ಜಾಗತಿಕ ರೈಡ್-ಹೇಲಿಂಗ್ ದೈತ್ಯ ಉಬರ್ (Uber) ತನ್ನ ಸಂಸ್ಥೆಯಲ್ಲಿ ಭಾರಿ ಪುನಾರಚನೆಗೆ ಮುಂದಾಗಿದ್ದು, ಸುಮಾರು 3,300 ಕಾರ್ಪೊರೇಟ್ ಉದ್ಯೋಗಿಗಳನ್ನು ವಜಾಗೊಳಿಸಲು ನಿರ್ಧರಿಸಿದೆ. ಇದು ಸಂಸ್ಥೆಯ ಒಟ್ಟಾರೆ ಜಾಗತಿಕ ಸಿಬ್ಬಂದಿ ಬಲದ ಶೇಕಡಾ 10 ರಷ್ಟಿದೆ.
ಬುಧವಾರ ಸಿಬ್ಬಂದಿಗೆ ಕಳುಹಿಸಲಾದ ಆಂತರಿಕ ಸಂದೇಶದಲ್ಲಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (ಸಿಇಒ) ದಾರಾ ಖೋಸ್ರೋಶಾಹಿ ಈ ವಿಷಯವನ್ನು ಸ್ಪಷ್ಟಪಡಿಸಿದ್ದಾರೆ. ಸಂಸ್ಥೆಯಲ್ಲಿನ ಆಡಳಿತ ಹಂತಗಳನ್ನು (ಮ್ಯಾನೇಜ್ಮೆಂಟ್ ಲೇಯರ್ಗಳು) ಕಡಿಮೆ ಮಾಡುವುದು ಮತ್ತು ಕಾರ್ಯಾಚರಣಾ ತಂಡಗಳನ್ನು ವಿಲೀನಗೊಳಿಸುವುದರಿಂದ ಕಂಪನಿಯ ಕೆಲಸದ ವೇಗ ಹಾಗೂ ದಕ್ಷತೆ ಹೆಚ್ಚಲಿದೆ ಎಂದು ಅವರು ತಿಳಿಸಿದ್ದಾರೆ.
ಯಾವ ಕಚೇರಿಗೆ ಎಷ್ಟು ಹೊಡೆತ?
ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ ಈ ಸಂಸ್ಥೆಯು ಲಂಡನ್ ಸೇರಿದಂತೆ ವಿಶ್ವದ ವಿವಿಧ ಭಾಗಗಳಲ್ಲಿರುವ ತನ್ನ ಕಚೇರಿಗಳಲ್ಲಿ ಎಷ್ಟೆಷ್ಟು ಹುದ್ದೆಗಳು ರದ್ದಾಗಲಿವೆ ಎಂಬ ನಿಖರ ಮಾಹಿತಿಯನ್ನು ಬಹಿರಂಗಪಡಿಸಿಲ್ಲ. ಈಗಾಗಲೇ ಬಾಧಿತ ಉದ್ಯೋಗಿಗಳಿಗೆ ಮಾಹಿತಿ ನೀಡಲಾಗಿದ್ದು, ಕೆಲವು ದೇಶಗಳ ಕಾರ್ಮಿಕ ಕಾನೂನುಗಳಿಗೆ ಅನುಗುಣವಾಗಿ ಪ್ರಕ್ರಿಯೆ ನಡೆಯಲಿದೆ ಎಂದು ತಿಳಿಸಲಾಗಿದೆ.
ನಿರ್ಧಾರಕ್ಕೆ ಕಾರಣವೇನು?
ಕಳೆದ ಐದು ವರ್ಷಗಳಲ್ಲಿ ಉಬರ್ ಉತ್ತಮ ಬೆಳವಣಿಗೆ ಕಂಡಿದೆ ಎಂದಿರುವ ಸಿಇಒ, “ಬೆಳವಣಿಗೆಯ ಜತೆಗೆ ಸಂಸ್ಥೆಯ ವ್ಯವಸ್ಥೆ ಸಂಕೀರ್ಣಗೊಂಡಿದೆ. ಈ ಹಿಂದೆ ಸಣ್ಣ ಪ್ರಮಾಣದಲ್ಲಿದ್ದಾಗ ಸೂಕ್ತವಾಗಿದ್ದ ಆಡಳಿತ ರಚನೆಗಳು ಈಗಿನ ಹಂತಕ್ಕೆ ಹೊಂದುತ್ತಿಲ್ಲ. ಸಂಸ್ಥೆಯನ್ನು ಸರಳ, ವೇಗ ಹಾಗೂ ಭವಿಷ್ಯದ ಹೂಡಿಕೆಗೆ ಸನ್ನದ್ಧಗೊಳಿಸಲು ಈ ಕಠಿಣ ಹೆಜ್ಜೆ ಅನಿವಾರ್ಯವಾಗಿದೆ,” ಎಂದು ಹೇಳಿದ್ದಾರೆ.
ಈ ಬದಲಾವಣೆಗಳ ಭಾಗವಾಗಿ:
ಒಬ್ಬಿಬ್ಬರು ನೌಕರರಿಗೊಬ್ಬ ಮ್ಯಾನೇಜರ್ ಇರುವ ‘ಮೈಕ್ರೋ-ಟೀಮ್’ಗಳ ಸಂಖ್ಯೆಯನ್ನು ಶೇ. 50 ರಷ್ಟು ಕಡಿತಗೊಳಿಸಲಾಗುತ್ತಿದೆ.
ಸಿಇಒ ಅವರಿಂದ ಏಳಕ್ಕೂ ಹೆಚ್ಚು ಹಂತಗಳ ಕೆಳಗಿರುವ ಹುದ್ದೆಗಳ ಸಂಖ್ಯೆಯನ್ನು ಶೇ. 20 ರಷ್ಟು ಇಳಿಸಲಾಗಿದೆ.
ಕಾರ್ಯಾಚರಣೆ ಮತ್ತು ತಂತ್ರಜ್ಞಾನ ವಿಭಾಗಗಳನ್ನು ಪರಸ್ಪರ ವಿಲೀನಗೊಳಿಸಲಾಗುತ್ತಿದೆ.
ಕಚೇರಿಗೆ ಮರಳಲು ಆದೇಶ:
ಮನೆಯಿಂದಲೇ ಕೆಲಸ (ವರ್ಕ್ ಫ್ರಮ್ ಹೋಮ್) ಮಾಡುತ್ತಿರುವ ಬಹುತೇಕ ಸಿಬ್ಬಂದಿಯನ್ನು ಕಚೇರಿಗೆ ಮರಳುವಂತೆ ಉಬರ್ ಸೂಚಿಸಿದೆ. ಇನ್ನುಮುಂದೆ ಶೇ. 1ಕ್ಕಿಂತ ಕಡಿಮೆ ನೌಕರರು ಮಾತ್ರ ಸಂಪೂರ್ಣ ರಿಮೋಟ್ ಆಗಿ ಕೆಲಸ ಮಾಡಲಿದ್ದಾರೆ. ಉಳಿದ ಸಿಬ್ಬಂದಿ ವಾರಕ್ಕೆ ಕನಿಷ್ಠ ಮೂರು ದಿನ ಕಚೇರಿಯಿಂದಲೇ ಕೆಲಸ ಮಾಡಬೇಕಾದ ‘ಹೈಬ್ರಿಡ್’ ನಿಯಮವನ್ನು ಕಡ್ಡಾಯಗೊಳಿಸಲಾಗಿದೆ.
ಸ್ವಯಂಚಾಲಿತ ಟ್ಯಾಕ್ಸಿ ಯೋಜನೆಗೆ ವಿಳಂಬದ ಆತಂಕ:
ಮತ್ತೊಂದೆಡೆ, ಯುಕೆಯಲ್ಲಿ ಚಾಲಕರಹಿತ ‘ರೋಬೋಟ್ಯಾಕ್ಸಿ’ ಸೇವೆಗಳನ್ನು ಆರಂಭಿಸಲು ವೇವ್ (Wayve) ಸಂಸ್ಥೆಯೊಂದಿಗೆ ಕೈಜೋಡಿಸಿರುವ ಉಬರ್ಗೆ ನಿಯಂತ್ರಕ ಅನುಮತಿಗಳ ತೊಡಕು ಎದುರಾಗಿದೆ. ಟ್ರಾನ್ಸ್ಪೋರ್ಟ್ ಫಾರ್ ಲಂಡನ್ (TfL) ಮತ್ತು ಚಾಲನಾ ಮಾನದಂಡಗಳ ಸಂಸ್ಥೆಯ (DVSA) ಅಂತಿಮ ಮಾರ್ಗಸೂಚಿಗಳು ಲಭ್ಯವಾಗದ ಹಿನ್ನೆಲೆಯಲ್ಲಿ ಈ ವರ್ಷ ಆರಂಭವಾಗಬೇಕಿದ್ದ ಈ ಯೋಜನೆ ಕೊಂಚ ವಿಳಂಬವಾಗುವ ಸಾಧ್ಯತೆಯಿದೆ.
