ಮಳೆಗಾಲದಲ್ಲಿ ಕಾಡುವ ಕೂದಲು ಉದುರುವಿಕೆ ಸಮಸ್ಯೆ: ಇಲ್ಲಿದೆ ತಡೆಗಟ್ಟಲು ಸುಲಭ ಉಪಾಯಗಳು!

ಮಳೆಗಾಲದ ಆರಂಭವಾಗುತ್ತಿದ್ದಂತೆ ಹಲವರನ್ನು ಕಾಡುವ ಮುಖ್ಯ ಸಮಸ್ಯೆ ಎಂದರೆ ಅದು ಕೂದಲು ಉದುರುವುದು. ಮಳೆಗಾಲದಲ್ಲಿ ವಾತಾವರಣದಲ್ಲಿ ಕಂಡುಬರುವ ಅತಿಯಾದ ಆರ್ದ್ರತೆ ಅಥವಾ ತೇವಾಂಶವು ಕೂದಲಿನ ಬೇರುಗಳನ್ನು ದುರ್ಬಲಗೊಳಿಸುತ್ತದೆ. ಇದರಿಂದಾಗಿ ಕೂದಲು ಬೇಗನೆ ಉದುರಲು ಮತ್ತು ತುಂಡಾಗಲು ಪ್ರಾರಂಭಿಸುತ್ತದೆ. ಈ ವಾತಾವರಣದಲ್ಲಿ ನಿಮ್ಮ ಕೂದಲಿನ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಮತ್ತು ಕೂದಲು ಉದುರುವುದನ್ನು ತಡೆಯಲು ಕೆಲವು ಸರಳ ಹಾಗೂ ಪರಿಣಾಮಕಾರಿ ಸಲಹೆಗಳು ಇಲ್ಲಿವೆ.

ನೆತ್ತಿಯನ್ನು ಸ್ವಚ್ಛವಾಗಿಡಿ: ತಲೆಯಲ್ಲಿ ಬೆವರು ಮತ್ತು ಧೂಳು ಸಂಗ್ರಹವಾಗದಂತೆ ನಿಯಮಿತವಾಗಿ ತಲೆ ತೊಳೆಯಿರಿ. ಇದು ನೆತ್ತಿಯ ಭಾಗವನ್ನು ಸ್ವಚ್ಛವಾಗಿಡಲು ನೆರವಾಗುತ್ತದೆ.

ಒದ್ದೆ ಕೂದಲನ್ನು ಕಟ್ಟಬೇಡಿ: ತಲೆ ತೊಳೆದ ತಕ್ಷಣ ಅಥವಾ ಕೂದಲು ಒದ್ದೆಯಾಗಿದ್ದಾಗ ಎಂದಿಗೂ ಕೂದಲನ್ನು ಕಟ್ಟಬೇಡಿ. ಕೂದಲು ಒದ್ದೆಯಾಗಿದ್ದಾಗ ಕಟ್ಟುವುದರಿಂದ ಕೂದಲು ತುಂಡಾಗುವ ಸಾಧ್ಯತೆ ಹೆಚ್ಚು, ಜೊತೆಗೆ ನೆತ್ತಿಯಲ್ಲಿ ಶಿಲೀಂಧ್ರ (Fungal) ಸೋಂಕು ಉಂಟಾಗಬಹುದು.

ಮಿತವಾಗಿ ಎಣ್ಣೆ ಮಸಾಜ್ ಮಾಡಿ: ವಾರಕ್ಕೊಮ್ಮೆ ನೆತ್ತಿಗೆ ಎಣ್ಣೆ ಹಚ್ಚಿ ಮೃದುವಾಗಿ ಮಸಾಜ್ ಮಾಡಿ. ಆದರೆ ಅತಿಯಾಗಿ ಎಣ್ಣೆ ಹಚ್ಚಬೇಡಿ, ಏಕೆಂದರೆ ಹೆಚ್ಚು ಎಣ್ಣೆ ಹಚ್ಚುವುದರಿಂದ ವಾತಾವರಣದಲ್ಲಿರುವ ಧೂಳು ಸುಲಭವಾಗಿ ಕೂದಲಿಗೆ ಅಂಟಿಕೊಳ್ಳುತ್ತದೆ.

ಪ್ರೋಟೀನ್ ಭರಿತ ಆಹಾರ ಸೇವಿಸಿ: ನಿಮ್ಮ ದೈನಂದಿನ ಆಹಾರದಲ್ಲಿ ಮೊಟ್ಟೆ, ಪನೀರ್, ಮೀನು ಅಥವಾ ಧಾನ್ಯಗಳಂತಹ ಪ್ರೋಟೀನ್ ಹೆಚ್ಚಿರುವ ಆಹಾರಗಳನ್ನು ಸೇರಿಸಿ. ಪ್ರೋಟೀನ್ ದುರ್ಬಲವಾಗಿರುವ ಕೂದಲಿನ ಎಳೆಗಳನ್ನು ಗಟ್ಟಿಗೊಳಿಸಲು ಸಹಾಯ ಮಾಡುತ್ತದೆ.

ಮೃದುವಾದ ಶಾಂಪೂ ಬಳಸಿ: ನಿಯಮಿತವಾಗಿ ತಲೆ ತೊಳೆಯಲು ರಾಸಾಯನಿಕಗಳು ಕಡಿಮೆ ಇರುವ ಮೃದುವಾದ ಶಾಂಪೂಗಳನ್ನು ಆಯ್ಕೆ ಮಾಡಿಕೊಳ್ಳಿ. ಇದು ಕೂದಲಿನ ನೈಸರ್ಗಿಕ ತೈಲಾಂಶವನ್ನು ಹಾನಿ ಮಾಡದೆ ಸ್ವಚ್ಛಗೊಳಿಸುತ್ತದೆ.

ಹೀಟ್ ಸ್ಟೈಲಿಂಗ್‌ಗೆ ಬ್ರೇಕ್ ಹಾಕಿ: ಮಳೆಗಾಲದಲ್ಲಿ ಹೇರ್ ಡ್ರೈಯರ್ ಮತ್ತು ಸ್ಟ್ರೈಟನರ್‌ಗಳಂತಹ ಬಿಸಿಯಾದ ಉಪಕರಣಗಳ ಅತಿಯಾದ ಬಳಕೆಯನ್ನು ತಪ್ಪಿಸಿ. ಕೂದಲಿಗೆ ಶಾಖದ ಕೃತಕ ಸ್ಪರ್ಶ ಕಡಿಮೆ ಇದ್ದಷ್ಟೂ ಕೂದಲು ಆರೋಗ್ಯಕರ ಮತ್ತು ಬಲವಾಗಿರುತ್ತದೆ.

ಹೆಚ್ಚು ನೀರು ಕುಡಿಯಿರಿ: ದಿನವಿಡೀ ಸಾಕಷ್ಟು ನೀರು ಕುಡಿಯುವುದನ್ನು ಮರೆಯಬೇಡಿ. ದೇಹದಲ್ಲಿ ನೀರಿನಂಶ ಚೆನ್ನಾಗಿದ್ದರೆ ಅದು ಕೂದಲಿನ ಆರೋಗ್ಯಕರ ಬೆಳವಣಿಗೆಗೆ ನೆರವಾಗುತ್ತದೆ.

ಈ ಸರಳ ಬದಲಾವಣೆಗಳನ್ನು ನಿಮ್ಮ ದಿನಚರಿಯಲ್ಲಿ ಅಳವಡಿಸಿಕೊಳ್ಳುವ ಮೂಲಕ ಮಳೆಗಾಲದಲ್ಲೂ ನಿಮ್ಮ ಕೂದಲಿನ ಸೌಂದರ್ಯ ಮತ್ತು ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು.