ನವದೆಹಲಿ: ದೆಹಲಿ-ಎನ್ಸಿಆರ್ನಲ್ಲಿ ಕಾರು, ಆಟೋ ಹಾಗೂ ಕ್ಯಾಬ್ ಚಾಲಕರಿಗೆ ಶನಿವಾರದಿಂದ ಇಂಧನ ವೆಚ್ಚದ ಹೊರೆ ಹೆಚ್ಚಾಗಿದೆ. ಇಂದ್ರಪ್ರಸ್ಥ ಗ್ಯಾಸ್ ಲಿಮಿಟೆಡ್ (IGL) ಸಿಎನ್ಜಿ ದರವನ್ನು ಪ್ರತಿ ಕೆಜಿಗೆ ₹3.89ರಷ್ಟು ಹೆಚ್ಚಿಸಿದ್ದು, ಆಗಸ್ಟ್ 29ರ ಬೆಳಿಗ್ಗೆ 6 ಗಂಟೆಯಿಂದ ಹೊಸ ದರ ಜಾರಿಗೆ ಬಂದಿದೆ.ದರ ಏರಿಕೆಯ ಬಳಿಕ ದೆಹಲಿಯಲ್ಲಿ ಸಿಎನ್ಜಿ ಬೆಲೆ ಪ್ರತಿ ಕೆಜಿಗೆ ₹86.98ಕ್ಕೆ ತಲುಪಿದೆ. ಈ ಹಿಂದೆ ₹83.09ರಷ್ಟಿತ್ತು. ದೆಹಲಿ ಮಾತ್ರವಲ್ಲದೆ ನೋಯ್ಡಾ, ಗ್ರೇಟರ್ ನೋಯ್ಡಾ ಹಾಗೂ ಗಾಜಿಯಾಬಾದ್ನಲ್ಲೂ ಪರಿಷ್ಕೃತ ದರಗಳು ಜಾರಿಗೆ ಬಂದಿವೆ.
ಸಿಎನ್ಜಿ ದರ ಏರಿಕೆಯಿಂದ ಆಟೋ, ಕ್ಯಾಬ್ ಹಾಗೂ ಸಿಎನ್ಜಿ ಕಾರು ಬಳಸುವವರಿಗೆ ಪ್ರಯಾಣ ವೆಚ್ಚ ಹೆಚ್ಚಾಗುವ ಸಾಧ್ಯತೆ ಇದೆ.
ದೆಹಲಿ-ಎನ್ಸಿಆರ್ನಲ್ಲಿ ಈ ಹಿಂದೆ ಮೇ ತಿಂಗಳಲ್ಲೂ ಸಿಎನ್ಜಿ ದರ ಹೆಚ್ಚಿಸಲಾಗಿತ್ತು. ಮೇ 26ರಂದು ಪ್ರತಿ ಕೆಜಿಗೆ ₹2ರಷ್ಟು ಏರಿಕೆ ಮಾಡಿದ ಬಳಿಕ ದೆಹಲಿಯಲ್ಲಿ ಸಿಎನ್ಜಿ ದರ ₹81.09ರಿಂದ ₹83.09ಕ್ಕೆ ಹೆಚ್ಚಾಗಿತ್ತು. ನೋಯ್ಡಾ, ಗ್ರೇಟರ್ ನೋಯ್ಡಾ ಮತ್ತು ಗಾಜಿಯಾಬಾದ್ನಲ್ಲಿ ದರ ₹88.70ಕ್ಕೆ ತಲುಪಿತ್ತು.
ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ದ್ರವೀಕೃತ ನೈಸರ್ಗಿಕ ಅನಿಲ (LNG) ಬೆಲೆ ಗಮನಾರ್ಹವಾಗಿ ಏರಿಕೆಯಾಗಿರುವುದರಿಂದ ಸಿಎನ್ಜಿ ದರ ಹೆಚ್ಚಿಸುವ ಅನಿವಾರ್ಯತೆ ಎದುರಾಗಿದೆ ಎಂದು IGL ತಿಳಿಸಿದೆ.
ಇನ್ಪುಟ್ ಅನಿಲದ ವೆಚ್ಚ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಸಿಎನ್ಜಿ ಪೂರೈಕೆಯ ನಿರಂತರತೆ ಹಾಗೂ ವಿಶ್ವಾಸಾರ್ಹತೆಯನ್ನು ಕಾಪಾಡಿಕೊಳ್ಳಲು ಪ್ರತಿ ಕೆಜಿಗೆ ₹3.89ರಷ್ಟು ದರ ಪರಿಷ್ಕರಣೆ ಮಾಡಲಾಗಿದೆ ಎಂದು ಕಂಪನಿ ಹೇಳಿದೆ.ದರ ಏರಿಕೆಯ ನಂತರವೂ ದೆಹಲಿಯಲ್ಲಿ ಸಿಎನ್ಜಿ ಗ್ರಾಹಕರಿಗೆ ಕೈಗೆಟುಕುವ ಇಂಧನ ಆಯ್ಕೆಗಳಲ್ಲಿ ಒಂದಾಗಿದೆ ಎಂದು IGL ಹೇಳಿದೆ. ಆಮದು ಮಾಡಿಕೊಳ್ಳುವ ಸ್ಪಾಟ್ LNG ಬೆಲೆಗಳಲ್ಲಿನ ಏರಿಳಿತದ ಪರಿಣಾಮವನ್ನು ಸಿಎನ್ಜಿ ಗ್ರಾಹಕರು ಬಹುತೇಕ ನೇರವಾಗಿ ಎದುರಿಸಬೇಕಾಗುವುದಿಲ್ಲ ಎಂದು ಕಂಪನಿ ತಿಳಿಸಿದೆ.
