೊಲೀಸರ ತ್ವರಿತ ಕಾರ್ಯಾಚರಣೆಯಿಂದಾಗಿ ಸಂಭಾವ್ಯ ವಂಚನೆಗೆ ಸಜ್ಜಾಗಿದ್ದ 10,000ಕ್ಕೂ ಹೆಚ್ಚು ಡಿವೈಸ್ಗಳನ್ನು ನಿಷ್ಕ್ರಿಯಗೊಳಿಸಲಾಗಿದೆ. ಸದ್ಯ ಭಾರತೀಯ ಸೈಬರ್ ಅಪರಾಧ ಸಮನ್ವಯ ಕೇಂದ್ರ (I4C) ಹಾಗೂ ಅಹಮದಾಬಾದ್ ಪೊಲೀಸರು ಜಂಟಿಯಾಗಿ ಹೆಚ್ಚಿನ ತನಿಖೆ ಮುಂದುವರಿಸಿದ್ದಾರೆ.
ಬಾಸ್ ಸ್ಕ್ಯಾಮ್ ಎಂದರೇನು?
‘ಬಾಸ್ ಸ್ಕ್ಯಾಮ್’ ಅಥವಾ CEO Impersonation Fraudನಲ್ಲಿ ವಂಚಕರು ಕಂಪನಿಯ CEO, ನಿರ್ದೇಶಕರು ಅಥವಾ RBI, SEBIಯಂತಹ ನಿಯಂತ್ರಣ ಸಂಸ್ಥೆಗಳ ಅಧಿಕಾರಿಗಳಂತೆ ನಟಿಸುತ್ತಾರೆ. ಬಳಿಕ ಕಂಪನಿಯ ಹಣಕಾಸು ವಿಭಾಗದ ಸಿಬ್ಬಂದಿಯನ್ನು ನಂಬಿಸಿ ದೊಡ್ಡ ಮೊತ್ತದ ಹಣವನ್ನು ವರ್ಗಾಯಿಸುವಂತೆ ಮಾಡುತ್ತಾರೆ.
ಈ ಪ್ರಕರಣದಲ್ಲಿಯೂ WhatsApp ಮೂಲಕ ದುರುದ್ದೇಶಪೂರಿತ ZIP ಫೈಲ್ಗಳನ್ನು ಕಳುಹಿಸಲಾಗಿದ್ದು, ಅವುಗಳಲ್ಲಿ .exe ಮತ್ತು .dll ಫೈಲ್ಗಳು ಇದ್ದವು ಎಂದು ಪೊಲೀಸರು ತಿಳಿಸಿದ್ದಾರೆ. ಇವುಗಳ ಮೂಲಕ ಕಂಪ್ಯೂಟರ್ ಅಥವಾ ಮೊಬೈಲ್ ವ್ಯವಸ್ಥೆಯನ್ನು ಗುರಿಯಾಗಿಸಿ ಬಳಿಕ ಕಂಪನಿಯ ಹಿರಿಯ ಅಧಿಕಾರಿಗಳ ಹೆಸರಿನಲ್ಲಿ ಹಣ ವರ್ಗಾವಣೆ ಮಾಡಿಸುವ ತಂತ್ರ ಬಳಸಲಾಗಿದೆ ಎನ್ನಲಾಗಿದೆ.
#WATCH | Gujarat: Ahmedabad Cyber Crime Police arrested two people from West Bengal and unearthed ‘Boss Scam’ cybercrime ring with China and Pakistan connections. Accused Imran Ali Piyada arresated from South 24 Parganas and accused Injammul Mujibur Mollah arrested from Kolkata.… pic.twitter.com/uT4o1Ef6oi
— ANI (@ANI) August 18, 2026
