ಪಿತೂರಿ ನಡೆದಿದೆ, ನನ್ನ ಬಂಧನದ ಹಿಂದೆ ಗೂಡ್ಸೆ ಭಕ್ತರಿದ್ದಾರೆ : ಜಿಗ್ನೇಶ್ ಮೇವಾನಿ

ಗಾಂಧಿನಗರ: ಟ್ವೀಟ್ ಒಂದರ ವಿಚಾರಕ್ಕೆ ಅಸ್ಸಾಂ ಪೊಲೀಸರು ಗುಜರಾತ್ ಶಾಸಕ ಜಿಗ್ನೇಶ್ ಮೇವಾನಿಯನ್ನು ಬಂಧಿಸಿದ್ದರು. ಇದೀಗ ಹೊರ ಬಂದಿದ್ದಾರೆ. ಆದರೆ ಬಿಜೆಪಿ ಮೇಲೆ ಗರಂ ಆಗಿದ್ದು, ನನ್ನ ಬಂಧನದ ಹಿಂದೆ ಪ್ರಧಾನಿ ಕಾರ್ಯಾಲಯದ ಕೆಲ ಗೋಡ್ಸೆ ಭಕ್ತರ ಕೈವಾಡವಿದೆ. ನನ್ನ ಬಂಧನ ಪೂರ್ವನಿಯೋಜಿತ ಪಿತೂರಿ ಎಂದಿದ್ದಾರೆ.

ನಾನು ಮಾಡಿದ ಟ್ವೀಟ್ ಸರಳವಾಗಿತ್ತು. ಶಾಂತಿ ಮತ್ತು ಸೌಹಾರ್ದತೆಗಾಗಿ ಪ್ರಧಾನಿ ಬಳಿ ಮನವಿ ಮಾಡಿದ್ದೆ ಅಷ್ಟೆ. ಅಷ್ಟಕ್ಕೆ ಅವರು ನನ್ನನ್ನು ಬಂಧಿಸಿದರು. ಇದು ಏನನ್ನು ಸೂಚಿಸುತ್ತದೆ..? ಇದು ಪೂರ್ವನಿಯೋಜಿತವೇ ತಾನೆ. ನನ್ನ ವಿರುದ್ಧ ಎಫ್ಐಆರ್ ಕಾಪಿ ನೀಡಿಲ್ಲ. ನನ್ನ ವಿರುದ್ಧ ಹಾಕಿರುವ ಸೆಕ್ಷನ್ ಗಳನ್ನು ಬಹಿರಂಗ ಪಡಿಸಿಲ್ಲ. ನನ್ನ ವಕೀಲರೊಂದಿಗೆ ಮಾತನಾಡಲು ಬಹಿಷ್ಕರಿಸಲಾಗಿದೆ. ಒಬ್ಬ ಶಾಸಕನಾಗಿ ನನಗಿರುವ ವಿಶೇಷತೆಯನ್ನು ಕಡೆಗಣಿಸಲಾಗಿದೆ ಎಂದಿದ್ದಾರೆ.

ಇನ್ನು ಗುಜರಾತ್ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿ, ಪ್ರಶ್ನೆ ಪತ್ರಿಕೆ ಸೋರಿಕೆಯಾಗಿದೆ. ಆದರೆ ಆ ಪ್ರಕರಣದ ವಿರುದ್ಧ ಯಾವುದೆ ಪ್ರಕರಣ ದಾಖಲಾಗಿಲ್ಲ. ದಲಿತ ಮಹಿಳೆಯೊಬ್ಬರು ಸಚಿವರ ಮೇಲೆ ಅತ್ಯಾಚಾರ ಆರೋಪ ಮಾಡಿದ್ದಾರೆ. ಆ ಪ್ರಕರಣದಲ್ಲೂ ಬಂಧನವಾಗಿಲ್ಲ. ಧರ್ಮ ಸಂಸದ್ ನಿರ್ದಿಷ್ಟ ಸಮುದಾಯದ ನರಮೇಧಕ್ಕೆ ಕರೆ ನೀಡಲಾಗಿತ್ತು. ಅಂತವರ ವಿರುದ್ಧವೂ ಯಾವುದೇ ಕ್ರಮ ಕೈಗೊಂಡಿಲ್ಲ. ಆದರೆ ನನ್ನ ಒಂದು ಟ್ವೀಟ್ ನಿಂದ ನನ್ನನ್ನು ಬಂಧಿಸಿದರು ಎಂದು ಗುಜರಾತ್ ಸರ್ಕಾರದ ವಿರುದ್ಧ ಆಕ್ರೋಶ ಹೊರ ಹಾಕಿದ್ದಾರೆ.