ರಾಜ್ಯ ಸರ್ಕಾರಿ ನೌಕರರಿಗೆ ನಿವೃತ್ತಿ ಹಿಂದಿನ ದಿನದ ವಾರ್ಷಿಕ ವೇತನ ಬಡ್ತಿ ಮಂಜೂರಾತಿಗೆ ಸರ್ಕಾರ ಆದೇಶ!

ಬೆಂಗಳೂರು: ರಾಜ್ಯ ಸರ್ಕಾರಿ ನೌಕರರಿಗೆ ಕರ್ನಾಟಕ ಸರ್ಕಾರವು ಭರ್ಜರಿ ಸಿಹಿ ಸುದ್ದಿಯೊಂದನ್ನು ನೀಡಿದೆ. ವಾರ್ಷಿಕ ವೇತನ ಬಡ್ತಿ (Increment) ಪ್ರಾಪ್ತವಾಗುವ ದಿನಾಂಕದ ಕೇವಲ ಒಂದು ದಿನದ ಮುಂಚೆ ಸೇವೆಯಿಂದ ನಿವೃತ್ತಿ ಹೊಂದುವ ನೌಕರರಿಗೆ ಪಿಂಚಣಿ ಲೆಕ್ಕಾಚಾರದ ಉದ್ದೇಶಕ್ಕಾಗಿ ಒಂದು ‘ಕಾಲ್ಪನಿಕ’ (Notional) ವಾರ್ಷಿಕ ವೇತನ ಬಡ್ತಿಯನ್ನು ಮಂಜೂರು ಮಾಡಿ ರಾಜ್ಯ ಸರ್ಕಾರವು ಮಹತ್ವದ ಅಧಿಕೃತ ಆದೇಶ ಹೊರಡಿಸಿದೆ.

ಸರ್ಕಾರದ ಆರ್ಥಿಕ ಇಲಾಖೆಯ (ಸೇವೆಗಳು-1) ಉಪ ಕಾರ್ಯದರ್ಶಿಗಳಾದ ಎನ್. ವನಿತಾ ಅವರು ಜೂನ್ 4, 2026 ರಂದು ಈ ಕುರಿತು ಅಧಿಕೃತ ಆದೇಶ ಹೊರಡಿಸಿದ್ದಾರೆ. ಇದುವರೆಗೆ ಜಾರಿಯಲ್ಲಿದ್ದ ಕರ್ನಾಟಕ ನಾಗರಿಕ ಸೇವಾ ನಿಯಮಾವಳಿಯ ನಿಯಮ 51(1) ರ ಪ್ರಕಾರ, ವಾರ್ಷಿಕ ವೇತನ ಬಡ್ತಿಯು “ಅದನ್ನು ಗಳಿಸಿದ ದಿನದ ಮರುದಿನದಿಂದ” ಜಾರಿಗೆ ಬರುತ್ತಿತ್ತು. ಇದರಿಂದಾಗಿ, ಒಂದು ವರ್ಷದ ಅರ್ಹತಾದಾಯಕ ಸೇವೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದರೂ, ವೇತನ ಬಡ್ತಿ ಸಿಗುವ ಹಿಂದಿನ ದಿನವೇ ನಿವೃತ್ತಿ ಹೊಂದುವ ನೌಕರರು ಕೇವಲ ಒಂದು ದಿನದ ತಾಂತ್ರಿಕತೆಯ ಕಾರಣದಿಂದಾಗಿ ತಾವು ಗಳಿಸಿದ ಕೊನೆಯ ಇನ್ಕ್ರಿಮೆಂಟ್ ಸೌಲಭ್ಯದಿಂದ ವಂಚಿತರಾಗುತ್ತಿದ್ದರು. ಇದು ಅವರ ಪಿಂಚಣಿ (Pension) ಮೊತ್ತದ ಮೇಲೆ ಗಣನೀಯವಾಗಿ ನಕಾರಾತ್ಮಕ ಪರಿಣಾಮ ಬೀರುತ್ತಿತ್ತು.

ಮಾನ್ಯ ಸರ್ವೋಚ್ಚ ನ್ಯಾಯಾಲಯವು ವಿವಿಧ ಪ್ರಕರಣಗಳಲ್ಲಿ (ಕೆ.ಪಿ.ಟಿ.ಸಿ.ಎಲ್. ವಿರುದ್ಧ ಸಿ. ಪಿ. ಮುಂದಿನಮನಿ ಮತ್ತು ಭಾರತ ಸರ್ಕಾರ ವಿರುದ್ಧ ಎಂ. ಸಿದ್ದರಾಜು) “ವಾರ್ಷಿಕ ವೇತನ ಬಡ್ತಿಯು ಒಂದು ವರ್ಷದ ತೃಪ್ತಿಕರ ಸೇವೆಗಾಗಿ ಗಳಿಸುವ ಸೌಲಭ್ಯವಾಗಿದೆ. ಕೇವಲ ಬಡ್ತಿ ದೊರೆಯುವ ದಿನ ನೌಕರನು ಸೇವೆಯಲ್ಲಿಲ್ಲ ಎಂಬ ಕಾರಣಕ್ಕೆ ಅದನ್ನು ನಿರಾಕರಿಸುವುದು ಸರಿಯಲ್ಲ” ಎಂದು ಸ್ಪಷ್ಟಪಡಿಸಿತ್ತು. ಇದೇ ಹಾದಿಯಲ್ಲಿ ಕರ್ನಾಟಕ ರಾಜ್ಯ ಆಡಳಿತ ನ್ಯಾಯಮಂಡಳಿಯು (KSAT) ತಹಸೀಲ್ದಾರ್ (ನಿವೃತ್ತ) ಶ್ರೀ ಕೆ. ಸಿದ್ದರಾಜು ಅವರ ಅರ್ಜಿಗೆ ಸಂಬಂಧಿಸಿದಂತೆ ಪಿಂಚಣಿ ಲೆಕ್ಕಾಚಾರಕ್ಕಾಗಿ ಕಾಲ್ಪನಿಕ ವೇತನ ಬಡ್ತಿ ನೀಡುವಂತೆ ಸರ್ಕಾರಕ್ಕೆ ಆದೇಶಿಸಿತ್ತು. ಈ ಎಲ್ಲಾ ತೀರ್ಪುಗಳನ್ನು ಪರಿಶೀಲಿಸಿ, ಸಂವಿಧಾನದ ಅನುಚ್ಛೇದ 14 ರ ಸಮಾನತೆಯ ತತ್ವದ ಅಡಿಯಲ್ಲಿ ರಾಜ್ಯ ಸರ್ಕಾರವು ಈಗ ಈ ಸಮಗ್ರ ನೀತಿಯನ್ನು ರೂಪಿಸಿದೆ.

ಯಾರಿಗೆ ಅನ್ವಯ? ಪ್ರಮುಖ ಷರತ್ತುಗಳೇನು?

ಸರ್ಕಾರದ ಈ ನೂತನ ಆದೇಶವು ಕೆಲವು ಪ್ರಮುಖ ನಿಯಮ ಹಾಗೂ ಷರತ್ತುಗಳಿಗೆ ಒಳಪಟ್ಟಿರಲಿದೆ. ಪಿಂಚಣಿ ಲೆಕ್ಕಾಚಾರಕ್ಕೆ ಮಾತ್ರ ಸೀಮಿತ: ಈ ಕಾಲ್ಪನಿಕ ವಾರ್ಷಿಕ ವೇತನ ಬಡ್ತಿಯನ್ನು ನೌಕರನ ಕೊನೆಯ ವೇತನಕ್ಕೆ ಸೇರಿಸಿ ಕೇವಲ ಮಾಸಿಕ ಪಿಂಚಣಿ ಲೆಕ್ಕಾಚಾರದ ಉದ್ದೇಶಕ್ಕಾಗಿ ಮಾತ್ರ ಪರಿಗಣಿಸಲಾಗುವುದು.

ಇತರ ಸೌಲಭ್ಯಗಳಿಗೆ ಅನ್ವಯಿಸಲ್ಲ: ಇದನ್ನು ನಿವೃತ್ತಿ ಉಪಧನ (DCRG), ಪರಿವರ್ತಿತ ಪಿಂಚಣಿ (Commutation), ಅಥವಾ ಗಳಿಕೆ ರಜೆ ನಗದೀಕರಣ (Encashment) ಸೇರಿದಂತೆ ಬೇರೆ ಯಾವುದೇ ನಿವೃತ್ತಿ/ಸೇವಾಂತ್ಯ ಸೌಲಭ್ಯಗಳ ಲೆಕ್ಕಾಚಾರಕ್ಕೆ ಬಳಸುವಂತಿಲ್ಲ.
ಭವಿಷ್ಯವರ್ತಿ ಅನ್ವಯ (No Arrears): ಈ ಆದೇಶದ ಆರ್ಥಿಕ ಪ್ರಯೋಜನವು ಆದೇಶ ಹೊರಬಿದ್ದ ದಿನಾಂಕದಿಂದ (ಜೂನ್ 4, 2026) ಭವಿಷ್ಯವರ್ತಿಯಾಗಿ ಜಾರಿಗೆ ಬರಲಿದೆ. ಯಾವುದೇ ಹಿಂದಿನ ಅವಧಿಯ ವೇತನ ಬಾಕಿ ಅಥವಾ ಪಿಂಚಣಿ ಬಾಕಿಯನ್ನು ಪಾವತಿಸಲು ಅವಕಾಶವಿರುವುದಿಲ್ಲ. ಅರ್ಹ ಪಿಂಚಣಿದಾರರು ಮೃತಪಟ್ಟಿದ್ದಲ್ಲಿ ಅವರ ಕುಟುಂಬ ಪಿಂಚಣಿದಾರರಿಗೂ ಇದು ಭವಿಷ್ಯವರ್ತಿಯಾಗಿ ಅನ್ವಯಿಸುತ್ತದೆ.

ವಿನಾಯಿತಿಗಳು: ಸೇವೆಯಲ್ಲಿದ್ದಾಗಲೇ ಮೃತಪಟ್ಟ ಪ್ರಕರಣಗಳು ಹಾಗೂ ಕಡ್ಡಾಯ ನಿವೃತ್ತಿ ದಂಡನೆಗೆ ಒಳಗಾದ ಪ್ರಕರಣಗಳಿಗೆ ಈ ಆದೇಶ ಅನ್ವಯಿಸುವುದಿಲ್ಲ. ಅಲ್ಲದೆ, ‘ಸ್ಥಗಿತ ವೇತನ ಬಡ್ತಿ’ಯನ್ನು (Stagnation Increment) ಈ ಆದೇಶದ ವ್ಯಾಪ್ತಿಯಿಂದ ಹೊರತುಪಡಿಸಲಾಗಿದೆ.

ಈ ಐತಿಹಾಸಿಕ ನಿರ್ಧಾರದಿಂದಾಗಿ ವರ್ಷ ಪೂರ್ತಿ ಸೇವೆ ಸಲ್ಲಿಸಿ ನಿವೃತ್ತಿಯಾಗುವ ರಾಜ್ಯ ಸರ್ಕಾರದ ಸಾವಿರಾರು ನೌಕರರಿಗೆ ನಿವೃತ್ತಿಯ ನಂತರ ಆರ್ಥಿಕ ಭದ್ರತೆ ಸಿಕ್ಕಂತಾಗಲಿದ್ದು, ನೌಕರರ ವಲಯದಲ್ಲಿ ಭಾರೀ ಹರ್ಷ ವ್ಯಕ್ತವಾಗಿದೆ. ಇದಕ್ಕಾಗಿ ಕರ್ನಾಟಕ ನಾಗರಿಕ ಸೇವಾ ನಿಯಮಾವಳಿಗೆ ಸೂಕ್ತ ತಿದ್ದುಪಡಿಯನ್ನು ಶೀಘ್ರದಲ್ಲೇ ಪ್ರತ್ಯೇಕವಾಗಿ ಹೊರಡಿಸಲಾಗುವುದು ಎಂದು ಸರ್ಕಾರ ತಿಳಿಸಿದೆ.