ನಾಡಗೀತೆಗೆ ʻಬೌದ್ಧರುದ್ಯಾನʼ ಸೇರ್ಪಡೆ, ಮೈಸೂರು ಅನಂತಸ್ವಾಮಿ ಮೂಲ ರಾಗದಲ್ಲೇ ಸಂಯೋಜಿಸಲು ಸರ್ಕಾರ ಆದೇಶ

ಬೆಂಗಳೂರು.ಜುಲೈ.18: ರಾಷ್ಟ್ರಕವಿ ಕುವೆಂಪು ಅವರ ವಿರಚಿತ ಕರ್ನಾಟಕದ ಹೆಮ್ಮೆಯ ನಾಡಗೀತೆ ʻಜಯ ಭಾರತ ಜನನಿಯ ತನುಜಾತೆʼಯಲ್ಲಿ ಈ ಹಿಂದೆ ಕೈಬಿಡಲಾಗಿದ್ದ ʻಬೌದ್ಧರುದ್ಯಾನʼ ಎಂಬ ಪದವನ್ನು ಸೇರ್ಪಡೆಗೊಳಿಸಲು ರಾಜ್ಯ ಸರ್ಕಾರ ಅಧಿಕೃತ ಆದೇಶ ಹೊರಡಿಸಿದೆ.

ಈ ಮಹತ್ವದ ಬದಲಾವಣೆಗೆ ಸಂಬಂಧಿಸಿದಂತೆ ಡಾ. ಪುರುಷೋತ್ತಮ ಬಿಳಿಮಲೆ ನೇತೃತ್ವದ ತಜ್ಞರ ಸಮಿತಿಯು ಸರ್ಕಾರಕ್ಕೆ ಸಲ್ಲಿಸಿದ್ದ ಅಧಿಕೃತ ಶಿಫಾರಸನ್ನು ಅಂಗೀಕರಿಸಲಾಗಿದೆ.

ಕುವೆಂಪು ಅವರ ʻಜಯ ಭಾರತ ಜನನಿಯ ತನುಜಾತೆʼ ನಾಡಗೀತೆಯಲ್ಲಿ ʻಬೌದ್ಧರುದ್ಯಾನʼ ಪದವನ್ನು ಮರು ಸೇರ್ಪಡೆಗೊಳಿಸುವ ಕುರಿತು ಡಾ. ಪುರುಷೋತ್ತಮ ಬಿಳಿಮಲೆ ನೇತೃತ್ವದ ತಜ್ಞರ ಸಮಿತಿಯು ರಾಜ್ಯ ಸರ್ಕಾರಕ್ಕೆ ಅಧಿಕೃತ ಶಿಫಾರಸು ಮಾಡಿದ್ದು, ಪರಿಷ್ಕೃತ ನಾಡಗೀತೆಯನ್ನು ಮೈಸೂರು ಅನಂತಸ್ವಾಮಿ ಅವರ ಮೂಲ ರಾಗದಲ್ಲೇ ಸಂಯೋಜಿಸಲು ಸರ್ಕಾರ ಆದೇಶಿಸಿದೆ. pic.twitter.com/6xrDNVa078

— DIPR Karnataka (@KarnatakaVarthe) July 18, 2026

ಇದರೊಂದಿಗೆ, ಪರಿಷ್ಕೃತ ನಾಡಗೀತೆಯನ್ನು ಮೈಸೂರು ಅನಂತಸ್ವಾಮಿ ಅವರು ಸಂಯೋಜಿಸಿರುವ ಮೂಲ ರಾಗ ಮತ್ತು ಧಾಟಿಯಲ್ಲೇ ಹಾಡಬೇಕು ಎಂದು ಸರ್ಕಾರ ತನ್ನ ಆದೇಶದಲ್ಲಿ ಸ್ಪಷ್ಟಪಡಿಸಿದೆ. ಈ ನಿರ್ಧಾರವು ನಾಡಗೀತೆಯ ಮೂಲ ಸ್ವರೂಪ ಹಾಗೂ ಸಾಹಿತ್ಯಿಕ ಮೌಲ್ಯವನ್ನು ಎತ್ತಿಹಿಡಿಯುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ ಎಂದು ಪರಿಗಣಿಸಲಾಗಿದೆ.