ವಿಶ್ವದಾದ್ಯಂತ ಖಗೋಳ ಪ್ರೇಮಿಗಳು ಕಾತರದಿಂದ ಕಾಯುತ್ತಿರುವ ಅಪರೂಪದ ‘ಪೂರ್ಣ ಸೂರ್ಯಗ್ರಹಣ’ ಆಗಸ್ಟ್ 12ರಂದು ಸಂಭವಿಸಲಿದೆ. ಈ ಅದ್ಭುತ ಬಾಹ್ಯಾಕಾಶ ವಿದ್ಯಮಾನವು ಗ್ರೀನ್ಲ್ಯಾಂಡ್, ಐಸ್ಲ್ಯಾಂಡ್, ಉತ್ತರ ರಷ್ಯಾ, ಅಟ್ಲಾಂಟಿಕ್ ಸಾಗರ, ಸ್ಪೇನ್ ಮತ್ತು ಪೋರ್ಚುಗಲ್ನ ಕೆಲವು ಭಾಗಗಳಲ್ಲಿ ಗೋಚರಿಸಲಿದೆ. ಇದರೊಂದಿಗೆ ಉತ್ತರ ಅಮೆರಿಕ, ಕೆನಡಾ, ಯುರೋಪ್ ಮತ್ತು ವಾಯುವ್ಯ ಆಫ್ರಿಕಾದ ಹಲವು ಪ್ರದೇಶಗಳಲ್ಲಿ ಪಾಕ್ಷಿಕ (ಭಾಗಶಃ) ಸೂರ್ಯಗ್ರಹಣ ಕಂಡುಬರಲಿದೆ.
ಏನಿದು ಪೂರ್ಣ ಸೂರ್ಯಗ್ರಹಣ?
ಚಂದ್ರನು ಭೂಮಿ ಮತ್ತು ಸೂರ್ಯನ ನಡುವೆ ನೇರವಾಗಿ ಬಂದಾಗ ಸೂರ್ಯನ ಬೆಳಕನ್ನು ಸಂಪೂರ್ಣವಾಗಿ ಮರೆಮಾಡುತ್ತಾನೆ. ಈ ಸಂದರ್ಭದಲ್ಲಿ ಹಗಲಿನಲ್ಲಿಯೇ ಕತ್ತಲು ಆವರಿಸಿ, ತಾಪಮಾನ ದಿಢೀರ್ ಕುಸಿತಗೊಳ್ಳುತ್ತದೆ. ಸೂರ್ಯನ ಹೊರಭಾಗದ ‘ಕೊರೊನಾ’ ವಲಯವನ್ನು ಬರಿಗಣ್ಣಿನಿಂದ ವೀಕ್ಷಿಸಲು ಇದು ಸೂಕ್ತ ಸಮಯವಾಗಿದೆ.
ಆದರೆ, ಸೂಕ್ತ ಮುನ್ನೆಚ್ಚರಿಕೆ ವಹಿಸದೆ ಗ್ರಹಣ ವೀಕ್ಷಿಸಿದರೆ ಕಣ್ಣಿನ ದೃಷ್ಟಿಗೆ ಹಾನಿಯಾಗುವ ಸಾಧ್ಯತೆಯಿದೆ. ಗ್ರಹಣವನ್ನು ಸುರಕ್ಷಿತವಾಗಿ ವೀಕ್ಷಿಸಲು ನಾಸಾ (NASA) ನೀಡಿರುವ ಪ್ರಮುಖ ಸಲಹೆಗಳು ಇಲ್ಲಿವೆ:
ವಿಶೇಷ ಸೂರ್ಯಗ್ರಹಣ ಗ್ಲಾಸ್ಗಳನ್ನು ಬಳಸಿ: ಸಾಮಾನ್ಯ ಸನ್ ಗ್ಲಾಸ್ಗಳು ಸೂರ್ಯನ ಬಲವಾದ ಹಾನಿಕಾರಕ ಕಿರಣಗಳನ್ನು ತಡೆಯುವುದಿಲ್ಲ. ಆದ್ದರಿಂದ ‘ISO 12312-2’ ಅಂತರರಾಷ್ಟ್ರೀಯ ಸುರಕ್ಷತಾ ಮಾನದಂಡ ಹೊಂದಿರುವ ‘ಎಕ್ಲಿಪ್ಸ್ ಗ್ಲಾಸ್’ ಅಥವಾ ಹ್ಯಾಂಡ್ಹೆಲ್ಡ್ ವ್ಯೂವರ್ಗಳನ್ನು ಮಾತ್ರ ಬಳಸಿ.
ಗ್ಲಾಸ್ಗಳನ್ನು ಪರಿಶೀಲಿಸಿ: ಕಣ್ಣಿಗೆ ಧರಿಸುವ ಮೊದಲು ಗ್ಲಾಸ್ಗಳಲ್ಲಿ ಯಾವುದೇ ಗೀರು, ತೂತು ಅಥವಾ ಹಾನಿಯಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ. ಹಾನಿಗೊಳಗಾಗಿದ್ದರೆ ತಕ್ಷಣವೇ ಅವುಗಳನ್ನು ಬಿಸಾಡಿ.
ನೇರವಾಗಿ ವೀಕ್ಷಿಸುವ ಸರಿಯಾದ ಸಮಯ ತಿಳಿಯಿರಿ: ಗ್ರಹಣದ ಆರಂಭಿಕ ಮತ್ತು ಅಂತಿಮ ಹಂತಗಳಲ್ಲಿ (ಭಾಗಶಃ ಗ್ರಹಣ) ಕಡ್ಡಾಯವಾಗಿ ಗ್ಲಾಸ್ಗಳನ್ನು ಧರಿಸಿರಬೇಕು. ಚಂದ್ರನು ಸೂರ್ಯನನ್ನು ಸಂಪೂರ್ಣವಾಗಿ ಮುಚ್ಚುವ ‘ಟೋಟಾಲಿಟಿ’ (Totality) ಸಮಯದಲ್ಲಿ ಮಾತ್ರ ಕೆಲವೇ ಕ್ಷಣ ಗ್ಲಾಸ್ ತೆಗೆದು ನೋಡಬಹುದು. ಸೂರ್ಯನ ಬೆಳಕು ಮತ್ತೆ ಕಾಣಿಸಿಕೊಂಡ ತಕ್ಷಣವೇ ಗ್ಲಾಸ್ ಧರಿಸಬೇಕು.
