ಮಂಡ್ಯ: ಒಂಭತ್ತು ತಿಂಗಳು ಅದೆಷ್ಟೇ ಕಷ್ಟವಾದ್ರೂ ಮಗುವನ್ನ ತುಂಬಾ ಕಾಳಜಿಯಿಂದ ನೋಡಿಕೊಳ್ಳುವವಳು ತಾಯಿ. ಆದ್ರೆ ಹುಟ್ಟಿದ ಮೇಲೆ ಅದೇಕೋ ತಾನೇ ಹೆತ್ತ ಮಗು ಅಂತಾನು ನೋಡದೆ ತಾನೂ ಸಾಯುವುದರ ಜೊತೆ ಮಗುವನ್ನ ಸಾಯಿಸುವ ಹಂತ ತಲುಪಿ ಬಿಡ್ತಾರೆ. ಇಷ್ಟು ಕ್ರೂರ ಮನಸ್ಥಿತಿಗೆ ಅದೆಷ್ಟು ನೋವಿರುತ್ತೋ ಏನೋ. ಇದೀಗ ಅಂತದ್ದೇ ಘಟನೆಯೊಂದು ಜಿಲ್ಲೆಯ ಶ್ರೀರಂಗಪಟ್ಟಣದ ಗೋಸಾಯ್ ಘಾಟ್ ಬಳಿ ನಡೆದಿದೆ.
31 ವರ್ಷದ ಭಾರ್ಗವಿ 3 ವರ್ಷದ ದೀಕ್ಷಾ ಮೃತರು. ಭಾರ್ಗವಿ ಮೈಸೂರಿನ ನಿವಾಸಿ. ಐದು ವರ್ಷದ ಹಿಂದೆ ಪಾಂಡವಪುರ ತಾಲೂಕಿನ ಪ್ರದೀಪ್ ಎಂಬಾತನನ್ನ ಮದುವೆಯಾಗಿದ್ದರು. ಮೈಸೂರಿನ ಹೂಟಗಳ್ಳಿಯಲ್ಲಿ ವಾಸವಾಗಿದ್ದ ದಂಪತಿಗೆ ದೀಕ್ಷಾ ಎಂಬ 3 ವರ್ಷದ ಮಗಳು ಇದ್ದಳು.
ಆದ್ರೆ ಈ ದಂಪತಿಯ ನಡುವೆ ಆಗಾಗ ಜಗಳ ಆಗ್ತಾನೆ ಇತ್ತಂತೆ. ಕೌಟುಂಬಿಕ ಕಲಹದಿಂದ ಬೇಸತ್ತ ಭಾರ್ಗವಿ ತನ್ನ ಮೂರು ವರ್ಷದ ಕಂದಮ್ಮನೊಂದಿಗೆ ಕಾವೇರಿ ನದಿಗೆ ಹಾರಿ ಪ್ರಾಣ ಕಳೆದುಕೊಂಡಿದ್ದಾಳೆಂದು ಅನುಮಾನ ವ್ಯಕ್ತಪಡಿಸಿದ್ದಾರೆ. ಈ ಸಂಬಂಧ ಶ್ರೀರಂಗಪಟ್ಟಣ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಾಗಿದೆ.
