ಸುದ್ದಿಒನ್ ವೆಬ್ ಡೆಸ್ಕ್
ನವದೆಹಲಿ : ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾದ ಸದಸ್ಯರ ವಾಟ್ಸಾಪ್ ಗುಂಪಿನ ಅಡ್ಮಿನ್ ಪಾಕಿಸ್ತಾನದವರಾಗಿದ್ದರು ಎಂದು ಭಯೋತ್ಪಾದನಾ ನಿಗ್ರಹ ದಳ ಅಥವಾ ಎಟಿಎಸ್ (Anti-Terror Squad, or ATS) ಅಧಿಕಾರಿಗಳು ತಿಳಿಸಿದ್ದಾರೆ.
ಭಾರತದಲ್ಲಿ ಕಾನೂನು ಸುವ್ಯವಸ್ಥೆಗೆ ಸಂಬಂಧಿಸಿದಂತೆ ಸಮಸ್ಯೆಗಳನ್ನು ಸೃಷ್ಟಿಸಲು ಮತ್ತು ದೇಶವಿರೋಧಿ ಚಟುವಟಿಕೆಗಳಲ್ಲಿ ತೊಡಗಿದ್ದಾರೆಂಬ ಆರೋಪದ ಮೇಲೆ ಅವರನ್ನು ಬಂಧಿಸಲಾಯಿತು.
ಈ ವಾಟ್ಸಾಪ್ ಗುಂಪಿನಲ್ಲಿ ಅಫ್ಘಾನಿಸ್ತಾನ ಮತ್ತು ಯುಎಇಯ ಸದಸ್ಯರಿದ್ದರು ಮತ್ತು ಗುಂಪಿನಲ್ಲಿ ಒಟ್ಟು 175 ಕ್ಕೂ ಹೆಚ್ಚು ಸದಸ್ಯರಿದ್ದರು. ಅನೇಕ ಸದಸ್ಯರು ವಿದೇಶಗಳಿಗೆ ತೆರಳಿದ್ದಾರೆ. ಮತ್ತು ವಿದೇಶದಿಂದ ಅನೇಕ ವಹಿವಾಟುಗಳನ್ನು ಮಾಡಿದ್ದಾರೆ, ಅವುಗಳು ಪ್ರಸ್ತುತ ತನಿಖೆಯಲ್ಲಿವೆ.
ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ), ಮಹಾರಾಷ್ಟ್ರ ಎಟಿಎಸ್ ಮತ್ತು ಜಾರಿ ನಿರ್ದೇಶನಾಲಯ (ಇಡಿ)ಜಂಟಿಯಾಗಿ ಈ ಗುಂಪಿನ ಮೇಲೆ ರಾಷ್ಟ್ರವ್ಯಾಪಿ ಕಾರ್ಯಾಚರಣೆ ನಡೆಸಿದಾಗ, ಭಯೋತ್ಪಾದನೆಗೆ ಧನಸಹಾಯ ನೀಡಿದ ಆರೋಪದ ಮೇಲೆ ಕೇಂದ್ರವು ಇತ್ತೀಚೆಗೆ ನಿಷೇಧಿಸಿರುವ ಪಿಎಫ್‌ಐನ ಐವರು ಸದಸ್ಯರನ್ನು ಸೆಪ್ಟೆಂಬರ್ 22 ರಂದು ಬಂಧಿಸಿದ್ದರು.
ಐವರನ್ನು ಮಾಲೆಗಾಂವ್, ಕೊಲ್ಹಾಪುರ, ಬೀಡ್ ಮತ್ತು ಪುಣೆಯಿಂದ ಮಹಾರಾಷ್ಟ್ರ ಎಟಿಎಸ್ ಬಂಧಿಸಿದೆ. ತನಿಖೆಗಾಗಿ ಅವರ ಮೊಬೈಲ್ ಫೋನ್‌ಗಳು, ಕಂಪ್ಯೂಟರ್‌ಗಳ ಹಾರ್ಡ್ ಡಿಸ್ಕ್, ಲ್ಯಾಪ್‌ಟಾಪ್‌ಗಳು ಮತ್ತು ಅವರ ಬ್ಯಾಂಕ್ ದಾಖಲೆಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ ಮತ್ತು ಅವರ ಬ್ಯಾಂಕ್ ಖಾತೆಗಳಲ್ಲಿ ಅನುಮಾನಾಸ್ಪದ ವಹಿವಾಟುಗಳು ನಡೆದಿರುವುದು ಕಂಡುಬಂದಿದೆ. ಸದಸ್ಯರು ನಿಷೇಧಿತ ಸಂಘಟನೆಯಾದ ಸಿಮಿ ಮಾದರಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ ಎನ್ನಲಾಗಿದೆ.
ಏತನ್ಮಧ್ಯೆ, ಆರೋಪಿಗಳ ಪೈಕಿ ಒಬ್ಬ ಐಟಿ ಇಂಜಿನಿಯರ್ ಆಗಿದ್ದು, ಆತ ಕೆಲಸದ ನಿಮಿತ್ತ ವಿದೇಶಕ್ಕೆ ತೆರಳಿದ್ದರೆ ಮತ್ತೊಬ್ಬ ಮೌಲಾನಾ ತೀರ್ಥಯಾತ್ರೆಗೆ ತೆರಳಿದ್ದ ಎಂದು ಆರೋಪಿ ಪರ ವಕೀಲರು ನ್ಯಾಯಾಲಯಕ್ಕೆ ತಿಳಿಸಿದರು.
ಬಂಧಿತ ಆರೋಪಿಗಳನ್ನು ಮಾಲೆಗಾಂವ್‌ನ ಮೌಲಾನಾ ಸೈಫುರ್ರೆಹಮಾನ್ ಸಯೀದ್ ಅಹ್ಮದ್ ಅನ್ಸಾರಿ (26), ಅಬ್ದುಲ್ ಖಯೂಮ್ ಬದುಲ್ಲಾ ಶೇಖ್ (48) ಮತ್ತು ಪುಣೆಯ ರಾಜಿ ಅಹ್ಮದ್ ಖಾನ್ (31), ಬೀಡ್‌ನ ವಾಸಿಂ ಅಜೀಂ ಅಲಿಯಾಸ್ ಮುನ್ನಾ ಶೇಖ್ (29) ಮತ್ತು ಮೌಲಾ ನಸೀಸಾಬ್ ಎಂದು ಗುರುತಿಸಲಾಗಿದೆ.
