ಬ್ರಿಟಿಷ್ ಕಾಲದ ಪದ್ಧತಿಗಳಿಗೆ ಬ್ರೇಕ್ ; ಭಾರತೀಯ ಸೇನೆಯಿಂದ ಹೊಸ ಸಮವಸ್ತ್ರ ಸಂಹಿತೆ ಜಾರಿ!

ದೆಹಲಿ: ಭಾರತೀಯ ಸೇನೆಯು ತನ್ನ ಹಳೆಯ ಬ್ರಿಟಿಷ್ ಕಾಲದ ಸಂಪ್ರದಾಯಗಳನ್ನು ಬದಿಗೊತ್ತಿ, ಹೊಸ ಸಮವಸ್ತ್ರ ಸಂಹಿತೆಯನ್ನು ಜಾರಿಗೆ ತಂದಿದೆ. ಇನ್ನು ಮುಂದೆ ಔಪಚಾರಿಕ ಕಾರ್ಯಕ್ರಮಗಳಲ್ಲಿ ಮುಚ್ಚಿದ ಕೊರಳಿನ ‘ಬಂಡಿ ಜಾಕೆಟ್’ ಧರಿಸಲು ಅನುಮತಿ ನೀಡಲಾಗಿದ್ದು, ಸಾಂಪ್ರದಾಯಿಕ ಪೌಚ್ ಬೆಲ್ಟ್ಗಳನ್ನು ತೆಗೆದುಹಾಕಲಾಗಿದೆ. ಅಷ್ಟೇ ಅಲ್ಲದೆ, ಪರೇಡ್ಗಳ ಪರಿಶೀಲನೆ ನಡೆಸುವ ಅಧಿಕಾರಿಗಳು ಕತ್ತಿ (ಸ್ವೋರ್ಡ್) ಹಿಡಿಯುವುದನ್ನು ಕಡ್ಡಾಯದಿಂದ ಐಚ್ಛಿಕಗೊಳಿಸಲಾಗಿದೆ.

ಎಂಟು ವರ್ಷಗಳ ಸುದೀರ್ಘ ಅವಧಿಯ ನಂತರ ಸೇನೆಯು “ಆರ್ಮಿ ಯುನಿಫಾರ್ಮ್ಸ್-2026” (Army Uniforms-2026) ಹೆಸರಿನ 174 ಪುಟಗಳ ಹೊಸ ಕೈಪಿಡಿಯನ್ನು ಬಿಡುಗಡೆ ಮಾಡಿದ್ದು, ಅದರಲ್ಲಿ ಈ ಮಹತ್ವದ ಬದಲಾವಣೆಗಳನ್ನು ಉಲ್ಲೇಖಿಸಲಾಗಿದೆ.

ದೇಶದ ಭಾವನೆಗಳು ಮತ್ತು ಸಾರ್ವಭೌಮ ಗುರುತಿಗೆ ಅನುಗುಣವಾಗಿ ಈ ಪರಿಷ್ಕರಣೆಗಳನ್ನು ಮಾಡಲಾಗಿದೆ. ಭಾರತೀಯ ಸೇನೆಯ ಘನತೆ, ಕಾರ್ಯಕ್ಷಮತೆ ಮತ್ತು ಸುದೀರ್ಘ ಸಂಪ್ರದಾಯಗಳನ್ನು ಕಾಯ್ದುಕೊಳ್ಳುತ್ತಲೇ, ಬ್ರಿಟಿಷ್ ಕಾಲದ ಉಳಿಕೆಗಳನ್ನು ತೆಗೆದುಹಾಕುವ ಪ್ರಗತಿಪರ ಹೆಜ್ಜೆ ಇದಾಗಿದೆ ಎಂದು ಕೈಪಿಡಿಯ ‘ಇಂಡಿಜನೈಸೇಶನ್ ಆಂಡ್ ಅಲೈನ್ಮೆಂಟ್ ವಿತ್ ನ್ಯಾಷನಲ್ ಎಥೋಸ್’ ವಿಭಾಗದಲ್ಲಿ ತಿಳಿಸಲಾಗಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಗುಜರಾತ್ನ ಕೆವಾಡಿಯಾದಲ್ಲಿ ನಡೆದ ಕಮಾಂಡರ್ಗಳ ಸಮ್ಮೇಳನದಲ್ಲಿ ವಸಾಹತುಶಾಹಿ ಪದ್ಧತಿಗಳನ್ನು ಕೈಬಿಟ್ಟು, ಭಾರತೀಯ ಸಿದ್ಧಾಂತ ಮತ್ತು ಪದ್ಧತಿಗಳನ್ನು ಅಳವಡಿಸಿಕೊಳ್ಳಲು ಕರೆ ನೀಡಿದ್ದರು. ಅದರ ಮುಂದುವರಿದ ಭಾಗವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ.

ಎಲ್ಲಾ ಶ್ರೇಣಿಯ ಸೈನಿಕರಿಗಾಗಿ ‘3B’ ಹೆಸರಿನ ಹೊಸ ಚಳಿಗಾಲದ ಸಮವಸ್ತ್ರವನ್ನು ಪರಿಚಯಿಸಲಾಗಿದೆ. ಇದು ಅಂಗೋಲಾ ಶರ್ಟ್, ಬ್ಯಾಟಲ್ ಜಾಕೆಟ್ ಮತ್ತು ಬೆರೆಟ್ (ಟೋಪಿ) ಅನ್ನು ಒಳಗೊಂಡಿರುತ್ತದೆ.ಅಧಿಕಾರಿಗಳು ಇನ್ನು ಮುಂದೆ ಬಂದ್ಗಲಾ ಅಥವಾ ಸೂಟ್ಗಳ ಜೊತೆಗೆ ತಿಳಿ ಬಣ್ಣದ, ಮುಚ್ಚಿದ ಕೊರಳಿನ ‘ಬಂಡಿ ಜಾಕೆಟ್’ ಮತ್ತು ಅದಕ್ಕೆ ಹೊಂದುವ ಟ್ರೌಸರ್ ಧರಿಸಬಹುದು.

ಮಹಿಳಾ ಅಧಿಕಾರಿಗಳ ಉಡುಪು

ಮಹಿಳಾ ಅಧಿಕಾರಿಗಳಿಗೆ ತಿಳಿ ಬಣ್ಣದ ಸೀರೆ ಅಥವಾ ಕುರ್ತಾ-ಸಲ್ವಾರ್ ಮತ್ತು ಆಂಕಲ್-ಲೆಂತ್ ಸ್ಟ್ರೈಟ್ ಪ್ಯಾಂಟ್ ಧರಿಸಲು ಅನುಮತಿ ನೀಡಲಾಗಿದೆ. ಆದರೆ ಸ್ಲೀವ್ಲೆಸ್ ಕುರ್ತಾಗಳು, ಪ್ಲಾಜೋ ಮತ್ತು ಸಿಗರೇಟ್ ಪ್ಯಾಂಟ್ಗಳನ್ನು ಕಡ್ಡಾಯವಾಗಿ ನಿಷೇಧಿಸಲಾಗಿದೆ. ಸ್ಟೇಟ್ ಬ್ಯಾಂಕ್ವೆಟ್ಗಳು ಮತ್ತು ರಾಜಭವನದ ಔಪಚಾರಿಕ ಕಾರ್ಯಕ್ರಮಗಳಲ್ಲಿ ಧರಿಸಲಾಗುತ್ತಿದ್ದ ‘ಡ್ರೆಸ್ ನಂ. 5 ಮತ್ತು 6’ ರಿಂದ ಪೌಚ್ ಬೆಲ್ಟ್ಗಳನ್ನು ತೆಗೆದುಹಾಕಲಾಗಿದೆ. ಪದಗಳ ಬದಲಾವಣೆ: ಬ್ರಿಟಿಷ್ ಕಾಲದ ‘ರಾಯಲ್’ ನಂತಹ ಹಳೆಯ ಪದಬಳಕೆಗಳನ್ನು ಕೈಬಿಡಲಾಗಿದೆ.