ದೇಶದ ಅತಿದೊಡ್ಡ ಟೆಲಿಕಾಂ ಸಂಸ್ಥೆ ರಿಲಯನ್ಸ್ ಜಿಯೋ ತನ್ನ ಅಗ್ಗದ ಜಿಯೋಭಾರತ್ ಹಾಗೂ ಜಿಯೋಫೋನ್ ಪ್ಲಾನ್ಗಳಲ್ಲಿ ಮಹತ್ವದ ಬದಲಾವಣೆಗಳನ್ನು ಜಾರಿಗೆ ತಂದಿದೆ. TRAI ನಿರ್ದೇಶನದ ಮೇರೆಗೆ ಟ್ಯಾರಿಫ್ ವ್ಯವಸ್ಥೆಯನ್ನು ಮರುಸಂರಚಿಸಿರುವ ಜಿಯೋ, ಹಳೆಯ ಜಿಯೋಫೋನ್ ಪ್ಲಾನ್ಗಳನ್ನು ಸಂಪೂರ್ಣವಾಗಿ ಕೈಬಿಟ್ಟಿದೆ.
ಟ್ರಾಯ್ ಸೂಚನೆಗಳ ಪ್ರಕಾರ, ನಿರ್ದಿಷ್ಟ ಸಾಧನಗಳಿಗೆ ಮಾತ್ರ ಸೀಮಿತವಾಗಿದ್ದ ಪ್ಲಾನ್ಗಳು ಪಾರದರ್ಶಕತೆ ಇಲ್ಲದೆ ತಾರತಮ್ಯ ಉಂಟುಮಾಡುತ್ತವೆ ಎಂಬ ಕಾರಣದಿಂದ ಜಿಯೋ ತನ್ನ ಯೋಜನೆಗಳನ್ನು ಮರುನಾಮಕರಣ ಮಾಡಿದೆ. ಇದೀಗ ‘ಜಿಯೋಭಾರತ್ ಪ್ಲಾನ್’ಗಳನ್ನು “4G ಫೀಚರ್ ಫೋನ್ ಪ್ಲಾನ್” ಎಂದು ಹಾಗೂ ಡೇಟಾ ಆಡ್-ಆನ್ ಯೋಜನೆಗಳನ್ನು “4G ಫೀಚರ್ ಫೋನ್ ಆಡ್-ಆನ್” ಎಂದು ಕರೆಯಲಾಗುತ್ತಿದೆ.
ಮೇ 1, 2026ರಿಂದ ಜಾರಿಗೆ ಬಂದ ಹೊಸ ಪ್ಲಾನ್ಗಳ ಪ್ರಕಾರ, ₹123 ಪ್ಲಾನ್ನಲ್ಲಿ 28 ದಿನಗಳ ವ್ಯಾಲಿಡಿಟಿ, ಅನಿಯಮಿತ ಕರೆಗಳು, ದಿನಕ್ಕೆ 0.5GB ಡೇಟಾ (ಒಟ್ಟು 14GB) ಮತ್ತು 300 SMS ಸೌಲಭ್ಯ ಲಭ್ಯವಿದೆ. ₹234 ಪ್ಲಾನ್ 56 ದಿನಗಳು, ₹369 ಪ್ಲಾನ್ 84 ದಿನಗಳು ಹಾಗೂ ₹1234 ಪ್ಲಾನ್ 336 ದಿನಗಳ ವ್ಯಾಲಿಡಿಟಿ ನೀಡುತ್ತವೆ, ಎಲ್ಲದಲ್ಲೂ ದಿನಕ್ಕೆ 0.5GB ಡೇಟಾ ಮತ್ತು ಅನಿಯಮಿತ ಕರೆಗಳ ಸೌಲಭ್ಯ ಇದೆ.ಇದಲ್ಲದೆ, ₹26ರಿಂದ ₹182ರವರೆಗೆ ವಿವಿಧ ಡೇಟಾ ಆಡ್-ಆನ್ ಪ್ಲಾನ್ಗಳನ್ನೂ ಜಿಯೋ ಪರಿಚಯಿಸಿದೆ.
ಹೊಸ ಗ್ರಾಹಕರಿಗಾಗಿ ₹21 ಪ್ರಥಮ ರೀಚಾರ್ಜ್ ಯೋಜನೆ ಕೂಡ ಲಭ್ಯವಿದ್ದು, ಇದರಲ್ಲಿ 4 ದಿನಗಳ ಕಾಲ ಅನಿಯಮಿತ ಕರೆಗಳು, ದಿನಕ್ಕೆ 0.5GB ಡೇಟಾ ಹಾಗೂ 15 SMS ದೊರೆಯಲಿದೆ.
ಈ ಬದಲಾವಣೆಯೊಂದಿಗೆ, ಹಿಂದಿನ ₹91 ಅಗ್ಗದ ಪ್ಲಾನ್ ಇನ್ನು ಲಭ್ಯವಿಲ್ಲ. ಕನಿಷ್ಠ ₹123 ಪ್ಲಾನ್ನಿಂದಲೇ ರೀಚಾರ್ಜ್ ಪ್ರಾರಂಭವಾಗಬೇಕಿರುವುದರಿಂದ, ಆರಂಭಿಕ ದರದಲ್ಲಿ ಏರಿಕೆಯಾದಂತಾಗಿದೆ.
