ಟೆಹ್ರಾನ್: ಅಮೆರಿಕ ಮತ್ತು ಇಸ್ರೇಲ್ ಜಂಟಿ ದಾಳಿಯಲ್ಲಿ ಇರಾನ್ ನ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಹತ್ಯೆಯಾದ ಬೆನ್ನಲ್ಲೇ, ಅದಕ್ಕೆ ಪ್ರತಿಕಾರ ತೀರಿಸಿಕೊಳ್ಳಲು ಇರಾನ್ ನ ಪತ್ರಿಕೆಯೊಂದು ವಿಶ್ವದ 13 ಪ್ರಮುಖ ನಾಯಕರ ‘ಸೇಡಿನ ಪಟ್ಟಿ’ಯನ್ನು ಬಿಡುಗಡೆ ಮಾಡಿದೆ.
ಇರಾನ್ ನ ಹೊಸ ಸರ್ವೋಚ್ಚ ನಾಯಕ ಆಯತೊಲ್ಲಾ ಮೊಜ್ತಾಬಾ ಖಮೇನಿ ತಮ್ಮ ತಂದೆಯ ಸಾವಿಗೆ ಸೇಡು ತೀರಿಸಿಕೊಳ್ಳುವುದಾಗಿ ಶಪಥ ಮಾಡಿದ ಬೆನ್ನಲ್ಲೇ ಈ ಆಘಾತಕಾರಿ ಇನ್ಫೋಗ್ರಾಫಿಕ್ ಪ್ರಕಟವಾಗಿದೆ.
ಸೇಡು ಎಂಬುದು ನಮ್ಮ ದೇಶದ ಸಂಕಲ್ಪ. ಈ ಅಪರಾಧಿಗಳು ತಮ್ಮ ಹಾಸಿಗೆಯ ಮೇಲೆ ಶಾಂತಿಯುತವಾಗಿ ಸಾಯುವ ಆಸೆಯನ್ನು ತಮ್ಮ ಗೋರಿಯೊಳಗೆ ಕೊಂಡೊಯ್ಯಲಿದ್ದಾರೆ ಎಂದು ಮೊಜ್ತಾಬಾ ಖಮೇನಿ ಎಚ್ಚರಿಕೆ ನೀಡಿದ್ದಾರೆ. ಆದಾಗ್ಯೂ, ಇರಾನ್ ಸರ್ಕಾರ ಅಧಿಕೃತವಾಗಿ ಈ ಪಟ್ಟಿಯನ್ನು ಅನುಮೋದಿಸಿಲ್ಲ ಎನ್ನಲಾಗಿದೆ.
ಹಮ್ಶಹ್ರಿ (Hamshahri) ಪತ್ರಿಕೆ ಪ್ರಕಟಿಸಿರುವ ಇನ್ಫೋಗ್ರಾಫಿಕ್ನಲ್ಲಿ ಅಮೆರಿಕ, ಇಸ್ರೇಲ್ ಮತ್ತು ಯುರೋಪಿಯನ್ ಒಕ್ಕೂಟದ ಪ್ರಮುಖ ರಾಜಕೀಯ ಹಾಗೂ ಮಿಲಿಟರಿ ನಾಯಕರ ಫೋಟೋಗಳನ್ನು ಹಾಕಲಾಗಿದೆ.
ಡೊನಾಲ್ಡ್ ಟ್ರಂಪ್ – ಅಮೆರಿಕ ಅಧ್ಯಕ್ಷರು
ಬೆಂಜಮಿನ್ ನೆತನ್ಯಾಹು – ಇಸ್ರೇಲ್ ಪ್ರಧಾನಿ
ಜಾರ್ಜಿಯಾ ಮೆಲೋನಿ – ಇಟಲಿ ಪ್ರಧಾನಿ
ಕೈರ್ ಸ್ಟಾರ್ಮರ್ – ಬ್ರಿಟನ್ ಪ್ರಧಾನಿ
ಎಮ್ಯಾನುಯೆಲ್ ಮ್ಯಾಕ್ರಾನ್ – ಫ್ರಾನ್ಸ್ ಅಧ್ಯಕ್ಷರು
ಫ್ರೆಡ್ರಿಕ್ ಮೆರ್ಜ್ – ಜರ್ಮನಿ ಚಾನ್ಸಲರ್
ಇಸ್ರೇಲ್ ಕಾಟ್ಜ್ – ಇಸ್ರೇಲ್ ರಕ್ಷಣಾ ಸಚಿವ
ಗಿಡಿಯಾನ್ ಸಾರ್ – ಇಸ್ರೇಲ್ ವಿದೇಶಾಂಗ ಸಚಿವ
ಇಯಾಲ್ ಜಮೀರ್ – ಇಸ್ರೇಲ್ ರಕ್ಷಣಾ ಪಡೆಗಳ (IDF) ಚೀಫ್ ಆಫ್ ಜನರಲ್ ಸ್ಟಾಫ್
ಮಾರ್ಕೊ ರೂಬಿಯೊ – ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ (Secretary of State)
ಪೀಟ್ ಹೆಗ್ಸೆತ್ – ಅಮೆರಿಕ ರಕ್ಷಣಾ ಕಾರ್ಯದರ್ಶಿ (Secretary of Defense)
ಜನರಲ್ ಮೈಕಲ್ “ಎರಿಕ್” ಕುರಿಲ್ಲಾ / ಬ್ರಾಡ್ ಕೂಪರ್ – ಅಮೆರಿಕ ಸೆಂಟ್ರಲ್ ಕಮಾಂಡ್ (CENTCOM) ಮುಖ್ಯಸ್ಥರು
ಮೈಕ್ ಹಕಬೀ – ಇಸ್ರೇಲ್ನಲ್ಲಿರುವ ಅಮೆರಿಕ ರಾಯಭಾರಿ
ಯುರೋಪ್ ನಾಯಕರು ಗುರಿಯಾಗಲು ಕಾರಣವೇನು?
ಅಮೆರಿಕ ಮತ್ತು ಇಸ್ರೇಲ್ ಮಾತ್ರವಲ್ಲದೆ ಬ್ರಿಟನ್, ಫ್ರಾನ್ಸ್, ಜರ್ಮನಿ ಮತ್ತು ಇಟಲಿ ನಾಯಕರನ್ನು ಇರಾನ್ ಗುರಿಯಾಗಿಸಿಕೊಂಡಿದೆ. ಇರಾನ್ ಮೇಲಿನ ದಾಳಿಯನ್ನು ಯುರೋಪಿಯನ್ ದೇಶಗಳು ಖಂಡಿಸಿಲ್ಲ ಮತ್ತು ಅಮೆರಿಕದ ಮಿಲಿಟರಿ ವಿಮಾನಗಳು ತಮ್ಮ ವಾಯುಪ್ರದೇಶವನ್ನು ಬಳಸಲು ಅನುಮತಿ ನೀಡುವ ಮೂಲಕ ಈ ದೇಶಗಳು ದಾಳಿಗೆ ಸಾಥ್ ನೀಡಿವೆ ಎಂದು ಇರಾನ್ ಆರೋಪಿಸಿದೆ.
ಉಲ್ಬಣಗೊಂಡ ಅಮೆರಿಕ-ಇರಾನ್ ಸಂಘರ್ಷ
ಹಾರ್ಮುಜ್ ಜಲಸಂಧಿಯಲ್ಲಿ (Strait of Hormuz) ಇರಾನ್ ಪಡೆಗಳು ಸರಕು ಸಾಗಣೆ ಹಡಗಿನ ಮೇಲೆ ದಾಳಿ ನಡೆಸಿದ ನಂತರ ಯುದ್ಧ ತೀವ್ರಗೊಂಡಿದೆ. ಇದಕ್ಕೆ ಪ್ರತಿಕಾರವಾಗಿ ಅಮೆರಿಕ ಪಡೆಗಳು ಇರಾನ್ನ ವಾಯು ರಕ್ಷಣಾ ವ್ಯವಸ್ಥೆ, ರಾಡಾರ್ಗಳು ಮತ್ತು ಡ್ರೋನ್ ತಾಣಗಳ ಮೇಲೆ ಸರಣಿ ದಾಳಿ ನಡೆಸಿವೆ. ಇರಾನ್ ಸಹ ಬಹ್ರೇನ್, ಕುವೈತ್, ಯುಎಇ ಮತ್ತು ಜೋರ್ಡಾನ್ನಲ್ಲಿರುವ ಅಮೆರಿಕದ ಮಿಲಿಟರಿ ನೆಲೆಗಳನ್ನು ಗುರಿಯಾಗಿಸಿ ಕ್ಷಿಪಣಿ ದಾಳಿ ನಡೆಸಿದೆ.
ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರೆಸ್ ಅವರು ಈ ಸಂಘರ್ಷ ಜಾಗತಿಕ ಆರ್ಥಿಕತೆ ಮತ್ತು ಪ್ರಾದೇಶಿಕ ಭದ್ರತೆಯ ಮೇಲೆ ಭೀಕರ ಪರಿಣಾಮ ಬೀರಲಿದೆ ಎಂದು ಕಳವಳ ವ್ಯಕ್ತಪಡಿಸಿದ್ದು, ಶಾಂತಿಗೆ ಕರೆ ನೀಡಿದ್ದಾರೆ. ಆದರೂ ಇರಾನ್ನ ಹೊಸ ನಾಯಕ ಮೊಜ್ತಾಬಾ ಖಮೇನಿ ಮಾತ್ರ ಸೇಡಿನ ಜಪ ಮುಂದುವರಿಸಿದ್ದಾರೆ.
