ಅಪ್ಪಿತಪ್ಪಿಯೂ ಬರಬೇಡಿ : ಡಾ.ಬಿ.ಆರ್. ಅಂಬೇಡ್ಕರ್ ಜಯಂತಿ ಹಿನ್ನೆಲೆ ಡಾ.ಎಸ್ ಎಚ್ ಶಫಿಉಲ್ಲ(ಕುಟೀಶ) ಅವರ ಕವಿತೆ

ಅಪ್ಪಿತಪ್ಪಿಯೂ ಬರಬೇಡಿ

ಇಂದು ನಿಮ್ಮ ಜನ್ಮದಿನ ಬಾಬಾಸಾಹೇಬರೇ,
ಸಂತೋಷದಿಂದ ಸಂಭ್ರಮಿಸಲೇ!?
ದಿಕ್ಕುಕಾಣದೆ ದುಃಖಿಸಿಬಿಡಲೇ!?
ಸಮಾನತೆಯ ಸಾಕಾರದ ಸನ್ಮಿತ್ರ
ನೀವು ನೋಡುತ್ತಿರುವಿರಾ ಸ್ವರ್ಗದಿಂದಲೇ?
ಹುಲುಸಾಗಿ ಬೆಳೆಯುತ್ತಿದೆ ನೋಡು ಶತ್ರುತ್ವ

ಪುಂಡಪೋಕರಿಗಳದ್ದೇ ದರ್ಬಾರು
ಅವಿವೇಕಿ ಆಡಳಿತಗಾರದ್ದೇ ಕಾರುಬಾರು
ತಿನ್ನುವ ಆಹಾರವನ್ನು ಪ್ರಶ್ನಿಸುವನೊಬ್ಬ
ಹಾಕುವ ಬಟ್ಟೆಯನ್ನು ತೆಗೆಸುವ ಮತ್ತೊಬ್ಬ

ಹಿಂದುವಂತೆ,ಮುಸ್ಲಿಮನಂತೆ
ಹಿಜಬ್ ಅಂತೆ,ಕೇಸರಿ ವಸ್ತ್ರವಂತೆ
ಮಸೀದಿಯಂತೆ, ಮಂದಿರವಂತೆ
ಹಲಾಲ್ ಅಂತೆ, ಜಟ್ಕಾಅಂತೆ

ಅಲ್ಲಿ ಖರೀದಿಸಬೇಕಂತೆ;ಇಲ್ಲಿ ಬೇಡವಂತೆ
ಅವನ್ಯಾರೋ ಸ್ವಾಮೀಜಿಯಂತೆ
ಬಾಯಿಗೆ ಬಂದಂತೆ ಬೊಗಳುವನಂತೆ
ಇವನ್ಯಾರೋ ವಾಗ್ಮಿಯಂತೆ
ಸುಳ್ಳಿನಲ್ಲೆ ಜನರ ಮಳ್ಳು ಮಾಡುವನಂತೆ
ಇವರದೂ ಮನುಷ್ಯಜನ್ಮವಂತೆ!!!!

ನೋಡಿಬಿಡು ಮಾರಾಯ
ನಮ್ಮ ದೇಶದಲ್ಲಿರುವ ಘನಂದಾರಿಗಳ
ಜಾತಿಧರ್ಮವೆಂಬ ಕಿಚ್ಚು ಹಚ್ಚಿ
ರಾಷ್ಟೋದ್ಧಾರ ಮಾಡಲು ಹೊರಟಿರುವವರ

ಈಗ ನೀವು ನೋಡುವುದೇನು ಬಿಡಿ
ಇಂಥವರನ್ನೆ ಅಧ್ಯಯನ ಮಾಡಿಬಿಟ್ಟಿದ್ದೀರಿ
ಇವರ ಮಧ್ಯೆ ಸಾಕಷ್ಟು ಅನುಭವಿಸಿದ್ದೀರಿ
ಹಾಗಾಗಿ ಅಲ್ಲವೇ ನೀವು ಹೋರಾಡಿದ್ದು
ಧರ್ಮನಿರಪೇಕ್ಷ ಸಂವಿಧಾನ ರಚಿಸಿದ್ದು
ಈಗ ಅದರ ಬುಡವನ್ನೇ ಅಲ್ಲಾಡಿಸಿದ್ದಾರೆ.

ಈ ವಿಷಘಳಿಗೆಯಲ್ಲೇ ನೀವು ಇಲ್ಲ!
ಮತ್ತೆ ಹುಟ್ಟಿಬನ್ನಿ ಎಂದು ಹೇಳುವುದಿಲ್ಲ
ಅಪ್ಪಿತಪ್ಪಿಯೂ ಬರಬೇಡಿ
ಸ್ವರ್ಗದಲ್ಲಿಯೇ ಸನ್ಮಾನಿತರಾಗಿದ್ದುಬಿಡಿ
ಬಂದರೆ ನಿಮಗೂ ತಪ್ಪಿದ್ದಲ್ಲ
ದೇಶದ್ರೋಹದ ಪಟ್ಟ !
ದೇಶದ್ರೋಹದ ಪಟ್ಟ !!

ಕವಿ : ಡಾ.ಎಸ್ ಎಚ್ ಶಫಿಉಲ್ಲ(ಕುಟೀಶ) ಮೊ: 88674 35662

ಸರ್ವರಿಗೂ ಅಂಬೇಡ್ಕರ್ ಜಯಂತಿಯ ಶುಭಕಾಮನೆಗಳು