ಕೇರಳದ ಪ್ರಸಿದ್ಧ ಕೊಟ್ಟಿಯೂರು ಕ್ಷೇತ್ರದಲ್ಲಿ ಕರ್ನಾಟಕ ಭಕ್ತರಿಗೆ ಅನ್ಯಾಯವೇ?

ದಟ್ಟ ಅರಣ್ಯ, ಹರಿಯುವ ನದಿಯ ತಟ ಮತ್ತು ಪ್ರಕೃತಿಯ ಮಡಿಲಿನಲ್ಲಿ ನೆಲೆಸಿರುವ ಕೇರಳದ ಪ್ರಸಿದ್ಧ ಕೊಟ್ಟಿಯೂರು ಶಿವಕ್ಷೇತ್ರ ಸದ್ಯ ಭಕ್ತರ ಆಕರ್ಷಣೆಯ ಕೇಂದ್ರವಾಗಿದೆ. ವರ್ಷದಲ್ಲಿ ಕೇವಲ 27 ದಿನಗಳ ಕಾಲ ಮಾತ್ರ ಭಕ್ತರ ದರ್ಶನಕ್ಕೆ ತೆರೆದಿರುವ ಈ ಪವಿತ್ರ ಕ್ಷೇತ್ರದಲ್ಲಿ ವೈಶಾಖ ಮಾಸದ ವಿಶೇಷ ಪೂಜೆಗಳು ನಡೆಯುತ್ತಿದ್ದು, ಸಾವಿರಾರು ಭಕ್ತರು ಭೇಟಿ ನೀಡುತ್ತಿದ್ದಾರೆ. ಇದೇ ವೇಳೆ ದರ್ಶನ ವ್ಯವಸ್ಥೆಯಲ್ಲಿ ಕರ್ನಾಟಕದ ಭಕ್ತರಿಗೆ ಅನ್ಯಾಯವಾಗುತ್ತಿದೆ ಎಂಬ ಆರೋಪವೂ ಕೇಳಿಬಂದಿದೆ.

ಕೊಟ್ಟಿಯೂರು ಕ್ಷೇತ್ರವು ಇಕ್ಕರೆ ಕೊಟ್ಟಿಯೂರು ಮತ್ತು ಅಕ್ಕರೆ ಕೊಟ್ಟಿಯೂರು ಎಂಬ ಎರಡು ಭಾಗಗಳನ್ನು ಹೊಂದಿದೆ. ಇಕ್ಕರೆ ಭಾಗವು ವರ್ಷಪೂರ್ತಿ ತೆರೆದಿರುತ್ತದೆ. ಆದರೆ ಅಕ್ಕರೆ ಕೊಟ್ಟಿಯೂರು ಅತ್ಯಂತ ವಿಶೇಷವಾಗಿದ್ದು, ವೈಶಾಖ ಮಾಸದ ನಿರ್ದಿಷ್ಟ 27 ದಿನಗಳ ಅವಧಿಯಲ್ಲಿ ಮಾತ್ರ ಭಕ್ತರಿಗೆ ಪ್ರವೇಶ ನೀಡಲಾಗುತ್ತದೆ. ಈ ಅವಧಿ ಮುಗಿದ ಬಳಿಕ ಅರಣ್ಯ ಪ್ರದೇಶಕ್ಕೆ ಸಾಮಾನ್ಯರ ಪ್ರವೇಶ ಸಂಪೂರ್ಣ ನಿಷೇಧಿಸಲಾಗುತ್ತದೆ.

ಪುರಾಣಗಳ ಪ್ರಕಾರ, ಸತಿ ದೇವಿ ಅಗ್ನಿಕುಂಡಕ್ಕೆ ಹಾರಿ ದೇಹತ್ಯಾಗ ಮಾಡಿದ ಸ್ಥಳವೇ ಕೊಟ್ಟಿಯೂರು ಎನ್ನಲಾಗುತ್ತದೆ. ಸತಿ ದೇವಿ ಕುಳಿತಿದ್ದ ಪೀಠದ ಸಂಕೇತವೆಂದು ನಂಬಲಾಗುವ ಕುರುಹು ಇಂದಿಗೂ ಇಲ್ಲಿ ಇದೆ. ಅಲ್ಲದೆ, ನದಿಯಲ್ಲಿ ಸಿಗುವ ಕೆಲವು ವಿಶಿಷ್ಟ ಕಲ್ಲುಗಳನ್ನು ಉಜ್ಜಿದಾಗ ಶ್ರೀಗಂಧದ ಪರಿಮಳ ಬರುವುದರಿಂದ ಭಕ್ತರು ಅವುಗಳನ್ನು ಪವಿತ್ರವೆಂದು ಪೂಜಿಸುತ್ತಾರೆ.ಅಪಾರ ಚಿನ್ನಾಭರಣ ಮತ್ತು ಬೆಲೆಬಾಳುವ ವಸ್ತುಗಳ ಸಂಗ್ರಹ ಹೊಂದಿರುವ ಈ ಕ್ಷೇತ್ರವನ್ನು ಕೇರಳದ ಪ್ರಮುಖ ಶ್ರೀಮಂತ ದೇವಾಲಯಗಳಲ್ಲಿ ಒಂದೆಂದು ಪರಿಗಣಿಸಲಾಗುತ್ತದೆ. ಆನೆಗಳ ಮೆರವಣಿಗೆ, ಸಂಪ್ರದಾಯಬದ್ಧ ಆಚರಣೆಗಳು ಹಾಗೂ ಪ್ರಕೃತಿ ಸೌಂದರ್ಯ ಭಕ್ತರನ್ನು ವಿಶೇಷವಾಗಿ ಸೆಳೆಯುತ್ತವೆ.

ಆದರೆ, ಕರ್ನಾಟಕದಿಂದ ಆಗಮಿಸುವ ಭಕ್ತರು ದರ್ಶನ ವ್ಯವಸ್ಥೆಯ ಕುರಿತು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಕನ್ನಡಿಗರನ್ನು ಸಾಮಾನ್ಯ ಸರತಿ ಸಾಲಿನಲ್ಲಿ ದೀರ್ಘ ಸಮಯ ಕಾಯಿಸಲಾಗುತ್ತಿದ್ದು, ಸ್ಥಳೀಯ ಭಕ್ತರಿಗೆ ಆದ್ಯತೆ ನೀಡಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಕ್ಷೇತ್ರದ ಪ್ರಸಿದ್ಧಿ ಹಾಗೂ ಪ್ರವಾಸೋದ್ಯಮದ ಬೆಳವಣಿಗೆಯಲ್ಲಿ ಕರ್ನಾಟಕದ ಭಕ್ತರ ಪಾತ್ರವೂ ಮಹತ್ವದ್ದಾಗಿದ್ದರೂ, ಅವರಿಗೆ ಸಮಾನ ಗೌರವ ಮತ್ತು ಸೌಲಭ್ಯ ಸಿಗುತ್ತಿಲ್ಲ ಎಂದು ಕೆಲವರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.