ರಾಜಾವೀರ ಮದಕರಿ ನಾಯಕರ ಸ್ಮರಣೋತ್ಸವ ; ಮುರುಘಾ ಮಠಕ್ಕೆ ಆಗಮಿಸಿದ ಭವ್ಯ ರಥಯಾತ್ರೆ

ಸುದ್ದಿಒನ್, ಚಿತ್ರದುರ್ಗ, ಮೇ 14: ಐತಿಹಾಸಿಕ ಚಿತ್ರದುರ್ಗದ  ಅರಸ ರಾಜಾವೀರ ಮದಕರಿ ನಾಯಕರ ಪುಣ್ಯ ಸ್ಮರಣೋತ್ಸವದ ಅಂಗವಾಗಿ ಹಮ್ಮಿಕೊಳ್ಳಲಾಗಿರುವ ಭವ್ಯ ರಥಯಾತ್ರೆಗೆ ಗುರುವಾರ ಕೋಟೆ ನಾಡಿನಲ್ಲಿ ಅದ್ಧೂರಿ ಸ್ವಾಗತ ದೊರೆಯಿತು. ನಗರದ ಮುರುಘರಾಜೇಂದ್ರ ಬೃಹನ್ಮಠಕ್ಕೆ ರಥಯಾತ್ರೆ ಆಗಮಿಸಿದ ಸಂದರ್ಭದಲ್ಲಿ ಭಕ್ತರು ಹಾಗೂ ಮಠದ ಆಡಳಿತ ಮಂಡಳಿ ಭಕ್ತಿಪೂರ್ವಕವಾಗಿ ಬರಮಾಡಿಕೊಂಡರು.

ರಥಯಾತ್ರೆಯನ್ನು ಸ್ವಾಗತಿಸಿ ಮಾತನಾಡಿದ ಮಠದ ಆಡಳಿತ ಮಂಡಳಿ ಸದಸ್ಯರಾದ ಡಾ. ಬಸವಕುಮಾರ ಸ್ವಾಮೀಜಿ, ಚಿತ್ರದುರ್ಗದ ನಾಯಕ ಅರಸರಿಗೂ ಮತ್ತು ಮುರುಘಾ ಮಠಕ್ಕೂ ಶತಮಾನಗಳ ಹಿಂದಿನಿಂದಲೂ ಅವಿನಾಭಾವ ಸಂಬಂಧವಿದೆ. ಮಠದ ಮೂಲಕರ್ತೃಗಳಾದ ಶ್ರೀ ಮುರಿಗೆಯ ಶಾಂತವೀರರ ಆಶೀರ್ವಾದ ಬಲದಿಂದಲೇ ಅಂದು ನಾಯಕರು ಈ ನಾಡನ್ನು ಆಳಿದ ಇತಿಹಾಸವಿದೆ. ಅಂದಿನಿಂದ ಇಂದಿನವರೆಗೂ ಈ ಸಾಂಪ್ರದಾಯಿಕ ಸಂಬಂಧ ಮುಂದುವರಿಯುತ್ತಿರುವುದು ಹೆಮ್ಮೆಯ ವಿಷಯ ಎಂದರು.
ಚಿತ್ರದುರ್ಗದ ಅಸ್ತಿತ್ವಕ್ಕಾಗಿ ಮತ್ತು ಪ್ರಜೆಗಳ ರಕ್ಷಣೆಗಾಗಿ ಮದಕರಿ ನಾಯಕರು ನೀಡಿದ ಬಲಿದಾನ ಅಪಾರ. ಅಂತಹ ಪುಣ್ಯಪುರುಷರ ಸ್ಮರಣೆಯು ಮೇ 15ರಂದು ನಡೆಯಲಿದ್ದು, ಅದರ ಪೂರ್ವಭಾವಿಯಾಗಿ ಅಭಿಮಾನಿಗಳು ಅರಸರ ಮೂರ್ತಿಯೊಂದಿಗೆ ಐತಿಹಾಸಿಕ ಸ್ಥಳಗಳಿಗೆ ಭೇಟಿ ನೀಡುತ್ತಿರುವುದು ಶ್ಲಾಘನೀಯ ಎಂದು ಸ್ವಾಮೀಜಿ ಅಭಿಪ್ರಾಯಪಟ್ಟರು.

ದಾವಣಗೆರೆ ವಿರಕ್ತಮಠದ ಡಾ. ಬಸವಪ್ರಭು ಸ್ವಾಮೀಜಿ, ಶಿರಸಂಗಿ ಶ್ರೀ ಮಹಾಲಿಂಗೇಶ್ವರ ಮುರುಘರಾಜೇಂದ್ರ ಮಠದ ಶ್ರೀ ಬಸವ ಮಹಾಂತ ಸ್ವಾಮೀಜಿ, ಡಾಬಸ್ಪೇುಟೆ ವನಕಲ್ಲು ಮಲ್ಲೇಶ್ವರ ಮಹಾಸಂಸ್ಥಾನದ ಡಾ. ಬಸವ ರಮಾನಂದ ಸ್ವಾಮೀಜಿ ಅವರುಗಳು ಉಪಸ್ಥಿತರಿದ್ದು ಅರಸರ ಪ್ರತಿಮೆಗೆ ಗೌರವ ವಂದನೆ ಸಲ್ಲಿಸಿದರು. ಈ ಸಂದರ್ಭದಲ್ಲಿ ಪುಣ್ಯಸ್ಮರಣೆಯ ನೇತೃತ್ವ ವಹಿಸಿದ್ದ ಕುಮಾರ ಗರುಡ ಕೇಸರಿ, ಪ್ರಸನ್ನ, ಬಾಲಾಜಿ, ಜಯಂತ ಹಾಗೂ ಶ್ರೀಮಠದ ಅಭಿಮಾನಿ ಭಕ್ತರುಗಳು ಹಾಗೂ ಸಾರ್ವಜನಿಕರು ಇದ್ದರು.