ಸಾಲ ತೀರಿಸುವುದಕ್ಕೆ ಸಿದ್ದರಾಮಯ್ಯ ಅವರಿಗೆ ಕ್ಷೇತ್ರವನ್ನು ತ್ಯಾಗ ಮಾಡಿದ್ರಾ ಶ್ರೀನಿವಾಸ್ ಗೌಡ..?

ಈ ಬಾರಿ ಕೋಲಾರದಲ್ಲಿ ಮಾಜಿ ಸಿಎಂ ಸಿದ್ದರಾಮಯ್ಯ ಅವರು ಸ್ಪರ್ಧೆ ಮಾಡುತ್ತಿದ್ದಾರೆ. ಈ ಬಗ್ಗೆ ಅಧಿಕೃತವಾಗಿ ಘೋಷಣೆಯನ್ನು ಮಾಡಿದ್ದಾರೆ. ಈ ಬೆನ್ನಲ್ಲೇ ಶ್ರೀನಿವಾಸ್ ಗೌಡ ಅವರದ್ದೇ ಆದ ಆಡಿಯೋವೊಂದು ವೈರಲ್ ಆಗಿದೆ.

ಆಪ್ತರ ಜೊತೆಗೆ ಮಾತನಾಡಿದ್ದಾರೆ ಎನ್ನಲಾದ ಆಡಿಯೋವೊಂದು ವೈರಲ್ ಆಗಿದೆ. ಆಡಿಯೋದಲ್ಲಿ 17 ಕೋಟಿ ಸಾಲ ತೀರಿಸುವುದಕ್ಕೋಸ್ಕರ ಕೋಲಾರ ಕ್ಷೇತ್ರವನ್ನು ನಾನು ಸಿದ್ದರಾಮಯ್ಯ ಅವರಿಗೆ ಬಿಟ್ಟುಕೊಟ್ಟೆ. ಸಿದ್ದರಾಮಯ್ಯ ಅವರು ಗೆದ್ದ ಮೇಲೆ ಕ್ಷೇತ್ರದ ಕಡೆ ಹೇಗೂ ಬರಲ್ಲ. ಆಗ ನನ್ನದೇ ಕಾರುಬಾರು. ಸಿದ್ದರಾಮಯ್ಯ ಅವರು ಗೆದ್ದರು ಕೂಡ ಕ್ಷೇತ್ರದಲ್ಲಿ ಓಡಾಡುವುದು ನಾನೇ ಎಂದು ಈ ಆಡಿಯೋದಲ್ಲಿ ಹೇಳಿದ್ದಾರೆ. ಇದು ಕೋಲಾರದಲ್ಲೆಲ್ಲಾ ವೈರಲ್ ಆಗಿದೆ.

ನೀವೇ ಅಭ್ಯರ್ಥಿ ಆಗಬೇಕು ಎಂಬ ಆಸೆ ಇತ್ತು ಎಂದು ಆಪ್ತರೊಬ್ಬರು ಕೇಳಿದ ಪ್ರಶ್ನೆಗೆ ಶ್ರೀನಿವಾಸ್ ಗೌಡ ಅವರು, “ಹೋದ ಸಲ 17 ಕೋಟಿ ಖರ್ಚು ಮಾಡಿದ್ದೀನಿ. ಯಾರು ಸಹಾಯ ಮಾಡುತ್ತಾರೆ ಹೇಳು. ನೀವೂ ಅದನ್ನು ಕೊಟ್ರಿ ನಾನು ತೀರಿಸಿದೆ. ನನ್ನ ಎಂಎಲ್ಸಿ ಮಾಡಿ, ಮಂತ್ರಿ ಮಾಡುತ್ತಾರೆ. ಈಗಲೂ ಅದು ಶ್ರೀನಿವಾಸ್ ಗೌಡರದ್ದೇ. ಎಲ್ಲರಿಗೂ ಹೇಳು ಅದನ್ನು. ಕ್ಷೇತ್ರದಲ್ಲಿ ನಾನೇ ಓಡಾಡುವುದು. ಅವರು ಗೆದ್ದ ಮೇಲೆ ಮುಖ್ಯಮಂತ್ರಿ ಆಗುತ್ತಾರೆ. ಅದಕ್ಕೆ ನಾನು ಒಪ್ಪಿಕೊಂಡೆ. ಈಗ ಕ್ಷೇತ್ರ ಬಿಟ್ಟುಕೊಟ್ಟುಬಿಟ್ಟಿದ್ದೀನಿ” ಎಂದಿದ್ದಾರೆ.