ಕುಟುಂಬದಲ್ಲಿ ಯಾರಾದರೂ ನಿಧನರಾಗುವುದು ಜೀವನದ ಸಹಜ ಪ್ರಕ್ರಿಯೆಯಾದರೂ, ಅವರು ಬಳಸುತ್ತಿದ್ದ ವಸ್ತುಗಳು, ಬಟ್ಟೆಗಳು ಮತ್ತು ಆಭರಣಗಳ ಬಳಕೆ ಕುರಿತು ಅನೇಕರಲ್ಲಿ ಗೊಂದಲ ಉಂಟಾಗುತ್ತದೆ. ಈ ಬಗ್ಗೆ ಧಾರ್ಮಿಕ ಗ್ರಂಥಗಳಲ್ಲಿ ವಿಶೇಷವಾಗಿ Garuda Purana ಕೆಲವು ಪ್ರಮುಖ ಮಾರ್ಗದರ್ಶನಗಳನ್ನು ನೀಡಿದೆ.
ಮೃತ ವ್ಯಕ್ತಿಯ ಬಟ್ಟೆಗಳನ್ನು ಮನೆಯವರು ಧರಿಸುವುದು ಶುಭವಲ್ಲ ಎಂದು ಗರುಡ ಪುರಾಣದಲ್ಲಿ ಉಲ್ಲೇಖಿಸಲಾಗಿದೆ. ಆರೋಗ್ಯದ ದೃಷ್ಟಿಯಿಂದಲೂ ಇವುಗಳನ್ನು ಬಳಸುವುದು ಸೂಕ್ತವಲ್ಲ. ಆದ್ದರಿಂದ, ಇಂತಹ ಬಟ್ಟೆಗಳನ್ನು ಬಡವರಿಗೆ ದಾನ ಮಾಡುವುದು ಅಥವಾ ವಿಸರ್ಜಿಸುವುದು ಶ್ರೇಯಸ್ಕರ ಎಂದು ಹೇಳಲಾಗಿದೆ.
ಆಭರಣಗಳ ವಿಷಯದಲ್ಲಿ ನಿಯಮಗಳು ಸ್ವಲ್ಪ ವಿಭಿನ್ನವಾಗಿವೆ. ಚಿನ್ನ ಮತ್ತು ಬೆಳ್ಳಿಯಂತಹ ಲೋಹದ ಒಡವೆಗಳನ್ನು ನೇರವಾಗಿ ಬಳಸುವುದಕ್ಕಿಂತ ಮೊದಲು ಅವುಗಳನ್ನು ಕರಗಿಸಿ ಹೊಸ ರೂಪದಲ್ಲಿ ತಯಾರಿಸುವುದು ಅಥವಾ ಶಾಸ್ತ್ರೋಕ್ತವಾಗಿ ಶುದ್ಧೀಕರಿಸಿ ಧರಿಸುವುದು ಉತ್ತಮ. ಕೆಲ ಸಂದರ್ಭಗಳಲ್ಲಿ ತಾಯಿ-ತಂದೆಯ ಆಭರಣಗಳನ್ನು ಆಶೀರ್ವಾದದ ರೂಪದಲ್ಲಿ ಮಕ್ಕಳು ಧರಿಸಬಹುದು ಎಂಬ ನಂಬಿಕೆಯೂ ಇದೆ.
ಗರುಡ ಪುರಾಣದ ಪ್ರಕಾರ, ಮೃತರ ಬಟ್ಟೆಗಳನ್ನು ಬಳಸುವುದರಿಂದ ಆತ್ಮವು ಜೀವಿತರ ಕಡೆಗೆ ಆಕರ್ಷಿತವಾಗುವ ಸಾಧ್ಯತೆ ಇದೆ. ಇದರಿಂದ ಆತ್ಮಕ್ಕೆ ಮುಕ್ತಿ ದೊರೆಯುವುದರಲ್ಲಿ ಅಡ್ಡಿಯಾಗಬಹುದು ಎಂದು ಹೇಳಲಾಗಿದೆ. ಇದೇ ಕಾರಣಕ್ಕೆ, ಇಂತಹ ವಸ್ತುಗಳನ್ನು ದಾನ ಮಾಡುವುದರಿಂದ ಆತ್ಮಕ್ಕೆ ಶಾಂತಿ ಸಿಗುತ್ತದೆ ಎಂಬ ನಂಬಿಕೆ ಇದೆ.
ಇನ್ನು ಮೃತ ವ್ಯಕ್ತಿ ಬಳಸುತ್ತಿದ್ದ ಮಂಚ ಅಥವಾ ಹಾಸಿಗೆಯನ್ನು ಮನೆಯವರು ಬಳಸಬಾರದು ಎಂದು ತಿಳಿಸಲಾಗಿದೆ. ಅವುಗಳನ್ನು ದಾನ ಮಾಡುವುದು ಅಥವಾ ಮನೆಯಿಂದ ಹೊರಹಾಕಿ ಹೊಸದನ್ನು ಬಳಸುವುದು ಸೂಕ್ತ ಎಂದು ಹೇಳಲಾಗಿದೆ. ಮೃತರ ವಸ್ತುಗಳನ್ನು ಗೌರವದಿಂದ ವಹಿಸಿ, ಅವುಗಳನ್ನು ದಾನ ಮಾಡುವ ಮೂಲಕ ಆತ್ಮಶಾಂತಿ ಹಾಗೂ ಕುಟುಂಬದ ಒಳಿತಿಗಾಗಿ ಕ್ರಮ ಕೈಗೊಳ್ಳುವುದು ಶ್ರೇಯಸ್ಕರ ಎಂಬ ಸಂದೇಶವನ್ನು ಗರುಡ ಪುರಾಣ ನೀಡುತ್ತದೆ.
