ಅಡುಗೆ ಎಣ್ಣೆ ಹೀಗೆ ಸಂಗ್ರಹಿಸಿದರೆ ವಿಷಕಾರಿ!: ಈ ಲಕ್ಷಣಗಳು ಕಂಡರೆ ತಕ್ಷಣವೇ ಬಿಸಾಡಿ

ನಾವು ಸಾಮಾನ್ಯವಾಗಿ ಅಡುಗೆ ಎಣ್ಣೆಯನ್ನು ಒಟ್ಟಿಗೆ ತಿಂಗಳುಗಟ್ಟಲೆ ಸಂಗ್ರಹಿಸಿಟ್ಟುಕೊಂಡು, ಅದು ಸಂಪೂರ್ಣವಾಗಿ ಮುಗಿಯುವವರೆಗೆ ಬಳಸುತ್ತೇವೆ. ಆದರೆ, ಎಣ್ಣೆಯನ್ನು ಖರೀದಿಸಿದ ನಂತರ ಸರಿಯಾಗಿ ಸಂಗ್ರಹಿಸದಿದ್ದರೆ, ಗಾಳಿಯಲ್ಲಿರುವ ಆಮ್ಲಜನಕ, ಅಡುಗೆಮನೆಯ ಶಾಖ ಮತ್ತು ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವುದರಿಂದ ಅದು ಬೇಗನೆ ಹಾಳಾಗುತ್ತದೆ.

ಹಾಲು ಅಥವಾ ಬ್ರೆಡ್ನಂತೆ ಎಣ್ಣೆ ತಕ್ಷಣವೇ ಹಾಳಾದಂತೆ ಕಾಣುವುದಿಲ್ಲ. ಕಾಲಕ್ರಮೇಣ ಇದು ‘ಆಕ್ಸಿಡೀಕರಣ’ (Oxidation) ಎಂಬ ರಾಸಾಯನಿಕ ಕ್ರಿಯೆಗೆ ಒಳಗಾಗುತ್ತದೆ. ಇದರಿಂದಾಗಿ ಎಣ್ಣೆಯ ಬಣ್ಣ, ವಾಸನೆ ಮತ್ತು ರುಚಿ ಬದಲಾಗುತ್ತದೆ. ಇಂತಹ ಎಣ್ಣೆಯನ್ನು ಬಳಸಿ ಅಡುಗೆ ಮಾಡುವುದರಿಂದ ಆಹಾರದ ರುಚಿ ಹಾಳಾಗುವುದು ಮಾತ್ರವಲ್ಲದೆ, ಆರೋಗ್ಯಕ್ಕೂ ತೀವ್ರ ಹಾನಿಯಾಗುತ್ತದೆ.

ಹಾಳಾದ ಎಣ್ಣೆಯಿಂದ ಕಾದಿದೆ ಅಪಾಯ!

ಹಾಳಾದ ಅಥವಾ ಆಕ್ಸಿಡೀಕರಣಗೊಂಡ ಎಣ್ಣೆಯನ್ನು ನಿರಂತರವಾಗಿ ಸೇವಿಸುವುದರಿಂದ ದೇಹದಲ್ಲಿ ‘ಫ್ರೀ ರಾಡಿಕಲ್ಸ್’ (Free Radicals) ಹೆಚ್ಚಾಗುತ್ತವೆ. ಇವು ದೇಹದ ಜೀವಕೋಶಗಳನ್ನು ಹಾನಿಗೊಳಿಸುವುದಲ್ಲದೆ, ರಕ್ತನಾಳಗಳಲ್ಲಿ ಕೊಬ್ಬು ಶೇಖರಣೆಯಾಗಲು, ತೀವ್ರ ಹೃದಯ ಸಂಬಂಧಿ ತೊಂದರೆಗಳಿಗೆ ಮತ್ತು ದೀರ್ಘಕಾಲದ ಕಾಯಿಲೆಗಳಿಗೆ ದಾರಿ ಮಾಡಿಕೊಡುತ್ತವೆ. ಪ್ರತಿಯೊಂದು ಎಣ್ಣೆಯ ಶೆಲ್ಫ್ ಲೈಫ್ (ಬಳಕೆಯ ಅವಧಿ) ಭಿನ್ನವಾಗಿರುತ್ತದೆ. ಕ್ಯಾನೋಲಾ ಅಥವಾ ಸಂಸ್ಕರಿಸಿದ ವೆಜಿಟೇಬಲ್ ಎಣ್ಣೆ ಸೀಲ್ ಮಾಡಿದ ಬಾಟಲಿಯಲ್ಲಿ 1 ರಿಂದ 2 ವರ್ಷಗಳವರೆಗೆ ಉತ್ತಮವಾಗಿದ್ದರೂ, ಸೀಲ್ ತೆಗೆದ ನಂತರ 6 ರಿಂದ 12 ತಿಂಗಳೊಳಗೆ ಬಳಸಬೇಕು. ಎಕ್ಸ್ಟ್ರಾ ವರ್ಜಿನ್ ಆಲಿವ್ ಎಣ್ಣೆಯನ್ನು 3 ರಿಂದ 6 ತಿಂಗಳು, ಎಳ್ಳೆಣ್ಣೆ ಮತ್ತು ಆವಕಾಡೊ ಎಣ್ಣೆಯನ್ನು 6 ತಿಂಗಳೊಳಗೆ ಬಳಸುವುದು ಸೂಕ್ತ. ಕೊಬ್ಬರಿ ಎಣ್ಣೆ ಎರಡು ವರ್ಷಗಳವರೆಗೆ ಬಾಳಿಕೆ ಬರುತ್ತದೆ. ಆದರೆ ಅಗಸೆಬೀಜದ (Flaxseed) ಎಣ್ಣೆಯ ಸೀಲ್ ತೆಗೆದ ನಂತರ ಕಡ್ಡಾಯವಾಗಿ ರೆಫ್ರಿಜರೇಟರ್ನಲ್ಲೇ ಇಡಬೇಕು, ಇಲ್ಲದಿದ್ದರೆ ಕೆಲವೇ ದಿನಗಳಲ್ಲಿ ಹಾಳಾಗುತ್ತದೆ.

ಎಣ್ಣೆ ಹಾಳಾಗಿದೆಯೇ ಎಂದು ತಿಳಿಯಲು ಅದನ್ನು ವಾಸನೆ ನೋಡಿ ಅಥವಾ ಸ್ವಲ್ಪ ರುಚಿ ನೋಡಿ ಸುಲಭವಾಗಿ ಗುರುತಿಸಬಹುದು. ಹಾಳಾದ ಎಣ್ಣೆಯು ಸಾಮಾನ್ಯವಾಗಿ ಹುಳಿ, ಕೊಳೆತ ಅಥವಾ ಸಾಬೂನಿನಂತಹ ವಿಚಿತ್ರ ಕಟು ರುಚಿಯನ್ನು ಹೊಂದಿರುತ್ತದೆ. ಬಣ್ಣ ಬದಲಾಗುವುದು, ಗಟ್ಟಿಯಾಗುವುದು ಮತ್ತು ಬಾಟಲಿಯ ತಳದಲ್ಲಿ ಕಸ ಶೇಖರಣೆಯಾಗುವುದು ಎಣ್ಣೆ ಹಾಳಾಗುತ್ತಿರುವುದರ ಸಂಕೇತಗಳಾಗಿವೆ. ಫುಡ್ ಸೇಫ್ಟಿ ಅಂಡ್ ಸ್ಟ್ಯಾಂಡರ್ಡ್ಸ್ ಅಥಾರಿಟಿ ಆಫ್ ಇಂಡಿಯಾ (FSSAI) ಮಾರ್ಗದರ್ಶಿ ಸೂತ್ರಗಳ ಪ್ರಕಾರ, ಅಡುಗೆ ಎಣ್ಣೆಯನ್ನು ಪದೇ ಪದೇ ಕಾಯಿಸಬಾರದು. ಎಣ್ಣೆಯನ್ನು ಮೂರಕ್ಕಿಂತ ಹೆಚ್ಚು ಬಾರಿ ಕುದಿಸುವುದರಿಂದ ಅದರಲ್ಲಿ ‘ಟೋಟಲ್ ಪೋಲಾರ್ ಕಾಂಪೌಂಡ್ಸ್’ (TPC) ಎಂಬ ಹಾನಿಕಾರಕ ರಾಸಾಯನಿಕಗಳು ಉತ್ಪತ್ತಿಯಾಗುತ್ತವೆ. ಇವು 25 ಶೇಕಡಾಕ್ಕಿಂತ ಹೆಚ್ಚಾದರೆ ಆ ಎಣ್ಣೆ ವಿಷಕ್ಕೆ ಸಮಾನವಾಗುತ್ತದೆ.

ಸಂಗ್ರಹಿಸುವ ಸರಿಯಾದ ವಿಧಾನ

ಪೂರಿ ಅಥವಾ ಬಜ್ಜಿಯಂತಹ ತಿಂಡಿಗಳನ್ನು ಕರೆದ ನಂತರ ಉಳಿದ ಎಣ್ಣೆಯನ್ನು ಮತ್ತೆ ಬಳಸಬೇಕಾದರೆ, ಅದರಲ್ಲಿರುವ ಆಹಾರದ ಕಣಗಳನ್ನು ತೆಳುವಾದ ಬಟ್ಟೆ ಅಥವಾ ಜರಡಿಯಿಂದ ಸೋಸಬೇಕು. ನಂತರ ಅದನ್ನು ಗಾಳಿ ಆಡದ ಡಬ್ಬಿಯಲ್ಲಿ, ಕತ್ತಲೆ ಹಾಗೂ ತಂಪಾದ ಜಾಗದಲ್ಲಿ ಸಂಗ್ರಹಿಸಿ, 1 ರಿಂದ 2 ದಿನಗಳ ಒಳಗೆ ಕೇವಲ ಒಮ್ಮೆ ಮಾತ್ರ ಮರುಬಳಕೆ ಮಾಡಬೇಕು. ಎಣ್ಣೆ ಬಾಟಲಿಯ ಮೇಲಿರುವ ‘ಬೆಸ್ಟ್ ಬಿಫೋರ್’ ದಿನಾಂಕವು ಅದರ ಗರಿಷ್ಠ ಗುಣಮಟ್ಟವನ್ನು ಮಾತ್ರ ಸೂಚಿಸುತ್ತದೆ. ಬಾಟಲಿ ತೆರೆದ ನಂತರ ಸಂಗ್ರಹಿಸುವ ವಿಧಾನದ ಮೇಲೆ ಅದರ ಬಾಳಿಕೆ ಆಧಾರಿತವಾಗಿರುತ್ತದೆ. ಆದ್ದರಿಂದ ಬಾಟಲಿ ತೆರೆದ ದಿನಾಂಕವನ್ನು ಅದರ ಮೇಲೆ ಬರೆದಿಡುವುದು ಒಳ್ಳೆಯದು. ರಿಯಾಯಿತಿ ಇದೆ ಎಂದು ಲೀಟರ್ಗಟ್ಟಲೆ ಎಣ್ಣೆ ತಂದು ತಿಂಗಳುಗಟ್ಟಲೆ ಇಟ್ಟುಕೊಳ್ಳುವ ಬದಲು, ಕುಟುಂಬದ ಅಗತ್ಯಕ್ಕೆ ತಕ್ಕಷ್ಟು ಕಡಿಮೆ ಪ್ರಮಾಣದಲ್ಲಿ ಖರೀದಿಸಿ ಬೇಗನೆ ಬಳಸಿ ಮುಗಿಸುವುದೇ ಆರೋಗ್ಯಕ್ಕೆ ಸುರಕ್ಷಿತ.