ಸುದ್ದಿಒನ್, ಮೈಸೂರು ಮೇ. 06: ಈ ಬಾರಿಯ ‘ಸ್ವಚ್ಛ ಸರ್ವೇಕ್ಷಣೆ’ಯಲ್ಲಿ ಅಗ್ರಸ್ಥಾನಕ್ಕೇರಲು ಮೈಸೂರು ಮಹಾನಗರ ಪಾಲಿಕೆ (MCC) ಭರ್ಜರಿ ಸಿದ್ಧತೆ ನಡೆಸುತ್ತಿದ್ದು, ನಗರದ ಸ್ವಚ್ಛತೆ ಕಾಪಾಡಲು ಅತ್ಯಂತ ವಿಭಿನ್ನ ಹಾಗೂ ವಿನೂತನ ಪ್ರಯೋಗವೊಂದಕ್ಕೆ ಕೈಹಾಕಿದೆ. ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರ ವಿಸರ್ಜನೆ ಮಾಡುವುದನ್ನು ತಡೆಯಲು ಗೋಡೆಗಳಿಗೆ ಬೃಹತ್ ಕನ್ನಡಿಗಳನ್ನು ಅಳವಡಿಸುವ ಮೂಲಕ ಪಾಲಿಕೆ ಎಲ್ಲರ ಗಮನ ಸೆಳೆಯುತ್ತಿದೆ.
ಪ್ರಾಯೋಗಿಕ ಯೋಜನೆ ಎಲ್ಲಿ?
ನಗರದ ಗ್ರಾಮಾಂತರ ಬಸ್ ನಿಲ್ದಾಣದ ಎದುರಿಗಿರುವ ಸರ್ಕಾರಿ ಅತಿಥಿ ಗೃಹದ (Government Guest House) ಕಾಂಪೌಂಡ್ ಗೋಡೆಯ ಮೇಲೆ ಈ ಕನ್ನಡಿಗಳನ್ನು ಪ್ರಾಯೋಗಿಕವಾಗಿ ಅಳವಡಿಸಲಾಗಿದೆ. ಈ ಪ್ರದೇಶವು ಸದಾ ಜನಜಂಗುಳಿಯಿಂದ ಕೂಡಿರುತ್ತದೆ. ಬಸ್ ನಿಲ್ದಾಣಕ್ಕೆ ಬರುವ ಪ್ರಯಾಣಿಕರು ಮತ್ತು ಹಾದಿಹೋಕರು ಈ ಗೋಡೆಯ ಪಕ್ಕದಲ್ಲಿ ಬಹಿರಂಗವಾಗಿ ಮೂತ್ರ ವಿಸರ್ಜನೆ ಮಾಡುತ್ತಿದ್ದರಿಂದ ಇಡೀ ಪರಿಸರ ದುರ್ನಾತದಿಂದ ಕೂಡಿರುತ್ತಿತ್ತು. ಇದನ್ನು ತಡೆಯಲು ಪಾಲಿಕೆ ಈ ‘ರಿಫ್ಲೆಕ್ಟಿವ್’ ತಂತ್ರವನ್ನು ಬಳಸಿದೆ.
ಕನ್ನಡಿ ಏಕೆ? ಇದರ ಉದ್ದೇಶವೇನು?
ಈ ಯೋಜನೆಯ ಹಿಂದೆ ಮನೋವೈಜ್ಞಾನಿಕ ಕಾರಣವಿದೆ: ಗೋಡೆಗೆ ಅಳವಡಿಸಲಾದ ಕನ್ನಡಿಯ ಮುಂದೆ ಯಾರಾದರೂ ಮೂತ್ರ ವಿಸರ್ಜನೆಗೆ ನಿಂತರೆ, ಅವರಿಗೆ ತಮ್ಮದೇ ಪ್ರತಿಬಿಂಬ ಕಾಣಿಸುತ್ತದೆ. ಕನ್ನಡಿಯಿಂದಾಗಿ ತಾವು ಮಾಡುತ್ತಿರುವ ಕೆಲಸ ಇತರರಿಗೂ ಸ್ಪಷ್ಟವಾಗಿ ಕಾಣುತ್ತಿದೆ ಎಂಬ ಮುಜುಗರ ಉಂಟಾಗಿ, ಜನರು ಅಂತಹ ಕೃತ್ಯದಿಂದ ಹಿಂದೆ ಸರಿಯುತ್ತಾರೆ ಎಂಬುದು ಪಾಲಿಕೆಯ ಆಶಯ.ಕನ್ನಡಿಗಳ ಕೆಳಭಾಗದಲ್ಲಿ ಎಲ್ಇಡಿ (LED) ಬಲ್ಬ್ಗಳನ್ನು ಅಳವಡಿಸಲಾಗಿದ್ದು, ರಾತ್ರಿ ವೇಳೆಯೂ ಈ ಜಾಗವು ಪ್ರಕಾಶಮಾನವಾಗಿರುವಂತೆ ನೋಡಿಕೊಳ್ಳಲಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್
ಮೈಸೂರು ಪಾಲಿಕೆಯ ಈ ಕ್ರಿಯೇಟಿವ್ ಐಡಿಯಾದ ವಿಡಿಯೋ ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಸಕ್ಕತ್ ವೈರಲ್ ಆಗುತ್ತಿದೆ. ನೆಟ್ಟಿಗರು ಪಾಲಿಕೆಯ ಈ ಕ್ರಮಕ್ಕೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.
Great move by the Mysore City Corporation! 🚀
The wall in front of the Suburban Bus Stand, where people used to openly urinate, now features a shiny steel mirror. A clever and effective solution to stop the nuisance!
We hope citizens will now take greater responsibility and help… pic.twitter.com/ktNhKcyetp— ಸನಾತನ (सनातन) (@sanatan_kannada) May 5, 2026
