ಬೆಳಗ್ಗೆ ಒಂದು ಕಪ್ ಟೀ ಜೊತೆ ಸಿಗರೇಟ್ ಸೇದಿದರೆ ದಿನ ಚೆನ್ನಾಗಿ ಆರಂಭವಾಗುತ್ತದೆ ಎಂದು ಕೆಲವರು ಭಾವಿಸುತ್ತಾರೆ. ಕೆಲವರಿಗೆ ಇದು ವಿಶ್ರಾಂತಿ ನೀಡುವ ಅಭ್ಯಾಸದಂತೆ ಅನಿಸಿದರೂ, ಆರೋಗ್ಯದ ದೃಷ್ಟಿಯಿಂದ ಇದು ಸುರಕ್ಷಿತವಲ್ಲ. ಸಿಗರೇಟ್ನಲ್ಲಿರುವ ನಿಕೋಟಿನ್ ಮತ್ತು ಇತರ ಹಾನಿಕಾರಕ ರಾಸಾಯನಿಕಗಳು ದೇಹದ ಹಲವು ಅಂಗಗಳ ಮೇಲೆ ದುಷ್ಪರಿಣಾಮ ಬೀರುತ್ತವೆ.
ಈ ಅಭ್ಯಾಸದಿಂದ ಎದುರಾಗುವ ಮುಖ್ಯ ಆರೋಗ್ಯ ಸಮಸ್ಯೆಗಳು:
ಅನ್ನನಾಳ ಮತ್ತು ಗಂಟಲಿನ ಸಮಸ್ಯೆ: ಅತ್ಯಂತ ಬಿಸಿಯಾದ ಪಾನೀಯಗಳು ಅನ್ನನಾಳದ ಒಳಪದರವನ್ನು ಹಾನಿಗೊಳಿಸುತ್ತವೆ. ಇದರೊಂದಿಗೆ ಸಿಗರೇಟ್ ಹೊಗೆಯಲ್ಲಿರುವ ವಿಷಕಾರಿ ರಾಸಾಯನಿಕಗಳು ಸೇರಿದಾಗ ಅನ್ನನಾಳ ಹಾಗೂ ಗಂಟಲಿನ ಜೀವಕೋಶಗಳಿಗೆ ತೀವ್ರ ಹಾನಿಯಾಗಿ ಕ್ಯಾನ್ಸರ್ ಅಪಾಯ ಹೆಚ್ಚಾಗುತ್ತದೆ.
ಶ್ವಾಸಕೋಶದ ಮೇಲಿನ ಪ್ರಭಾವ: ಸಿಗರೇಟ್ನಲ್ಲಿರುವ ನಿಕೋಟಿನ್ ಮತ್ತು ಇತರ ಕ್ಯಾನ್ಸರ್ ಕಾರಕ ಅಂಶಗಳು ಶ್ವಾಸಕೋಶದ ಅಂಗಾಂಶಗಳನ್ನು ನಾಶಪಡಿಸುತ್ತವೆ.
ಹೃದ್ರೋಗ ಮತ್ತು ಪಾರ್ಶ್ವವಾಯು (ಸ್ಟ್ರೋಕ್): ಸಿಗರೇಟ್ನಲ್ಲಿರುವ ನಿಕೋಟಿನ್ ರಕ್ತದೊತ್ತಡ ಮತ್ತು ಹೃದಯದ ಬಡಿತವನ್ನು ಹೆಚ್ಚಿಸುತ್ತದೆ. ಚಹಾ/ಕಾಫಿಯಲ್ಲಿರುವ ಕೆಫೀನ್ ಕೂಡ ರಕ್ತದೊತ್ತಡದ ಮೇಲೆ ಪ್ರಭಾವ ಬೀರುವುದರಿಂದ, ಇದು ಹೃದಯ ಸಂಬಂಧಿ ಕಾಯಿಲೆಗಳು ಮತ್ತು ರಕ್ತನಾಳಗಳ ಹಾನಿಗೆ ಕಾರಣವಾಗಿ ಪಾರ್ಶ್ವವಾಯು ಅಪಾಯವನ್ನು ಹೆಚ್ಚಿಸುತ್ತದೆ.
ಜೀರ್ಣಕ್ರಿಯೆ ಮತ್ತು ಹೊಟ್ಟೆಯ ಕಿರಿಕಿರಿ: ಚಹಾದಲ್ಲಿರುವ ಕೆಫೀನ್ ಮತ್ತು ಸಿಗರೇಟ್ ಹೊಗೆ ಎರಡೂ ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ. ಇದರಿಂದ ಅಜೀರ್ಣ, ಹೊಟ್ಟೆ ಉರಿ ಹಾಗೂ ಆಸಿಡಿಟಿ ಸಮಸ್ಯೆಗಳು ಹೆಚ್ಚಾಗುತ್ತವೆ.
ಫಲವತ್ತತೆಯ ಮೇಲೆ ಪರಿಣಾಮ: ಧೂಮಪಾನವು ಪುರುಷರು ಮತ್ತು ಮಹಿಳೆಯರಿಬ್ಬರಲ್ಲೂ ಸಂತಾನೋತ್ಪತ್ತಿ ಸಾಮರ್ಥ್ಯವನ್ನು ಕುಗ್ಗಿಸುತ್ತದೆ. ಪುರುಷರಲ್ಲಿ ವೀರ್ಯಾಣುಗಳ ಗುಣಮಟ್ಟ ಹಾಗೂ ಸಂಖ್ಯೆ ಕಡಿಮೆಯಾದರೆ, ಮಹಿಳೆಯರಲ್ಲಿ ಗರ್ಭಧಾರಣೆಯ ಸಮಸ್ಯೆಗಳು ಎದುರಾಗಬಹುದು.
ಮೆದುಳಿನ ಆರೋಗ್ಯ: ದೀರ್ಘಕಾಲದ ಧೂಮಪಾನವು ರಕ್ತನಾಳಗಳ ಆರೋಗ್ಯವನ್ನು ಕೆಡಿಸಿ, ವಯಸ್ಸಾಗುತ್ತಿದ್ದಂತೆ ಜ್ಞಾಪಕ ಶಕ್ತಿ ಮತ್ತು ಮೆದುಳಿನ ಕಾರ್ಯನಿರ್ವಹಣೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ.
ತಜ್ಞರ ಸಲಹೆ:
ಟೀ ಮತ್ತು ಸಿಗರೇಟ್ ಅನ್ನು ಒಟ್ಟಿಗೆ ಸೇವಿಸುವ ಅಭ್ಯಾಸವನ್ನು ತಕ್ಷಣವೇ ನಿಲ್ಲಿಸುವುದು ಆರೋಗ್ಯದ ದೃಷ್ಟಿಯಿಂದ ಒಳ್ಳೆಯದು. ಧೂಮಪಾನವನ್ನು ಸಂಪೂರ್ಣವಾಗಿ ತೊರೆಯುವುದೇ ಅತ್ಯುತ್ತಮ ನಿರ್ಧಾರ. ಜೊತೆಗೆ, ಯಾವುದೇ ಪಾನೀಯಗಳನ್ನು (ಟೀ/ಕಾಫಿ) ತೀರಾ ಬಿಸಿಯಾಗಿ ಕುಡಿಯುವ ಬದಲು ಉಗುರುಬೆಚ್ಚಗೆ ಸೇವಿಸುವುದು ಸೂಕ್ತ.
