ಬೆಂಗಳೂರು: ಅಪ್ಪು ನಿಧನರಾಗಿ ಇಂದಿಗೆ 6 ದಿನ. ಪುನೀತ್ ರನ್ನು ಕಳೆದುಕೊಂಡ ಕುಟುಂಬ ಭಾರೀ ದುಃಖದಲ್ಲಿದೆ. ಆ ನೋವನ್ನ ಮರೆಸೋದಕ್ಕೆ ಯಾರಿಂದಲೂ ಸಾಧ್ಯವಿಲ್ಲ. ಪುನೀತ್ ಮನೆಗೆ ಬೇರೆ ಬೇರೆ ಭಾಷೆಯ ನಟರು ಭೇಟಿ ನೀಡಿ ಸಾಂತ್ವನ ಹೇಳುತ್ತಿದ್ದಾರೆ. ಇದೀಗ ಟಾಲಿವುಡ್ ನಟ, ಚಿರಂಜೀವಿ ಪುತ್ರ ರಾಮ್ ಚರಣ್ ಭೇಟಿ ನೀಡಿ, ಸಾಂತ್ವನ ತಿಳಿಸಿದ್ದಾರೆ.
ಸದಾಶಿವನಗರದಲ್ಲಿರುವ ಪುನೀತ್ ರಾಜ್‍ಕುಮಾರ್ ಮನೆಗೆ ಭೇಟಿ ಕೊಟ್ಟ ನಟ ರಾಮ್ ಚರಣ್, ಅಪ್ಪು ಪತ್ನಿ ಅಶ್ವಿನಿ ಹಾಗೂ ಮಕ್ಕಳಿಗೆ ಧೈರ್ಯ ತುಂಬಿದ್ದಾರೆ. ಬಳಿಕ ಮಾತನಾಡಿದ ರಾಮ್ ಚರಣದ, ಪುನೀತ್ ರಾಜ್‍ಕುಮಾರ್ ನಿಧನ ಅತಿ ದೊಡ್ಡ ನಷ್ಟ. ನಮ್ಮ ಕುಟುಂಬ ಸದಸ್ಯನನ್ನೇ ಕಳೆದುಕೊಂಡಷ್ಟು ನೋವಾಗುತ್ತಿದೆ ಎಂದಿದ್ದಾರೆ.
ಮಾನವೀಯ ಮೌಲ್ಯಗಳನ್ನ ಅವರಿಂದ ಕಲಿಯಬೇಕು. ನಮ್ಮ ಮನೆಗೆ ಬಂದಾಗ ಬಹಳ ಆತ್ಮೀಯವಾಗಿರುತ್ತಿದ್ದರು. ನಾವೇ ಗೆಸ್ಟ್ ಅನ್ನೋ ಥರ ಎಲ್ಲರ ಜೊತೆ ಖುಷಿ ಖುಷಿಯಾಗಿರ್ತಾ ಇದ್ದರು. ದೇವರು ಅವರ ಕುಟುಂಬಕ್ಕೆ ದುಃಖ ಭರಿಸುವ ಶಕ್ತಿ ನೀಡಲಿ. ರಾಜ್‍ಕುಮಾರ್ ಕುಟುಂಬ ನಮ್ಮನ್ನು ಎಲ್ಲಾ ಕಾರ್ಯಕ್ರಮಕ್ಕೂ ಆಹ್ವಾನ ನೀಡ್ತಾ ಇತ್ತು. ಪುನೀತ್ ನಿಧನ ತೀರಾ ಅನ್ಯಾಯ. ಒಪ್ಪಿಕೊಳ್ಳೋದಕ್ಕೆ ಆಗ್ತಾ ಇಲ್ಲ.
ಬೆಂಗಳೂರಿಗೆ ಯಾವಾಗ ಬಂದರೂ ಅವರನ್ನ ಭೇಟಿಯಾಗಿ ಹೋಗ್ತಿದ್ದೆ. ರಾಜ್‍ಕುಮಾರ್ ಮನೆಗೆ ಬರ್ತಿದ್ದೆ. ಇತ್ತೀಚೆಗೆ ಕೂಡ ಶಿವಣ್ಣ, ಪುನೀತ್ ರನ್ನ ಭೇಟಿಯಾಗಿದ್ದೆ. ಪುನೀತ್ ತುಂಬ ವಿನಯವಂತ. ವಿ ಆಲ್ ಮಿಸ್ ಯೂ ಪುನೀತ್ ರಾಜ್‍ಕುಮಾರ್ ಎಂದು ನಟ ರಾಮ್ ಚರಣ್ ಭಾವುಕರಾಗಿದ್ದಾರೆ.
Newbie Techy