ಭಾರತದ ಶ್ರೀಮಂತ ನಟರ ಪಟ್ಟಿ ಪ್ರಕಟ: ಆಸ್ತಿ ಮೌಲ್ಯ ಇಳಿಕೆಯಾದರೂ ಅಗ್ರಸ್ಥಾನದಲ್ಲೇ ಶಾರುಖ್ ಖಾನ್.!

ಮುಂಬೈ.ಸೆಪ್ಟೆಂಬರ್.25: ದೇಶದ ಅತ್ಯಂತ ಸಿರಿವಂತರ ವಿವರಗಳನ್ನು ಒಳಗೊಂಡ ಹೂರೂನ್ ಇಂಡಿಯಾ ರಿಚ್ ಲಿಸ್ಟ್ 2026 ಬಿಡುಗಡೆಯಾಗಿದೆ. ಆಗಸ್ಟ್ 2026ರ ಆಸ್ತಿ ಮೌಲ್ಯದ ಲೆಕ್ಕಾಚಾರದ ಆಧಾರದ ಮೇಲೆ ತಯಾರಿಸಲಾಗಿರುವ ಈ ಪಟ್ಟಿಯಲ್ಲಿ ಉದ್ಯಮ ಲೋಕದ ಪ್ರಮುಖರ ಜೊತೆಗೆ ಬಾಲಿವುಡ್‌ನ ತಾರೆಯರೂ ಗಣನೀಯ ಸ್ಥಾನ ಪಡೆದುಕೊಂಡಿದ್ದಾರೆ.

ಅಗ್ರಸ್ಥಾನದಲ್ಲಿ ಮುಂದುವರಿದ ಶಾರುಖ್ ಖಾನ್

2023ರ ನಂತರ ಯಾವುದೇ ಚಿತ್ರಗಳು ಬಿಡುಗಡೆಯಾಗದಿದ್ದರೂ ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್ ಭಾರತದ ಅತ್ಯಂತ ಶ್ರೀಮಂತ ನಟನಾಗಿ ತನ್ನ ಪಟ್ಟವನ್ನು ಕಾಯ್ದುಕೊಂಡಿದ್ದಾರೆ. ಹೂರೂನ್ ಇಂಡಿಯಾ ಪಟ್ಟಿಯ 15ನೇ ಆವೃತ್ತಿಯ ಪ್ರಕಾರ, ಅವರ ಒಟ್ಟು ಆಸ್ತಿ ಮೌಲ್ಯ ಸದ್ಯ 10,000 ಕೋಟಿ ರೂಪಾಯಿಗಳಷ್ಟಿದೆ. 2025ರ ಪಟ್ಟಿಯಲ್ಲಿ ಅವರ ಆಸ್ತಿ 12,490 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದ್ದು, ಈ ಬಾರಿ ಅದರಲ್ಲಿ ಸುಮಾರು ಶೇಕಡಾ 20ರಷ್ಟು ಕುಸಿತ ದಾಖಲಾಗಿದೆ. ಈ ವರ್ಷದ ಆರಂಭದಲ್ಲಿ ಬಿಡುಗಡೆಯಾಗಿದ್ದ ಜಾಗತಿಕ ಪಟ್ಟಿಯಲ್ಲಿ ಶಾರುಖ್ ಆಸ್ತಿಯನ್ನು 10,800 ಕೋಟಿ ರೂಪಾಯಿ ಎಂದು ಉಲ್ಲೇಖಿಸಲಾಗಿತ್ತು.

ಚಿತ್ರರಂಗವನ್ನು ಮೀರಿದ ಬಿಸಿನೆಸ್ ಸಾಮ್ರಾಜ್ಯ

ಶಾರುಖ್ ಖಾನ್ ಸಂಪತ್ತು ಕೇವಲ ಸಿನಿಮಾ ನಟನೆಯಿಂದ ಮಾತ್ರ ಬಂದಿದ್ದಲ್ಲ. ಪತ್ನಿ ಗೌರಿ ಖಾನ್ ಜೊತೆ ಸೇರಿ ನಡೆಸುತ್ತಿರುವ ರೆಡ್ ಚಿಲ್ಲೀಸ್ ಎಂಟರ್‌ಟೈನ್‌ಮೆಂಟ್ ನಿರ್ಮಾಣ ಸಂಸ್ಥೆ ಹಾಗೂ ಐಪಿಎಲ್‌ನ ಕೋಲ್ಕತ್ತಾ ನೈಟ್ ರೈಡರ್ಸ್ ಸೇರಿದಂತೆ ಹಲವು ಅಂತಾರಾಷ್ಟ್ರೀಯ ಕ್ರಿಕೆಟ್ ತಂಡಗಳಲ್ಲಿ ಪಾಲು ಹೊಂದಿರುವ ನೈಟ್ ರೈಡರ್ಸ್ ಸ್ಪೋರ್ಟ್ಸ್ ಅವರ ಆದಾಯದ ಪ್ರಮುಖ ಮೂಲಗಳಾಗಿವೆ. ಜೊತೆಗೆ ಬ್ರಾಂಡ್ ಪ್ರಚಾರಗಳು ಮತ್ತು ರೆಡ್ ಚಿಲ್ಲೀಸ್‌ನ ವಿಎಫ್‌ಎಕ್ಸ್ ವ್ಯವಹಾರ ಅವರ ಆರ್ಥಿಕ ಸಾಮರ್ಥ್ಯವನ್ನು ಇನ್ನಷ್ಟು ಹೆಚ್ಚಿಸಿವೆ.

ಎರಡನೇ ಸ್ಥಾನಕ್ಕೆ ಜಿಗಿದ ಅಮಿತಾಭ್ ಬಚ್ಚನ್

ಶಾರುಖ್ ಖಾನ್ ನಂತರದ ಸ್ಥಾನದಲ್ಲಿ ಹಿರಿಯ ನಟ ಅಮಿತಾಭ್ ಬಚ್ಚನ್ ಇದ್ದು, ಅವರ ಒಟ್ಟು ಸಂಪತ್ತು 4,000 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ. 2025ರ ಪಟ್ಟಿಯಲ್ಲಿ 1,630 ಕೋಟಿ ರೂಪಾಯಿ ಹೊಂದಿದ್ದ ಬಿಗ್ ಬಿ, ಈ ಬಾರಿ ತಮ್ಮ ಸಂಪತ್ತಿನಲ್ಲಿ ಭಾರಿ ಏರಿಕೆ ಕಂಡಿದ್ದಾರೆ. ಹಲವು ದಶಕಗಳ ಚಲನಚಿತ್ರ ವೃತ್ತಿಜೀವನ, ರಿಯಲ್ ಎಸ್ಟೇಟ್, ಹೂಡಿಕೆಗಳು ಮತ್ತು ಕುಟುಂಬ ಕಚೇರಿಯ ಮೂಲಕ ನಿರ್ವಹಿಸಲಾಗುವ ಆಸ್ತಿಗಳು ಅವರ ಆದಾಯವನ್ನು ಹೆಚ್ಚಿಸಿವೆ.

ಮೂರನೇ ಸ್ಥಾನದಲ್ಲಿ ಸಲ್ಮಾನ್ ಖಾನ್

ಬಾಲಿವುಡ್‌ನ ಮತ್ತೊಬ್ಬ ಸೂಪರ್‌ಸ್ಟಾರ್ ಸಲ್ಮಾನ್ ಖಾನ್ 3,000 ಕೋಟಿ ರೂಪಾಯಿ ಆಸ್ತಿ ಮೌಲ್ಯದೊಂದಿಗೆ ಮೂರನೇ ಸ್ಥಾನದಲ್ಲಿದ್ದಾರೆ. ದೀರ್ಘಕಾಲದ ಚಿತ್ರರಂಗದ ಅನುಭವ, ಬ್ರಾಂಡ್ ರಾಯಭಾರತ್ವ, ಕಿರುತೆರೆ ಕಾರ್ಯಕ್ರಮಗಳ ನಿರೂಪಣೆ ಮತ್ತು ವೈವಿಧ್ಯಮಯ ವ್ಯಾಪಾರ ಯೋಜನೆಗಳು ಅವರ ಸಂಪತ್ತಿನ ಮೂಲಗಳಾಗಿವೆ.

ನಾಲ್ಕನೇ ಸ್ಥಾನ ಗಿಟ್ಟಿಸಿಕೊಂಡ ಹೃತಿಕ್ ರೋಷನ್

ನಟ ಹೃತಿಕ್ ರೋಷನ್ 2,500 ಕೋಟಿ ರೂಪಾಯಿಗಳ ಸಂಪತ್ತಿನೊಂದಿಗೆ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆದಿದ್ದಾರೆ. ಕಳೆದ ವರ್ಷ ಅವರ ಆಸ್ತಿ 2,160 ಕೋಟಿ ರೂಪಾಯಿಗಳಾಗಿದ್ದು, ಈ ಬಾರಿ ಅದರಲ್ಲಿ ಏರಿಕೆ ಕಂಡುಬಂದಿದೆ. ಚಿತ್ರರಂಗದ ಜೊತೆಗೆ ಅವರ ಪ್ರಸಿದ್ಧ ಫಿಟ್‌ನೆಸ್ ಮತ್ತು ಲೈಫ್‌ಸ್ಟೈಲ್ ಬ್ರಾಂಡ್ ‘ಎಚ್‌ಆರ್‌ಎಕ್ಸ್’ ಅವರ ಪ್ರಮುಖ ಆರ್ಥಿಕ ಬಲವಾಗಿದೆ.