ಸುದ್ದಿಒನ್, ಚಿತ್ರದುರ್ಗ: ಚಿನ್ನ ಖರೀದಿಸುವ ನೆಪದಲ್ಲಿ ಬಂದು, ಗ್ರಾಹಕರ ಹಳೇ ಚಿನ್ನದ ಬ್ಯಾಗ್ ಅನ್ನೇ ಕದ್ದೊಯ್ದಿರುವ ಪ್ರಕರಣ ಚಿತ್ರದುರ್ಗದಲ್ಲಿ ಬೆಳಕಿಗೆ ಬಂದಿದೆ. ಹೊಳಲ್ಕೆರೆ ಪಟ್ಟಣದಲ್ಲಿರುವ ಸಂಧ್ಯಾದೀಪ ಜ್ಯುವೆಲ್ಲರಿ ಶಾಪ್ ನಲ್ಲಿ ಈ ಘಟನೆ ಅಕ್ಟೋಬರ್ 15 ರಂದು ನಡೆದಿದ್ದು, ಇದೀಗ ಪ್ರಕರಣ ಬೆಳಕಿಗೆ ಬಂದಿದೆ.
ಸುಮಿತ್ರಾ ಎಂಬುವವರು ತಮ್ಮ ಬಳಿಯಿದ್ದ ಹಳೆ ಚಿನ್ನ ಕೊಟ್ಟು, ಹೊಸ ಚಿನ್ನ ಖರೀದಿಸುವುದಕ್ಕಾಗಿ ಶಾಪ್ ಗೆ ಬಂದಿದ್ದರು. ಹಳೆಯ ಚಿನ್ನವಿದ್ದ ಬ್ಯಾಗ್ ಅನ್ನು ಇಟ್ಟು, ಒಡವೆ ನೋಡುವುದರಲ್ಲಿ ಮಗ್ನರಾಗಿದ್ದರು.
ಹೊಳಲ್ಕೆರೆ | ಚಿನ್ನ ಖರೀದಿಸುವ ಸೋಗಿನಲ್ಲಿ ಬಂದ ಕಳ್ಳರು ಮಾಡಿದ್ದೇನು ? #holalkere #ಹೊಳಲ್ಕೆರೆ pic.twitter.com/h40blGttZc
— suddione-kannada News (@suddione) November 8, 2023
ಸುಮಿತ್ರಾ ಒಡವೆ ತೆಗೆದುಕೊಳ್ಳಲು ಬಂದ ಸಮಯದಲ್ಲಿಯೇ ಒಬ್ಬ ಮಹಿಳೆ, ಬಾಲಕನೊಂದಿಗೆ ಜ್ಯುವೆಲ್ಲರಿ ಶಾಪ್ ಗೆ ಬಂದಿದ್ದಾಳೆ. ಚಿನ್ನವನ್ನು ತೆಗೆದುಕೊಳ್ಳುವ ಡ್ರಾಮಾ ಮಾಡಿದ್ದಾಳೆ. ಆ ಕಡೆ ಚಿನ್ನ ನೋಡಿವಂತೆ ನಾಟಕವಾಡುತ್ತಿದ್ದರೆ, ಈ ಕಡೆ ಬಾಲಕ ತನ್ನ ಕೈಚಳಕ ತೋರಿಸಿದ್ದಾನೆ. ತಾನು ತಂದಿದ್ದ ಬ್ಯಾಗ್ ಒಂದನ್ನು, ಹಳೆ ಚಿನ್ನವಿದ್ದ ಬ್ಯಾಗ್ ಮೇಲೆ ಹಾಕಿದ್ದಾನೆ. ಸ್ವಲ್ಪ ಸ್ವಲ್ಪವೇ ಬ್ಯಾಗ್ ಅನ್ನು ಕೆಳಗಡೆಗೆ ಜರುಗಿಸುತ್ತಾ ಬಂದಿದ್ದಾನೆ.
ಯಾರು ಗಮನ ಕೊಡಯತ್ತಿಲ್ಲ ಎಂಬುದನ್ನು ಗಮನಿಸಿದ ಬಾಲಕ, ಹಳೆ ಚಿನ್ನವಿದ್ದ ಬ್ಯಾಗ್ ಅನ್ನು ತೆಗೆದುಕೊಂಡು ಹೊರಗೆ ಹೊರಟೆ ಬಿಟ್ಟಿದ್ದಾನೆ. ಈ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಸುಮಿತ್ರಾ ಎಂಬ ಮಹಿಳೆ ತಂದಿದ್ದ ಬ್ಯಾಗ್ ನಲ್ಲಿ ಸುಮಾರು 1 ಲಕ್ಷದ 25 ಸಾವಿರ ಬೆಲೆ ಬಾಳುವ ಚಿನ್ನಾಭರಣವಿತ್ತು. ಈಗ ಅದು ಕಳ್ಳರ ಪಾಲಾಗಿದೆ. ಈ ಸಂಬಂಧ ಹೊಳಲ್ಕೆರೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
