LPG ಗ್ರಾಹಕರಿಗೆ ಗುಡ್ ನ್ಯೂಸ್: ಇನ್ಮುಂದೆ Instamart ಮೂಲಕವೇ ಗ್ಯಾಸ್ ಸಿಲಿಂಡರ್ ಹೋಂ ಡೆಲಿವರಿ!

ದೆಹಲಿ : ​ತ್ವರಿತ ವಿತರಣಾ ದೈತ್ಯ ಇನ್ಸ್ಟಾಮಾರ್ಟ್, ಗ್ರಾಹಕರಿಗೆ ಮತ್ತೊಂದು ಭರ್ಜರಿ ಸಿಹಿ ಸುದ್ದಿ ನೀಡಿದೆ. ಈಗ ಕೇವಲ ದಿನಸಿ ಸಾಮಗ್ರಿ ಮಾತ್ರವಲ್ಲದೆ, ಇನ್ಸ್ಟಾಮಾರ್ಟ್ ಆಪ್ ಮೂಲಕ ನೇರವಾಗಿ ಎಲ್‌ಪಿಜಿ ಸಿಲಿಂಡರ್ ಅನ್ನು ಮನೆಬಾಗಿಲಿಗೆ ತರಿಸಿಕೊಳ್ಳಬಹುದಾಗಿದೆ. ಇದಕ್ಕಾಗಿ ಇನ್ಸ್ಟಾಮಾರ್ಟ್ ಸಂಸ್ಥೆಯು ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್ (HPCL) ಜೊತೆಗೆ ದೇಶದಲ್ಲೇ ಮೊದಲ ಬಾರಿಗೆ ವಿಶೇಷ ಸಹಭಾಗಿತ್ವವನ್ನು ಘೋಷಿಸಿದೆ.

​ಬೆಂಗಳೂರಿನಲ್ಲಿ ಪ್ರಾಯೋಗಿಕ ಜಾರಿ

​ಈ ನೂತನ ಸೇವೆಯನ್ನು ಸದ್ಯಕ್ಕೆ ಬೆಂಗಳೂರಿನ ಸುಬ್ರಮಣ್ಯಪುರ ಪ್ರದೇಶದಲ್ಲಿ ಪ್ರಾಯೋಗಿಕವಾಗಿ (Pilot Project) ಆರಂಭಿಸಲಾಗಿದೆ. ಈ ಯೋಜನೆಯಡಿ ಗ್ರಾಹಕರು ಹೆಚ್‌ಪಿಸಿಎಲ್ ಸಂಸ್ಥೆಯ ಹೊಸ ಆವಿಷ್ಕಾರವಾದ 10 ಕೆಜಿಯ ‘ಹೆಚ್‌ಪಿ ನವ್ಯಾ’ ಕಾಂಪೋಸಿಟ್ ಸಿಲಿಂಡರ್ ಹಾಗೂ ಸಾಂಪ್ರದಾಯಿಕ 5 ಕೆಜಿಯ ಸಣ್ಣ ಮೆಟಲ್ ಸಿಲಿಂಡರ್ ಅನ್ನು ಆರ್ಡರ್ ಮಾಡಬಹುದಾಗಿದೆ.

​ಹೊಸ ಗ್ಯಾಸ್ ಕನೆಕ್ಷನ್ ಅಗತ್ಯವಿಲ್ಲ!

​ಈ ಸೇವೆಯ ಅತ್ಯಂತ ಆಕರ್ಷಕ ವಿಷಯವೆಂದರೆ, ಇನ್ಸ್ಟಾಮಾರ್ಟ್ ಮೂಲಕ ಸಿಲಿಂಡರ್ ಖರೀದಿಸಲು ಗ್ರಾಹಕರಿಗೆ ಮೊದಲೇ ಯಾವುದೇ ಗೃಹಬಳಕೆಯ ಎಲ್‌ಪಿಜಿ ಸಂಪರ್ಕ ಇರಬೇಕಾದ ಅಗತ್ಯವಿಲ್ಲ. ಮೊದಲ ಬಾರಿ ಆರ್ಡರ್ ಮಾಡುವ ಗ್ರಾಹಕರು ಸಿಲಿಂಡರ್ ಪಡೆಯುವ ಮುನ್ನ ಗುರುತಿನ ಚೀಟಿ ಪರಿಶೀಲನೆ (Identity Verification) ಮತ್ತು ವಿತರಣಾ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಬೇಕಾಗುತ್ತದೆ. ಆನಂತರದ ಆರ್ಡರ್‌ಗಳನ್ನು ಮರುಪೂರಣ (Refill) ಎಂದು ಪರಿಗಣಿಸಲಾಗುತ್ತಿದ್ದು, ಡೆಲಿವರಿ ಸಮಯದಲ್ಲಿ ಖಾಲಿ ಸಿಲಿಂಡರ್ ಅನ್ನು ಹಿಂಪಡೆಯಲಾಗುತ್ತದೆ.

​ಯಾರಿಗೆ ಹೆಚ್ಚು ಸಹಕಾರಿ?

​ವಿದ್ಯಾರ್ಥಿಗಳು, ಉದ್ಯೋಗಸ್ಥರು, ಬಾಡಿಗೆ ಮನೆಯಲ್ಲಿ ವಾಸಿಸುವವರು, ಸಣ್ಣ ಕುಟುಂಬಗಳು ಹಾಗೂ ತಾತ್ಕಾಲಿಕವಾಗಿ ನಗರಗಳಿಗೆ ಬಂದು ನೆಲೆಸುವ ಜನರಿಗೆ ಈ ಸೇವೆ ಹೆಚ್ಚು ವರದಾನವಾಗಲಿದೆ.
​ಹೆಚ್‌ಪಿಸಿಎಲ್ ಪರಿಚಯಿಸಿರುವ ಹೊಸ ‘ಹೆಚ್‌ಪಿ ನವ್ಯಾ’ 10 ಕೆಜಿಯ ಕಾಂಪೋಸಿಟ್ ಸಿಲಿಂಡರ್ ಹಗುರವಾಗಿದ್ದು, ತುಕ್ಕು ನಿರೋಧಕವಾಗಿದೆ. ಇದರ ವಿಶಿಷ್ಟವಾದ ಅರೆಪಾರದರ್ಶಕ (Translucent) ವಿನ್ಯಾಸದಿಂದಾಗಿ ಗ್ರಾಹಕರು ಸಿಲಿಂಡರ್‌ನಲ್ಲಿ ಇನ್ನು ಎಷ್ಟು ಗ್ಯಾಸ್ ಬಾಕಿ ಉಳಿದಿದೆ ಎಂಬುದನ್ನು ಕಣ್ಣಾರೆ ನೋಡಿ ತಿಳಿಯಬಹುದಾಗಿದೆ.

​ನಿಯಮಗಳ ಪಾಲನೆ ಮತ್ತು ಸುರಕ್ಷತೆ

​ಇನ್ಸ್ಟಾಮಾರ್ಟ್ ಮೂಲಕ ಬುಕ್ ಮಾಡಲಾಗುವ ಎಲ್ಲಾ ಸಿಲಿಂಡರ್‌ಗಳನ್ನು ಹೆಚ್‌ಪಿಸಿಎಲ್‌ನ ಅಧಿಕೃತ ವಿತರಕರ ಜಾಲದ ಮೂಲಕವೇ ಪೂರೈಸಲಾಗುತ್ತದೆ. ಸುರಕ್ಷತಾ ನಿಯಮಗಳ ಅಡಿಯಲ್ಲಿ ತರಬೇತಿ ಪಡೆದ ಸಿಬ್ಬಂದಿಯೇ ಗ್ರಾಹಕರ ಮನೆ ಬಾಗಿಲಿಗೆ ವಿತರಣೆ ಮಾಡಲಿದ್ದಾರೆ. ಸದ್ಯಕ್ಕೆ ಬೆಂಗಳೂರಿನಲ್ಲಿ ಮಾತ್ರ ಆರಂಭವಾಗಿರುವ ಈ ಸೇವೆಯನ್ನು ಮುಂದಿನ ದಿನಗಳಲ್ಲಿ ಇತರ ನಗರಗಳಿಗೆ ವಿಸ್ತರಿಸುವ ಬಗ್ಗೆ ಕಂಪನಿಗಳು ಇನ್ನು ಯಾವುದೇ ಅಧಿಕೃತ ನಿರ್ಧಾರ ಪ್ರಕಟಿಸಿಲ್ಲ.