ದೆಹಲಿ: ವಿದೇಶಾಂಗ ಸಚಿವಾಲಯವು (MEA) ಪಾಸ್ಪೋರ್ಟ್ ನಿಯಮಗಳು 1980ಕ್ಕೆ ತಿದ್ದುಪಡಿ ತಂದಿದ್ದು, ಅಪ್ರಾಪ್ತ ವಯಸ್ಕರ ಪಾಸ್ಪೋರ್ಟ್ ಮಾನ್ಯತೆ ಅವಧಿ ಮತ್ತು ಸೇವಾ ಶುಲ್ಕದಲ್ಲಿ ಮಹತ್ವದ ಬದಲಾವಣೆಗಳನ್ನು ಜಾರಿಗೆ ತಂದಿದೆ.
ಹೊಸ ನಿಯಮದ ಪ್ರಕಾರ, 15 ವರ್ಷದೊಳಗಿನ ಮಕ್ಕಳಿಗೆ ನೀಡಲಾಗುವ 36 ಪುಟಗಳ ಸಾಮಾನ್ಯ ಪಾಸ್ಪೋರ್ಟ್, ವಿತರಿಸಿದ ದಿನಾಂಕದಿಂದ 5 ವರ್ಷಗಳು ಅಥವಾ ಆ ಮಗುವಿಗೆ 18 ವರ್ಷ ತುಂಬುವವರೆಗೆ (ಯಾವುದು ಮೊದಲೋ ಅದು) ಚಾಲ್ತಿಯಲ್ಲಿರುತ್ತದೆ. ಈ ನಿಟ್ಟಿನಲ್ಲಿ ಪಾಸ್ಪೋರ್ಟ್ ನಿಯಮಾವಳಿಗಳ ನಿಯಮ 12 ರ ಉಪ-ನಿಯಮ (1A) ಅನ್ನು ಬದಲಿಸಲಾಗಿದೆ.
ಪಾಸ್ಪೋರ್ಟ್ ಸೇವಾ ಶುಲ್ಕ ಹೆಚ್ಚಳ
ಪಾಸ್ಪೋರ್ಟ್ ವಿತರಣೆ, ನವೀಕರಣ, ತತ್ಕಾಲ್, ಕಳೆದುಹೋದ/ಹಾಳಾದ ಪಾಸ್ಪೋರ್ಟ್ಗಳ ಮರುಪಡೆಯುವಿಕೆ ಹಾಗೂ ಪೊಲೀಸ್ ಕ್ಲಿಯರೆನ್ಸ್ ಸರ್ಟಿಫಿಕೇಟ್ (PCC) ಸೇರಿದಂತೆ ವಿವಿಧ ಸೇವೆಗಳ ದರಗಳನ್ನು ಹೆಚ್ಚಿಸಲಾಗಿದೆ.
The Ministry of External Affairs has notified the Passports (Amendment) Rules, 2026, amending the Passports Rules, 1980. The amendment provides that an ordinary passport with 36 pages issued to a child under 15 years of age will be valid for five years or until the child turns… pic.twitter.com/Y9I9qBii1w
— Press Trust of India (@PTI_News) September 17, 2026
ಪರಿಷ್ಕೃತ ದರಗಳ ವಿವರ
ವಯಸ್ಕರ ಸಾಮಾನ್ಯ ಪಾಸ್ಪೋರ್ಟ್: 36 ಪುಟಗಳ ಹೊಸ ಅಥವಾ ನವೀಕರಣ ಪಾಸ್ಪೋರ್ಟ್ ಶುಲ್ಕ ₹1,500 ರಿಂದ ₹2,500 ಕ್ಕೆ ಏರಿಕೆಯಾಗಿದೆ. 60 ಪುಟಗಳ ಜಂಬೋ ಪಾಸ್ಪೋರ್ಟ್ಗೆ ₹2,000 ಬದಲಿಗೆ ₹3,500 ನಿಗದಿಪಡಿಸಲಾಗಿದೆ.
ವಯಸ್ಕರ ತತ್ಕಾಲ್ ಸೇವೆ: 36 ಪುಟಗಳ ತತ್ಕಾಲ್ ಪಾಸ್ಪೋರ್ಟ್ಗೆ ₹3,500 ರಿಂದ ₹5,000 ಹಾಗೂ 60 ಪುಟಗಳ ಪಾಸ್ಪೋರ್ಟ್ಗೆ ₹4,000 ರಿಂದ ₹6,000 ಕ್ಕೆ ಏರಿಕೆಯಾಗಿದೆ. ಕಳೆದುಹೋದ/ಹಾಳಾದ 60 ಪುಟಗಳ ಪಾಸ್ಪೋರ್ಟ್ ಅನ್ನು ತತ್ಕಾಲ್ನಲ್ಲಿ ಪಡೆಯಲು ಶುಲ್ಕ ₹5,500 ರಿಂದ ₹8,500 ಕ್ಕೆ ತಲುಪಿದೆ.
ಅಪ್ರಾಪ್ತ ವಯಸ್ಕರ ಶುಲ್ಕ: 18 ವರ್ಷದೊಳಗಿನ ಮಕ್ಕಳಿಗೆ 36 ಪುಟಗಳ ಸಾಮಾನ್ಯ ಪಾಸ್ಪೋರ್ಟ್ ದರ ₹1,000 ದಿಂದ ₹1,750 ಕ್ಕೆ ಹೆಚ್ಚಾಗಿದ್ದು, ತತ್ಕಾಲ್ ಸೇವೆಗೆ ₹3,000 ಶುಲ್ಕ ನಿಗದಿಪಡಿಸಲಾಗಿದೆ.
8 ವರ್ಷದೊಳಗಿನ ಮಕ್ಕಳಿಗೆ ಮತ್ತು 60 ವರ್ಷ ಮೇಲ್ಪಟ್ಟ ಹಿರಿಯ ನಾಗರಿಕರಿಗೆ ಹೊಸ ಪಾಸ್ಪೋರ್ಟ್ ಅರ್ಜಿಗಳ ಮೇಲೆ ಶೇ. 10 ರಷ್ಟು ರಿಯಾಯಿತಿ ಮುಂದುವರಿಯಲಿದ್ದು, ಪಾಸ್ಪೋರ್ಟ್ ನವೀಕರಣ ಅಥವಾ ಮರುಪಡೆಯುವಿಕೆ (Reissue) ಪ್ರಕರಣಗಳಿಗೆ ಈ ರಿಯಾಯಿತಿ ಅನ್ವಯಿಸುವುದಿಲ್ಲ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.
