ಸಾಲದ ಸುಳಿಯಲ್ಲಿ ಸಿಲುಕಿದ್ದೀರಾ? ಹೊರಬರಲು ಆರ್ಥಿಕ ತಜ್ಞರು ನೀಡಿದ ಪರಿಹಾರಗಳು

ಸುದ್ದಿಒನ್, ಚಿತ್ರದುರ್ಗ, ಆಗಸ್ಟ್. 09 : ತುರ್ತು ಅಗತ್ಯಗಳು, ಬದಲಾಗುತ್ತಿರುವ ಜೀವನಶೈಲಿ ಹಾಗೂ ಆಡಂಬರದ ಹುಚ್ಚು ಹೀಗೆ ಕಾರಣ ಏನೇ ಇರಲಿ, ಇಂದಿನ ಸಾಮಾನ್ಯ ಭಾರತೀಯನು ಸಾಲದ ಬಲೆಯಲ್ಲಿ ತೀವ್ರವಾಗಿ ಸಿಲುಕುತ್ತಿದ್ದಾನೆ. ಈ ಸಾಲದ ಹೊರೆಯನ್ನು ಸಹಿಸಿಕೊಳ್ಳಲಾಗದೆ ಮತ್ತು ಇದರಿಂದ ತಪ್ಪಿಸಿಕೊಳ್ಳಲು ಹಾದಿ ಕಾಣದೆ, ಹಲವರು ತಮ್ಮ ಅಮೂಲ್ಯವಾದ ಜೀವವನ್ನೇ ಕಳೆದುಕೊಳ್ಳುತ್ತಿದ್ದಾರೆ.

ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋ (NCRB) ನೀಡಿದ ವರದಿಗಳ ಪ್ರಕಾರ, ದೇಶದಲ್ಲಿ ಶೇಕಡಾ 5ರಷ್ಟು ಆತ್ಮಹತ್ಯೆಗಳು ನೇರವಾಗಿ ಆರ್ಥಿಕ ಸಮಸ್ಯೆಗಳಿಂದಲೇ ಉಂಟಾಗುತ್ತಿದ್ದರೆ, ಪರೋಕ್ಷವಾಗಿ ಶೇಕಡಾ 15ರಿಂದ 20ರಷ್ಟು ಆತ್ಮಹತ್ಯೆಗಳಿಗೆ ಸಾಲದ ಹೊರೆಯೇ ಮುಖ್ಯ ಕಾರಣವಾಗುತ್ತಿದೆ. ಪ್ರಸ್ತುತ ದೇಶದಲ್ಲಿ ಪ್ರತಿ 75 ನಿಮಿಷಗಳಿಗೊಮ್ಮೆ ಒಬ್ಬ ವ್ಯಕ್ತಿ ಸಾಲದ ಬಿಕ್ಕಟ್ಟಿನಿಂದಾಗಿ ಪ್ರಾಣ ಕಳೆದುಕೊಳ್ಳುತ್ತಿರುವುದು ಅತ್ಯಂತ ಆತಂಕಕಾರಿ ಸಂಗತಿಯಾಗಿದೆ ಎಂದು ಚಿತ್ರದುರ್ಗದ ಆರ್ಥಿಕ ತಜ್ಞರಾದ ಪ್ರೊ. ಈರಣ್ಣ ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.

ಫಿನ್ಟೆಕ್ ಮಾಯಾಜಾಲ : 

ನಮ್ಮ ಸಮಾಜವು ಪ್ರಸ್ತುತ ಅತ್ಯಂತ ವೇಗವಾಗಿ ಸಾಲದ ಆರ್ಥಿಕತೆಯತ್ತ ಸಾಗುತ್ತಿದೆ. ಒಂದು ಕಾಲದಲ್ಲಿ ಸಾಲ ಪಡೆಯಬೇಕೆಂದರೆ ಜನರು ಬ್ಯಾಂಕುಗಳ ಸುತ್ತ ಅಲೆಯಬೇಕಾಗಿತ್ತು. ಆದರೆ ಇಂದು ಫಿನ್ಟೆಕ್ ಆ್ಯಪ್ಗಳು ಕೇವಲ ನಿಮಿಷಗಳಲ್ಲೇ ಸಾಲ ಮಂಜೂರು ಮಾಡುತ್ತವೆ. ಕಳೆದ ಐದು ವರ್ಷಗಳಲ್ಲಿ ಫಿನ್ಟೆಕ್ ಸಾಲಗಾರರ ಸಂಖ್ಯೆಯು 10 ಲಕ್ಷದಿಂದ ಬರೋಬ್ಬರಿ 50 ಲಕ್ಷಕ್ಕೆ ಏರಿಕೆಯಾಗಿದೆ. ಹೆಚ್ಚಿನ ಜನರು ಐಷಾರಾಮಿ ಕಾರುಗಳು, ದುಬಾರಿ ಎಲೆಕ್ಟ್ರಾನಿಕ್ಸ್ ಸಾಧನಗಳು ಮತ್ತು ರಜಾ ದಿನಗಳ ಪ್ರವಾಸಗಳಂತಹ ಜೀವನಶೈಲಿಯ ಖರ್ಚುಗಳಿಗಾಗಿಯೇ ವೈಯಕ್ತಿಕ ಸಾಲ ಮತ್ತು ಕ್ರೆಡಿಟ್ ಕಾರ್ಡ್ಗಳ ಮೊರೆ ಹೋಗುತ್ತಿದ್ದಾರೆ. ನಗರ ಪ್ರದೇಶದ ದುಡಿಯುವ ವರ್ಗದಲ್ಲಿ ಶೇಕಡಾ 45ರಷ್ಟು ಜನರು ತಮ್ಮ ಮಾಸಿಕ ಆದಾಯದ ಶೇಕಡಾ 60ರಿಂದ 70ರಷ್ಟನ್ನು ಕೇವಲ ಸಾಲದ ಕಂತುಗಳಿಗೆ ಅಂದರೆ ಇಎಮ್ಐಗಳಿಗಾಗಿಯೇ ಪಾವತಿಸುತ್ತಿದ್ದಾರೆ.

ಎಚ್ಚರಿಕೆಯ ಸೂಚನೆಗಳನ್ನು ಗುರುತಿಸಿ:
ಆರ್ಥಿಕ ತಜ್ಞರ ಪ್ರಕಾರ ಒಬ್ಬ ವ್ಯಕ್ತಿಯ ಮಾಸಿಕ ಆದಾಯದ ಶೇಕಡಾ 60ಕ್ಕಿಂತ ಹೆಚ್ಚು ಭಾಗ ಸಾಲದ ಕಂತುಗಳಿಗೆ ಹೋಗುತ್ತಿದ್ದರೆ, ಅದು ಗಂಭೀರ ಮಟ್ಟದ ಎಚ್ಚರಿಕೆಯ ಸಂಕೇತವಾಗಿದೆ. ಕಾಲ್ ಸೆಂಟರ್ಗಳ ಬೆದರಿಕೆ ಹಾಗೂ ವಸೂಲಿ ಏಜೆಂಟ್ಗಳ ತೀವ್ರ ಒತ್ತಡದಿಂದಾಗಿ ಕುಟುಂಬದ ನೆಮ್ಮದಿ ಮತ್ತು ಸಂಬಂಧಗಳಿಗೆ ಹಾನಿಯಾಗುತ್ತಿದೆ. ಇದರ ಜೊತೆಗೆ ಜನರು ತೀವ್ರ ರೀತಿಯ ಮಾನಸಿಕ ಯಾತನೆಯನ್ನೂ ಅನುಭವಿಸುತ್ತಿದ್ದಾರೆ.

ಪರಿಹಾರಗಳು ಮತ್ತು ಆರ್ಥಿಕ ಶಿಸ್ತು :
ಆರ್ಥಿಕ ಶಿಸ್ತೊಂದೇ ಈ ಸಮಸ್ಯೆಗೆ ನಿಜವಾದ ರಕ್ಷಣೆಯಾಗಿದೆ. ಜನರು ತಮ್ಮ ಆದಾಯದ ಮಿತಿಯೊಳಗೆ ಖರ್ಚು ಮಾಡುವುದನ್ನು ಕಲಿಯಬೇಕು. ಸಾಮಾಜಿಕ ಪ್ರತಿಷ್ಠೆಗಾಗಿ ಮಾಡುವ ಆಡಂಬರ ಹಾಗೂ ತಮ್ಮ ಸಾಮರ್ಥ್ಯಕ್ಕಿಂತ ಮೀರಿದ ಖರ್ಚುಗಳಿಂದ ಸಂಪೂರ್ಣವಾಗಿ ದೂರವಿರಬೇಕು. ಸಾಲದಲ್ಲಿ ಆಳವಾಗಿ ಸಿಲುಕಿದವರು ಸಾಲ-ಇತ್ಯರ್ಥ ಕಂಪನಿಗಳ ಮೂಲಕ ಸಾಲದಾತರೊಂದಿಗೆ ಸೂಕ್ತ ಮಾತುಕತೆ ನಡೆಸಿ ಅದನ್ನು ಮರುಸಂಘಟಿಸಿಕೊಳ್ಳಬಹುದು. ಜೊತೆಗೆ, ಹೆಚ್ಚಿನ ಬಡ್ಡಿದರ ಹೊಂದಿರುವ ಕ್ರೆಡಿಟ್ ಕಾರ್ಡ್ ಮತ್ತು ವೈಯಕ್ತಿಕ ಸಾಲಗಳನ್ನು ಮೊದಲು ತೀರಿಸಲು ಆದ್ಯತೆಯ ಆಧಾರದ ಮೇಲೆ ಯೋಜನೆ ರೂಪಿಸಬೇಕು.

ನೀವು ಅಥವಾ ನಿಮಗೆ ಪರಿಚಿತರಾದ ಯಾರಾದರೂ ಇಂತಹ ಆರ್ಥಿಕ ಯಾತನೆಯಿಂದ ಬಳಲುತ್ತಿದ್ದರೆ ಸಹಾಯಕ್ಕಾಗಿ ತಕ್ಷಣವೇ 91-9820466726 ಅಥವಾ 9152987821 ಸಂಖ್ಯೆಗಳನ್ನು ಸಂಪರ್ಕಿಸಬಹುದು.