CBSE ಹೊಸ ನಿಯಮ : ತೃತೀಯ ಭಾಷೆಯಲ್ಲಿ ಫೇಲ್ ಆದ್ರೆ ಸಿಗಲ್ಲ 10ನೇ ತರಗತಿ ಪಾಸಿಂಗ್ ಸರ್ಟಿಫಿಕೇಟ್!

ದೆಹಲಿ.ಜುಲೈ.14: ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿ ತನ್ನ ‘ತ್ರಿಭಾಷಾ ಸೂತ್ರ’ಕ್ಕೆ ಸಂಬಂಧಿಸಿದಂತೆ ಮಹತ್ವದ ಸ್ಪಷ್ಟನೆಯನ್ನು ನೀಡಿದೆ. 10ನೇ ತರಗತಿಯ ಬೋರ್ಡ್ ಪರೀಕ್ಷೆಯ ಪಾಸಿಂಗ್ ಸರ್ಟಿಫಿಕೇಟ್ ಪಡೆಯಬೇಕಾದರೆ ವಿದ್ಯಾರ್ಥಿಗಳು ಮೂರನೇ ಭಾಷೆಯಲ್ಲೂ ಕಡ್ಡಾಯವಾಗಿ ತೇರ್ಗಡೆಯಾಗಬೇಕು ಎಂದು ಸಿಬಿಎಸ್ಇ ತಿಳಿಸಿದೆ. ಈ ಕುರಿತು ವಿದ್ಯಾರ್ಥಿಗಳು ಮತ್ತು ಪೋಷಕರಲ್ಲಿದ್ದ ಗೊಂದಲಗಳಿಗೆ ತೆರೆ ಎಳೆಯಲು ಮಂಡಳಿಯು ಪ್ರಮುಖ ಪ್ರಕಟಣೆಯೊಂದನ್ನು ಹೊರಡಿಸಿದೆ.

ಸಿಬಿಎಸ್ಇ ಬಿಡುಗಡೆ ಮಾಡಿರುವ ‘FAQ’ (ಪದೇ ಪದೇ ಕೇಳಲಾಗುವ ಪ್ರಶ್ನೆಗಳು) ಪ್ರಕಾರ, ಸದ್ಯ 9ನೇ ತರಗತಿಯಲ್ಲಿರುವ ವಿದ್ಯಾರ್ಥಿಗಳಿಗೆ ಮೂರನೇ ಭಾಷೆಯ (R3) ಮೌಲ್ಯಮಾಪನವು ಆಂತರಿಕ ಮೌಲ್ಯಮಾಪನದ (Internal Assessment) ಮೂಲಕ ನಡೆಯುತ್ತದೆ. ಅಂದರೆ ಶಾಲೆಯ ಶಿಕ್ಷಕರೇ ಈ ಪರೀಕ್ಷೆಯನ್ನು ನಡೆಸಿ ಅಂಕಗಳನ್ನು ನೀಡಲಿದ್ದಾರೆ. ಈ ವಿದ್ಯಾರ್ಥಿಗಳು ಮುಂದಿನ ವರ್ಷ ಅಂದರೆ 2027-28ರ ಶೈಕ್ಷಣಿಕ ಸಾಲಿನಲ್ಲಿ 10ನೇ ತರಗತಿಯ ಬೋರ್ಡ್ ಪರೀಕ್ಷೆ ಬರೆಯುವಾಗ, ಅವರಿಗೆ ಮೂರನೇ ಭಾಷೆಯ ಲಿಖಿತ ಬೋರ್ಡ್ ಪರೀಕ್ಷೆ ಇರುವುದಿಲ್ಲ. ಆದರೆ, ಶಾಲಾ ಮಟ್ಟದಲ್ಲಿ ನಡೆಯುವ ಈ ಪರೀಕ್ಷೆಯಲ್ಲಿ ಪಾಸ್ ಆಗುವುದು ಕಡ್ಡಾಯವಾಗಿದೆ.

ಒಂದು ವೇಳೆ ವಿದ್ಯಾರ್ಥಿಯು 9ನೇ ತರಗತಿಯಲ್ಲಿ ಮೂರನೇ ಭಾಷೆಯ ಪರೀಕ್ಷೆಯಲ್ಲಿ ಅನುತ್ತೀರ್ಣರಾದರೆ (ಫೇಲ್), ಅವರನ್ನು 10ನೇ ತರಗತಿಗೆ ಪ್ರಮೋಟ್ ಮಾಡಲಾಗುತ್ತದೆ. ಆದರೆ, ಅವರು 10ನೇ ತರಗತಿಯಲ್ಲಿ ಓದುತ್ತಿರುವಾಗಲೇ 9ನೇ ತರಗತಿಯ ಆ ಮೂರನೇ ಭಾಷೆಯ ಪರೀಕ್ಷೆಯನ್ನು ಬರೆದು ಪಾಸ್ ಮಾಡಿಕೊಳ್ಳಬೇಕಾಗುತ್ತದೆ.

ಗಮನಿಸಿ: 10ನೇ ತರಗತಿಯ ಫಲಿತಾಂಶ ಪ್ರಕಟವಾಗುವ ಮೊದಲು ವಿದ್ಯಾರ್ಥಿಯು ಮೂರನೇ ಭಾಷೆಯಲ್ಲಿ ತೇರ್ಗಡೆಯಾಗದಿದ್ದರೆ, ಶಾಲೆಗಳು ಆ ವಿದ್ಯಾರ್ಥಿಗೆ ಮತ್ತೊಮ್ಮೆ ಪರೀಕ್ಷೆ (Re-exam) ನಡೆಸಲಿವೆ. ಈ ಪರೀಕ್ಷೆಯಲ್ಲೂ ಪಾಸ್ ಆಗದಿದ್ದರೆ ಸಿಬಿಎಸ್ಇಯಿಂದ 10ನೇ ತರಗತಿಯ ‘ಪಾಸ್ ಸರ್ಟಿಫಿಕೇಟ್’ ಸಿಗುವುದಿಲ್ಲ.

7 ಮತ್ತು 8ನೇ ತರಗತಿ ವಿದ್ಯಾರ್ಥಿಗಳಿಗೆ ಇರುವ ನಿಯಮಗಳೇನು?
ಈಗಿನ 7 ಮತ್ತು 8ನೇ ತರಗತಿ ವಿದ್ಯಾರ್ಥಿಗಳಿಗೆ: ಇವರು ಮುಂದಿನ ದಿನಗಳಲ್ಲಿ 9 ಮತ್ತು 10ನೇ ತರಗತಿಗೆ ಬಂದಾಗ ತ್ರಿಭಾಷಾ ಸೂತ್ರದ ಅಡಿಯಲ್ಲಿ ಮೂರು ಭಾಷೆಗಳನ್ನು ಓದಬೇಕಾಗುತ್ತದೆ. ಇದರಲ್ಲಿ ಎರಡು ಭಾರತೀಯ ಭಾಷೆಗಳಾಗಿರಬೇಕು. ಈಗಾಗಲೇ ಎರಡು ವಿದೇಶಿ/ಭಾರತೀಯೇತರ ಭಾಷೆಗಳನ್ನು ಆಯ್ದುಕೊಂಡಿರುವ ವಿದ್ಯಾರ್ಥಿಗಳು, ಮೂರನೇ ಭಾಷೆಯಾಗಿ ಕಡ್ಡಾಯವಾಗಿ ಒಂದು ಭಾರತೀಯ ಭಾಷೆಯನ್ನು ಓದಬೇಕಾಗುತ್ತದೆ. ಇವರಿಗೂ ಸಹ 10ನೇ ತರಗತಿಯಲ್ಲಿ ಮೂರನೇ ಭಾಷೆಗೆ ಬೋರ್ಡ್ ಪರೀಕ್ಷೆ ಇರುವುದಿಲ್ಲ.

ಈಗಿನ 6ನೇ ತರಗತಿ ವಿದ್ಯಾರ್ಥಿಗಳಿಗೆ: ಇನ್ನು ಮುಂದೆ ಬರುವ 6ನೇ ತರಗತಿಯ ಎಲ್ಲಾ ಬ್ಯಾಚ್ಗಳ ವಿದ್ಯಾರ್ಥಿಗಳು ಕಡ್ಡಾಯವಾಗಿ ಎರಡು ಭಾರತೀಯ ಭಾಷೆಗಳನ್ನು ಓದಬೇಕಾಗುತ್ತದೆ. ವಿಶೇಷವೆಂದರೆ, ಈ ಬ್ಯಾಚ್ನ ವಿದ್ಯಾರ್ಥಿಗಳು ಮುಂದೆ 10ನೇ ತರಗತಿಗೆ ತಲುಪಿದಾಗ, ಇವರು ಮೂರನೇ ಭಾಷೆಗೆ (R3) ಶಾಲಾ ಮಟ್ಟದ ಪರೀಕ್ಷೆಯ ಬದಲು ಕಡ್ಡಾಯವಾಗಿ ಬೋರ್ಡ್ ಪರೀಕ್ಷೆಯನ್ನೇ ಬರೆಯಬೇಕಾಗುತ್ತದೆ.