ಮೈಸೂರು: ಕರುನಾಡ ರತ್ನ, ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಈಗ ಡಾ. ಪುನೀತ್ ರಾಜ್‍ಕುಮಾರ್. ಮನೆ ಮನೆಯಲ್ಲೂ ಮನ ಮನದಲ್ಲೂ ಸ್ಥಾನ ಪಡೆದಿರುವ ನಮ್ಮ ಅಪ್ಪು ಇಷ್ಟು ಬೇಗ ಹೋಗಿದ್ದು, ಎಲ್ಲರಿಗೂ ನೋವು ಕಾಡುತ್ತಿದೆ. ಇಂದು ಅವರಿಗೆ ಗೌರವ ಡಾಕ್ಟರೇಟ್ ನೀಡಿ ಗೌರವಿಸಲಾಗಿದೆ.
ಪುನೀತ್ ರಾಜ್‍ಕುಮಾರ್ ಅವರ ಧರ್ಮಪತ್ನಿ ಅಶ್ವಿನಿ ಪುನೀತ್ ರಾಜ್‍ಕುಮಾರ್ ಅವರು ಪದವಿ ಸ್ವೀಕರಿಸಿದ್ದಾರೆ. ಮೈಸೂರು ವಿಶ್ವವಿದ್ಯಾನಿಲಯ ಇಂದು ನಡೆದ ಕಾರ್ಯಕ್ರಮದಲ್ಲಿ ಈ ಪ್ರಶಸ್ತಿ ಪ್ರಧಾನ ಮಾಡಿದೆ.
ಕ್ರಾಫರ್ಡ್ ಹಾಲ್ ನಲ್ಲಿ ಈ ಘಟಿಕೋತ್ಸವ ಕಾರ್ಯಕ್ರಮ ಆಯೋಜನೆ ಮಾಡಲಾಗಿತ್ತು. ಈ ವೇಳೆ ಅಶ್ವಿನಿ ಪುನೀತ್ ರಾಜ್‍ಕುಮಾರ್ ಗೆ ಸನ್ಮಾನ ಮಾಡಿ, ಪದವಿ ನೀಡಿದರು. ಅಶ್ವಿನಿ ಅವರ ಜೊತೆಗೆ ರಾಘವೇಂದ್ರ ರಾಜ್‍ಕುಮಾರ್, ಮಂಗಳಾ, ವಿನಯ್ ರಾಜ್‍ಕುಮಾರ್ ಸೇರಿದಂತೆ ಕುಟುಂಬಸ್ಥರು ಭಾಗಿಯಾಗಿದ್ದರು.
ಸದ್ಯ ದೇಶದೆಲ್ಲೆಡೆ ಅಪ್ಪು ಜೇಮ್ಸ್ ಸಿನಿಮಾ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ. ಎಲ್ಲೆಡೆ ಉತ್ತಮ ರೆಸ್ಪಾನ್ಸ್ ಪಡೆಯುವುದರ ಜೊತೆಗೆ, ಅಪ್ಪು ನೆನಪನ್ನ ಹೆಚ್ಚು ಮಾಡಿದೆ.
