ರಮ್ಯಾ ಮದುವೆಯಾಗುವ ಹುಡುಗನಿಗೆ ಮಾನವೀಯತೆ ಇರಲೇಬೇಕು..!

ಮೋಹಕ ತಾರೆ ರಮ್ಯಾ ಸದ್ಯ ಚಿತ್ರರಂಗಕ್ಕೆ ಕಮ್ ಬ್ಯಾಕ್ ಆಗಿದ್ದಾರೆ. ನಾಗರಹಾವು ಸಿನಿಮಾದ ಬಳಿಕ ಸ್ವಾತಿ ಮುತ್ತಿನ ಮಳೆ ಹನಿಯೇ ಎನ್ನುತ್ತಾ ಅಭಿಮಾನಿಗಳಿಗೆ ಖುಷಿ ಕೊಟ್ಟಿದ್ದಾರೆ. ರಾಜಕೀಯದಲ್ಲಿ ಸಕ್ರಿಯವಾಗಿದ್ದ ರಮ್ಯಾ, ಮತ್ತೆ ಚಿತ್ರರಂಗಕ್ಕೆ ಮರಳುತ್ತಾರಾ ಎಂಬ ಅನುಮಾನವಿತ್ತು. ಮರಳಲಿ ಎಂಬುದು ಅಭಿಮಾನಿಗಳ ಆಸೆಯಾಗಿತ್ತು. ಕಡೆಗೂ ಅಭಿಮಾನಿಗಳ ಆಸೆಯೇ ನೆರವೇರಿದೆ.

ರಮ್ಯಾ ನಟನೆಗೆ ಬರಲಿ ಎಂದು ಬಯಸುವ ಅಭಿಮಾನಿಗಳಿಗೆ ಅವರ ಮದುವೆ ಬಗ್ಗೆ ಕುತೂಹಲವೂ ಇದೆ. ಆಗಾಗ ಸೋಷಿಯಲ್ ಮೀಡಿಯಾದಲ್ಲಿ ಆ ಪ್ರಶ್ನೆ ಎದುರಾಗುತ್ತಲೂ ಇರುತ್ತೆ. ಇದೀಗ ತಮ್ಮ ಮದುವೆಯಾಗುವ ಹುಡುಗನ ಬಗ್ಗೆ ನಟಿ ರಮ್ಯಾ ಉತ್ತರ ನೀಡಿದ್ದಾರೆ. ಕಲರ್ಸ್ ಕನ್ನಡ ವಾಹಿನಿ ಅನುಬಂಧ ವರ್ಷದ ಅವಾರ್ಡ್ ಕಾರ್ಯಕ್ರಮವನ್ನು ನಡೆಸಿಕೊಟ್ಟಿದೆ. ಈ ಕಾರ್ಯಕ್ರಮದಲ್ಲಿ ಅತಿಥಿಯಾಗಿ ರಮ್ಯಾ ಅವರನ್ನು ಕೂಡ ಕರೆಸಿದ್ದರು. ಹೊರಗಿನ ಜನ ಅಷ್ಟೇ ಅಲ್ಲ, ಕಲಾವಿದರಿಗೂ ರಮ್ಯಾ ಎಂದರೆ ಅದೇನೋ ಪ್ರೀತಿ, ಅದೇನೋ ಗೌರವ. ರಮ್ಯಾ ವೇದಿಕೆ ಮೇಲೆ ಏರುತ್ತಿದ್ದಂತೆ ಶಿಳ್ಳೆ, ಚಪ್ಪಾಳೆಗಳ ಸುರಿಮಳೆಯೇ ಕೇಳಿಸಿತ್ತು. ರಮ್ಯಾ ಮಾತನಾಡುವಾಗಲೇ ನಟಿಯೊಬ್ಬರು ಓಡಿ ಬಂದು ತಬ್ಬಿದ್ದರು. ಈ ವಿಡಿಯೋ ಎಲ್ಲೆಡೆ ವೈರಲ್ ಆಗಿತ್ತು.

ಇದೇ ವೇದಿಕೆ ಮೇಲೆ ಅಕುಲ್ ಬಾಲಾಜಿ ರಮ್ಯಾ ಅವರಿಗೆ ಪ್ರಶ್ನೆಯೊಂದನ್ನು ಕೇಳಿದ್ದಾರೆ. ನಿಮ್ಮ ಪ್ರೀತಿಯ ಹುಡುಗರಿಗೆ ಏನು ಹೇಳುತ್ತೀರಾ ಅಂತ. ಆಗ ರಮ್ಯಾ ನಾನಿನ್ನು ಸಿಂಗಲ್ ಎಂದಿದ್ದಾರೆ. ನೀವೂ ಮದುವೆಯಾಗುವ ಹುಡುಗ ಹೇಗಿರಬೇಕು ಎಂದು ಮರುಪ್ರಶ್ನೆಯಾಕಿದ್ದಾರೆ. ಅದಕ್ಕೆ ಉತ್ತರಿಸಿದ ರಮ್ಯಾ, ಅವನು ಕೂಡ ಸಿಂಗಲ್ ಆಗಿರಬೇಕು. ಲುಕ್ ಬಗ್ಗೆ ಎಲ್ಲಾ ಹೆಚ್ಚು ತಲೆ ಕೆಡಿಸಿಕೊಳ್ಳಲ್ಲ. ಮಾನವೀಯತೆಯ ಗುಣ ಅವನಲ್ಲಿ ಇರಬೇಕು ಎಂದಿದ್ದಾರೆ.