ಬೆಂಗಳೂರು: 80ರ ದಶಕದ ರೆಟ್ರೋ ಲುಕ್ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೆ ಟ್ರೆಂಡ್ ಆಗಿದೆ. ಈ ಬಾರಿ ಹಳೆಯ ಫೋಟೋಗಳ ಸ್ಟೈಲ್ಗೆ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವೂ ಸಾಥ್ ನೀಡಿದ್ದು, ಬಳಕೆದಾರರು ChatGPT ಸಹಾಯದಿಂದ ತಮ್ಮ ಫೋಟೋಗಳನ್ನು 1980ರ ದಶಕದ ಶೈಲಿಗೆ ಮರುಸೃಷ್ಟಿಸುತ್ತಿದ್ದಾರೆ.
Instagram Storiesನ ‘Add Yours’ ಸ್ಟಿಕ್ಕರ್ ಮೂಲಕ ಈ ಟ್ರೆಂಡ್ ಮತ್ತಷ್ಟು ವೇಗ ಪಡೆದುಕೊಂಡಿದ್ದು, ಜನಸಾಮಾನ್ಯರಿಂದ ಹಿಡಿದು ಸೆಲೆಬ್ರಿಟಿಗಳವರೆಗೆ ಹಲವರು ತಮ್ಮ ರೆಟ್ರೋ ಫೋಟೋಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ನಿರೂಪಕಿ ಅನುಶ್ರೀ, ಗಾಯಕ ಗಣೇಶ್ ಕಾರಂತ್ ಸೇರಿದಂತೆ ಹಲವು ಸೆಲೆಬ್ರಿಟಿಗಳ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿವೆ. ಕ್ರಿಕೆಟ್ ತಾರೆಯರ ರೆಟ್ರೋ ಲುಕ್ಗಳೂ ವೈರಲ್ ಆಗುತ್ತಿವೆ.
ಸಾಮಾನ್ಯ ವಿಂಟೇಜ್ ಫಿಲ್ಟರ್ಗಳು ಫೋಟೋದ ಬಣ್ಣ ಮತ್ತು ಟೆಕ್ಸ್ಚರ್ನಲ್ಲಿ ಮಾತ್ರ ಬದಲಾವಣೆ ಮಾಡುತ್ತವೆ. ಆದರೆ AI ಮೂಲಕ ಫೋಟೋವನ್ನು ಮರುಸೃಷ್ಟಿಸುವಾಗ ಬಟ್ಟೆ, ಕೇಶವಿನ್ಯಾಸ, ಹಿನ್ನೆಲೆ, ಬೆಳಕು ಹಾಗೂ ಕ್ಯಾಮೆರಾ ಲುಕ್ನಂತಹ ಹಲವು ಅಂಶಗಳನ್ನು 1980ರ ದಶಕದ ಶೈಲಿಗೆ ಹೊಂದಿಸಬಹುದು.ಮಹಿಳೆಯರಿಗೆ ಆ ಕಾಲದ ವರ್ಣರಂಜಿತ ಸೀರೆ, ದೊಡ್ಡ ಸುರುಳಿ ಕೂದಲು ಹಾಗೂ ವಿಂಟೇಜ್ ಆಭರಣಗಳ ಲುಕ್ ನೀಡಬಹುದು. ಪುರುಷರಿಗೆ 80ರ ದಶಕದ ಶರ್ಟ್, ಹೈ-ವೇಸ್ಟ್ ಪ್ಯಾಂಟ್, ಮೀಸೆ ಮತ್ತು ಆ ಕಾಲದ ಕೇಶವಿನ್ಯಾಸದೊಂದಿಗೆ ಫೋಟೋ ಸೃಷ್ಟಿಸಬಹುದು.
ಹಳೆಯ ಬಾಲಿವುಡ್ ಸಿನಿಮಾ ಸ್ಟಿಲ್, ಸ್ಟುಡಿಯೋ ಪೋರ್ಟ್ರೇಟ್, ಫ್ಯಾಷನ್ ಮ್ಯಾಗಜೀನ್ ಕವರ್ ಅಥವಾ ಕುಟುಂಬದ ಹಳೆಯ ಆಲ್ಬಮ್ನಂತೆ ಫೋಟೋವನ್ನು ರೂಪಿಸಿಕೊಳ್ಳಬಹುದು.
ChatGPTನಲ್ಲಿ ರೆಟ್ರೋ ಫೋಟೋ ಮಾಡುವುದು ಹೇಗೆ?
ಮೊದಲು ಮುಖ ಸ್ಪಷ್ಟವಾಗಿ ಕಾಣುವ ಸೆಲ್ಫಿ ಅಥವಾ ಪೋರ್ಟ್ರೇಟ್ ಫೋಟೋವನ್ನು ChatGPTಗೆ ಅಪ್ಲೋಡ್ ಮಾಡಿ.
ಬಳಿಕ ಫೋಟೋವನ್ನು 1980ರ ದಶಕದ ಶೈಲಿಗೆ ಮರುಸೃಷ್ಟಿಸುವಂತೆ ಸ್ಪಷ್ಟವಾದ ಪ್ರಾಂಪ್ಟ್ ನೀಡಿ.
ಬಟ್ಟೆ, ಕೇಶವಿನ್ಯಾಸ, ಹಿನ್ನೆಲೆ, ಬೆಳಕು, ಫಿಲ್ಮ್ ಗ್ರೇನ್ ಮತ್ತು ಕ್ಯಾಮೆರಾ ಫಿನಿಶ್ ಹೇಗಿರಬೇಕು ಎಂಬುದನ್ನು ಪ್ರಾಂಪ್ಟ್ನಲ್ಲಿ ತಿಳಿಸಿ.
ಮೊದಲ ಪ್ರಯತ್ನದಲ್ಲಿ ನಿರೀಕ್ಷಿತ ಫಲಿತಾಂಶ ಸಿಗದಿದ್ದರೆ, ಅದೇ ಚಾಟ್ನಲ್ಲಿ ಹೆಚ್ಚಿನ ವಿವರಗಳನ್ನು ನೀಡಿ ಚಿತ್ರವನ್ನು ಮತ್ತಷ್ಟು ಪರಿಷ್ಕರಿಸಬಹುದು.
ಸಿದ್ಧವಾದ ಫೋಟೋವನ್ನು Instagram Storiesನಲ್ಲಿ ಹಂಚಿಕೊಂಡು ‘Add Yours’ ಸ್ಟಿಕ್ಕರ್ ಮೂಲಕ ಸ್ನೇಹಿತರನ್ನೂ ಟ್ರೆಂಡ್ಗೆ ಸೇರಿಸಬಹುದು.
“ಈ ಫೋಟೋವನ್ನು 1980ರ ದಶಕದ ಭಾರತೀಯ ವಿವಾಹದ ಸನ್ನಿವೇಶದಲ್ಲಿ ಮರುಸೃಷ್ಟಿಸು. ಮುಖದ ಗುರುತು ಮತ್ತು ಮುಖದ ವೈಶಿಷ್ಟ್ಯಗಳು ಸಾಧ್ಯವಾದಷ್ಟು ಬದಲಾಗದಂತೆ ಇರಲಿ. ಆ ಕಾಲದ ಮದುವೆಯ ಉಡುಪು, ಆಭರಣ, ಕೇಶವಿನ್ಯಾಸ ಹಾಗೂ ಮೃದುವಾದ ಅನಾಲಾಗ್ ಫಿಲ್ಮ್ ಗ್ರೇನ್ ಮತ್ತು ನೈಸರ್ಗಿಕ ಬೆಳಕಿನ ಲುಕ್ ಬಳಸಿ.”
“ಈ ಫೋಟೋವನ್ನು 1987ರ ಭಾರತದ ಬೀದಿಯಲ್ಲಿ ತೆಗೆದಂತೆ ಮರುಸೃಷ್ಟಿಸು. ಮುಖದ ವೈಶಿಷ್ಟ್ಯಗಳು ಬದಲಾಗದಂತೆ ಇರಲಿ. ಹಿನ್ನೆಲೆಯಲ್ಲಿ 80ರ ದಶಕದ ವಾಹನಗಳು, ಅಂಗಡಿ ಬೋರ್ಡ್ಗಳು, ನೈಸರ್ಗಿಕ ಹಗಲಿನ ಬೆಳಕು ಹಾಗೂ ಹಳೆಯ ಫೋಟೋ ಪ್ರಿಂಟ್ನ ಟೆಕ್ಸ್ಚರ್ ಇರಲಿ.”
“ಈ ಫೋಟೋವನ್ನು 1980ರ ದಶಕದ ಮಧ್ಯಭಾಗದ ಭಾರತೀಯ ಕುಟುಂಬ ಆಲ್ಬಮ್ ಫೋಟೋದಂತೆ ಮರುಸೃಷ್ಟಿಸು. ನೈಸರ್ಗಿಕ ಮುಖಭಾವ, ಸರಳ ಒಳಾಂಗಣದ ಸೆಟ್ಟಿಂಗ್, ಮೃದುವಾದ ಬೆಳಕು ಮತ್ತು ಹಳೆಯ ಅನಾಲಾಗ್ ಕ್ಯಾಮೆರಾ ಫಿನಿಶ್ ಇರಲಿ. ಆಧುನಿಕ ಡಿಜಿಟಲ್ ಲುಕ್ ಇರಬಾರದು.”ಈ ರೀತಿಯ ವಿವರವಾದ ಪ್ರಾಂಪ್ಟ್ಗಳನ್ನು ಬಳಸುವುದರಿಂದ ನಿಮ್ಮ ಫೋಟೋಗೆ ಬೇಕಾದ ಕಾಲಘಟ್ಟ, ಉಡುಪು, ವಾತಾವರಣ ಮತ್ತು ಛಾಯಾಗ್ರಹಣದ ಶೈಲಿಯನ್ನು ಹೆಚ್ಚು ಸ್ಪಷ್ಟವಾಗಿ ಸೂಚಿಸಬಹುದು.
