ತಿರುಪತಿಯಿಂದ ಹಿಂದಿರುಗಿದ್ದೆ ಪವಾಡ : ನಟಿ ತಾರಾ ಅನುಭವ

ಬೆಂಗಳೂರು: ಬೆಂಬಿಡದೆ ಸುರಿಯುತ್ತಿರುವ ಮಳೆಗೆ ಜನ ತತ್ತರಿಸಿ ಹೋಗಿದ್ದಾರೆ. ಕೆಲವೆಡೆ ಮನೆಗಳು ಉರುಳಿದ್ರೆ, ಇನ್ನು ಕೆಲವು ಕಡೆ ರಸ್ತೆಗಳು ಜಲಾವೃತಗೊಂಡಿವೆ, ವಸ್ತುಗಳು, ವಾಹನಗಳು ಕೊಂಚಿಕೊಂಡು ಹೋಗಿವೆ. ತಿರುಪತಿಯಲ್ಲಂತು ಮಳೆ ಸೃಷ್ಟಿಸಿರುವ ಅವಾಂತರ ಅಷ್ಟಿಷ್ಟಲ್ಲ.

ರಸ್ತೆ ತುಂಬೆಲ್ಲಾ ನೀರು ಹರಿಯುತ್ತಿದೆ. ಜನ ಒಂದು ಕಡೆಯಿಂದ ಮತ್ತೊಂದು ಕಡೆ ಹೋಗಲು ಆಗದ ಸ್ಥಿತಿ ನಿರ್ಮಾಣವಾಗಿದೆ. ತಿರುಪತಿಯಿಂದ ನಿನ್ನೆ ಮಧ್ಯರಾತ್ರಿ ಬೆಂಗಳೂರು ತಲುಪಿದ ನಟಿ ತಾರಾ ಅವರ ಅನುಭವದ ಮಾತು ಎದೆ ಝಲ್ ಎನಿಸುತ್ತಿದೆ.

ನಟಿ ತಾರಾ ಅನುರಾಧ ಇತ್ತೀಚೆಗಷ್ಟೇ ತಿರುಪತಿ ತಿಮ್ಮಪ್ಪನ ದರ್ಶನಕ್ಕೆಂದು ಹೋಗಿದ್ದರು. ಅಲ್ಲಿರುವ ಪರಿಚಯಸ್ಥರೊಬ್ಬರನ್ನ ಕಾಂಟ್ಯಾಕ್ಟ್ ಮಾಡಿ ದೇವಸ್ಥಾನಕ್ಕೆ ಹೋದೆವು. ಆದ್ರೆ ನಾವೂ ಅಲ್ಲಿಗೆ ಹೋದ ಮೇಲೆ ಮಳೆ ಜೋರಾಯಿತು. ರಸ್ತೆಯಲ್ಲೆಲ್ಲಾ ನೀರು ಮೊಣಕಾಲುದ್ದ ನಿಂತಿತ್ತು.

ದೇವರ ದರ್ಶನ ಮಾಡಲೆಂದೆ ಹೋಗಿದ್ದೆವು. ಆದ್ರೆ ಅಲ್ಲಿ ಸುರಿಯುತ್ತಿದ್ದ ಮಳೆಯಿಂದ ಬೆಟ್ಟಕ್ಕೆ ಹೋಗಲು ಸಾಧ್ಯವಾಗಲೇ ಇಲ್ಲ. ಕಡೆಗೂ ರಾತ್ರಿಯೆ ಬೆಂಗಳೂರಿಗೆ ವಾಪಾಸ್ಸಾದೆವು. ಬರುವಾಗ ರಸ್ತೆಯಲ್ಲೆಲ್ಲಾ ನೀರು ತುಂಬಿದ್ದನ್ನ ನೋಡಿ ಭಯ ಆಯ್ತು. ಎದುರುಗಡೆ ಹೋಗುತ್ತಿದ್ದ ವಾಹನಗಳು ಕಾಣ್ತಾ ಇರ್ಲಿಲ್ಲ. ತಿರುಪತಿ ತಿಮ್ಮಪ್ಪನೇ ನಮ್ಮನ್ನ ಹುಷಾರಾಗಿ ಕಳುಹಿಸಿದ ಅನ್ಸುತ್ತೆ. ಮಧ್ಯರಾತ್ರಿ ಸೇಫ್ ಆಗಿ ಮನೆ ಸೇರಿದೆವು ಎಂದು ತಮ್ಮ ಅನುಭವ ಹೇಳಿಕೊಂಡಿದ್ದಾರೆ.