ನೀರು ಕುಡಿಯಲು ಸರಿಯಾದ ಸಮಯ ಯಾವುದು? ಇಲ್ಲಿದೆ ಆಯುರ್ವೇದ ತಜ್ಞರ ಆಶ್ಚರ್ಯಕರ ಸಲಹೆಗಳು!

ಆರೋಗ್ಯವಾಗಿರಲು ದೇಹವನ್ನು ಹೈಡ್ರೇಟ್ ಆಗಿ ಇಟ್ಟುಕೊಳ್ಳುವುದು ಅತ್ಯಗತ್ಯ. ಆದರೆ ಹೆಚ್ಚಿನವರು ದಿನಕ್ಕೆ ಎಷ್ಟು ಪ್ರಮಾಣದ ನೀರು ಕುಡಿಯಬೇಕು ಎಂಬುದರ ಕಡೆಗೆ ಮಾತ್ರ ಗಮನ ಹರಿಸುತ್ತಾರೆ. ಆದರೆ ನೀರು ಕುಡಿಯುವ ಸಮಯ ಕೂಡ ಅಷ್ಟೇ ಮುಖ್ಯ ಎಂಬುದು ಹಲವರಿಗೆ ತಿಳಿದಿಲ್ಲ.

ಊಟದ ಮಧ್ಯೆ ನೀರು ಕುಡಿಯುವುದರಿಂದ ಹಿಡಿದು, ಒಂದೇ ಬಾರಿಗೆ ಅತಿಯಾಗಿ ನೀರು ಕುಡಿಯುವವರೆಗೆ ನಮ್ಮಲ್ಲಿ ಹಲವು ತಪ್ಪು ಹವ್ಯಾಸಗಳಿವೆ.

1. ದಿನದ ಆರಂಭ ಬೆಚ್ಚಗಿನ ನೀರಿನಿಂದ ಇರಲಿ
ಬೆಳಿಗ್ಗೆ ಎದ್ದ ತಕ್ಷಣ ಸುಮಾರು 200 ಮಿ.ಲೀ ಬೆಚ್ಚಗಿನ ನೀರನ್ನು ಕುಡಿಯಲು ಜಂಗ್ಡಾ ಶಿಫಾರಸು ಮಾಡುತ್ತಾರೆ. ಬೆಳಗಿನ ಜಾವ ತಣ್ಣೀರು ಕುಡಿಯುವುದರಿಂದ ಜೀರ್ಣಕಾರಿ ಶಕ್ತಿ (ಅಗ್ನಿ) ಮಂದಗತಿಯಾಗಬಹುದು. ಈ ಬೆಚ್ಚಗಿನ ನೀರಿಗೆ ಸ್ವಲ್ಪ ಶುಂಠಿ, ಕಲ್ಲು ಉಪ್ಪು ಮತ್ತು ಒಂದು ಚಿಟಿಕೆ ದಾಲ್ಚಿನ್ನಿ ಸೇರಿಸುವುದರಿಂದ ಚಯಾಪಚಯ ಕ್ರಿಯೆ (Metabolism) ಉತ್ತಮಗೊಳ್ಳುತ್ತದೆ.

2. ಸ್ನಾನ ಮಾಡುವ ಮುನ್ನ ಒಂದು ಲೋಟ ನೀರು ಕುಡಿಯಿರಿ
ಸ್ನಾನ ಮಾಡಲು ಹೋಗುವ ಮುನ್ನ ಒಂದು ಲೋಟ ನೀರು ಕುಡಿಯುವ ಅಭ್ಯಾಸ ಮಾಡಿಕೊಳ್ಳಿ. ಇದು ದೇಹದಲ್ಲಿ ರಕ್ತ ಪರಿಚಲನೆಯನ್ನು ಸುಧಾರಿಸಲು ಸಹಾಯ ಮಾಡುತ್ತದೆ ಮತ್ತು ಸ್ನಾನದ ಸಮಯದಲ್ಲಿ ತಲೆತಿರುಗುವಿಕೆ ಅಥವಾ ಮೂರ್ಛೆ ಹೋಗುವುದನ್ನು ತಡೆಯುತ್ತದೆ.

3. ಊಟದ ಸಮಯದಲ್ಲಿ ನೀರು ಕುಡಿಯಬೇಡಿ
ಪ್ರಮುಖ ಸಲಹೆ: ಊಟ ಮಾಡುವಾಗ ಮಧ್ಯದಲ್ಲಿ ನೀರು ಕುಡಿಯುವುದನ್ನು ತಪ್ಪಿಸಿ. ಇದು ಜೀರ್ಣಕಾರಿ ಕಿಣ್ವಗಳನ್ನು (Enzymes) ದುರ್ಬಲಗೊಳಿಸುತ್ತದೆ ಮತ್ತು ಹೊಟ್ಟೆ ಉಬ್ಬರಕ್ಕೆ ಕಾರಣವಾಗಬಹುದು. ಬದಲಿಗೆ, ಊಟಕ್ಕೆ 30 ನಿಮಿಷಗಳ ಮೊದಲು ಒಂದು ಲೋಟ ನೀರು ಮತ್ತು ಊಟ ಮುಗಿದ ಒಂದು ಗಂಟೆಯ ನಂತರ ಮತ್ತೊಂದು ಲೋಟ ನೀರು ಕುಡಿಯುವುದು ಉತ್ತಮ.

4. ದಿನವಿಡೀ ಸಿಪ್ ಮಾಡ್ತಾ ನೀರು ಕುಡಿಯಿರಿ
ಒಂದೇ ಬಾರಿಗೆ ಲೀಟರ್ಗಟ್ಟಲೆ ನೀರನ್ನು ಗಟಗಟ ಕುಡಿಯುವ ಬದಲು, ದಿನವಿಡೀ ಸ್ವಲ್ಪ ಸ್ವಲ್ಪವಾಗಿ (ಸಿಪ್ ಮಾಡುತ್ತಾ) ನೀರು ಕುಡಿಯಿರಿ. ಸಂಜೆ 4 ಗಂಟೆಯ ಒಳಗೆ ಸುಮಾರು 1.5 ಲೀಟರ್ ನೀರನ್ನು ಮತ್ತು ಸೂರ್ಯಾಸ್ತದ ವೇಳೆಗೆ ಇನ್ನೊಂದು ಅರ್ಧ ಲೀಟರ್ ನೀರನ್ನು ಕುಡಿದು ಮುಗಿಸಲು ಅವರು ಸಲಹೆ ನೀಡುತ್ತಾರೆ. ಸೂರ್ಯಾಸ್ತದ ನಂತರ ತೀರಾ ಬಾಯಾರಿಕೆಯಾದರೆ ಮಾತ್ರ ಸ್ವಲ್ಪ ಸ್ವಲ್ಪವೇ ನೀರು ಕುಡಿಯಿರಿ.

5. ಮಲಗುವ ಮುನ್ನ ಎಷ್ಟು ನೀರು ಕುಡಿಯಬೇಕು?
ರಾತ್ರಿ ಮಲಗುವ ಮುನ್ನ ಅತಿಯಾಗಿ ನೀರು ಕುಡಿಯಬಾರದು. ಬೆಡ್ಗೆ ಹೋಗುವ ಮುನ್ನ ಕೇವಲ ಅರ್ಧ ಲೋಟ ನೀರು ಕುಡಿಯುವುದು ಸೂಕ್ತ.

ಆರೋಗ್ಯಕರ ಜೀವನಕ್ಕೆ ಕೇವಲ ನೀರು ಕುಡಿಯುವುದು ಮುಖ್ಯವಲ್ಲ, ಅದನ್ನು ಯಾವಾಗ ಮತ್ತು ಹೇಗೆ ಕುಡಿಯುತ್ತೇವೆ ಎಂಬುದು ಅಷ್ಟೇ ಮುಖ್ಯ. ಆಯುರ್ವೇದದ ಈ ಸರಳ ನಿಯಮಗಳನ್ನು ಪಾಲಿಸುವ ಮೂಲಕ ನಾವು ನಮ್ಮ ಜೀರ್ಣಕ್ರಿಯೆ ಮತ್ತು ಒಟ್ಟಾರೆ ಆರೋಗ್ಯವನ್ನು ಉತ್ತಮವಾಗಿಟ್ಟುಕೊಳ್ಳಬಹುದು.