3 ಎಕರೆ ಜಮೀನಿನಲ್ಲಿ ಬಪ್ಪಾಯಿ ಬೆಳೆದು ವರ್ಷಕ್ಕೆ 12 ಲಕ್ಷ ಗಳಿಸುತ್ತಿರುವ ಪ್ರಗತಿಪರ ರೈತ!

ಸುದ್ದಿಒನ್,ಮೇ.26: ಇತ್ತೀಚಿನ ದಿನಗಳಲ್ಲಿ ಕೃಷಿಯಲ್ಲಿ ಲಾಭವಿಲ್ಲ ಎಂದು ಹಳ್ಳಿಗಳನ್ನು ಬಿಟ್ಟು ನಗರಗಳತ್ತ ಮುಖ ಮಾಡುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ಆದರೆ ರಾಜಸ್ಥಾನದ ಈ ರೈತ ಮಾತ್ರ ಎಲ್ಲರಿಗಿಂತ ಭಿನ್ನವಾಗಿ ಯೋಚಿಸಿ, ಹುಟ್ಟೂರಿನಲ್ಲೇ ಇದ್ದು ಕೃಷಿ ಕ್ಷೇತ್ರದಲ್ಲಿ ಹೊಸ ಕ್ರಾಂತಿ ಸೃಷ್ಟಿಸಿದ್ದಾರೆ. ತೀವ್ರ ನೀರಿನ ಅಭಾವವಿರುವ ಪ್ರದೇಶದಲ್ಲೂ ಆಧುನಿಕ ತಂತ್ರಜ್ಞಾನ ಹಾಗೂ ಕಠಿಣ ಪರಿಶ್ರಮದಿಂದ ಭರ್ಜರಿ ಯಶಸ್ಸು ಸಾಧಿಸಿರುವ ಈತನ ಯಶೋಗಾಥೆ ಪ್ರತಿಯೊಬ್ಬರನ್ನೂ ಮೂಗಿನ ಮೇಲೆ ಬೆರಳಿಡುವಂತೆ ಮಾಡುತ್ತದೆ. ಹೌದು, ಈ ರೈತ ಕೇವಲ 3 ಎಕರೆ ಭೂಮಿಯಿಂದ ವರ್ಷಕ್ಕೆ ಬರೋಬ್ಬರಿ 12 ಲಕ್ಷ ರೂಪಾಯಿಗೂ ಅಧಿಕ ಆದಾಯ ಗಳಿಸುತ್ತಿದ್ದಾರೆ!

ಯಾರೀ ಪ್ರಗತಿಪರ ರೈತ?
ರಾಜಸ್ಥಾನ ರಾಜ್ಯದ ಪಾಲಿ ಜಿಲ್ಲೆಯ ಪಲಾಸರ ಗ್ರಾಮದ ನಿವಾಸಿಯಾದ 42 ವರ್ಷದ ಮಹೇಶ್ ಶರ್ಮ ಅವರೇ ಈ ಸಾಧಕ ರೈತ. ಕೇವಲ 12ನೇ ತರಗತಿವರೆಗೆ ಮಾತ್ರ ಓದಿರುವ ಇವರಿಗೆ ನಗರಗಳಿಗೆ ಹೋಗಿ ಸಾಧಾರಣ ನೌಕರಿ ಮಾಡುವುದು ಇಷ್ಟವಿರಲಿಲ್ಲ. ಹಾಗಾಗಿ ಸ್ವಂತ ಊರಿನಲ್ಲೇ ಕೃಷಿ ಮಾಡಲು ನಿರ್ಧರಿಸಿದರು. ಇಂದು ಇವರ ಆದಾಯ ಯಾವುದೇ ದೊಡ್ಡ ಉದ್ಯಮಿ ಅಥವಾ ಉನ್ನತ ಸರ್ಕಾರಿ ಅಧಿಕಾರಿಯ ಗಳಿಕೆಗಿಂತ ಕಡಿಮೆಯಿಲ್ಲ.

ಕೃಷಿ ಪದ್ಧತಿ ಮತ್ತು ವೈವಿಧ್ಯತೆ:

ಮಹೇಶ್ ಶರ್ಮ ಅವರು ತಮ್ಮ 3 ಎಕರೆ ಜಮೀನಿನಲ್ಲಿ ಪ್ರಮುಖವಾಗಿ ಬಪ್ಪಾಯಿ (ಪರಂಗಿ ಹಣ್ಣು) ಬೆಳೆಯನ್ನು ದೊಡ್ಡ ಪ್ರಮಾಣದಲ್ಲಿ ಬೆಳೆಯುತ್ತಿದ್ದಾರೆ. ಇವರ ತೋಟದಲ್ಲಿ 600ಕ್ಕೂ ಹೆಚ್ಚು ಬಪ್ಪಾಯಿ ಗಿಡಗಳಿವೆ. ಇದರೊಂದಿಗೆ ಜಮೀನಿನ ಸುತ್ತಲೂ ಡ್ರ್ಯಾಗನ್ ಫ್ರೂಟ್, ಪೇರಲ (ಸೀಬೆಹಣ್ಣು) ಮತ್ತು ದಾಳಿಂಬೆ ಗಿಡಗಳನ್ನು ಸಹ ನೆಟ್ಟಿದ್ದಾರೆ. ಈ ಹಣ್ಣುಗಳ ಕೃಷಿಯಿಂದಲೇ ಇವರು ತಿಂಗಳಿಗೆ ಸುಮಾರು 1.25 ಲಕ್ಷ ರೂ. ಹಾಗೂ ವರ್ಷಕ್ಕೆ 12 ಲಕ್ಷಕ್ಕೂ ಹೆಚ್ಚು ಲಾಭ ಗಳಿಸುತ್ತಿದ್ದಾರೆ. ಇವರು ಬೆಳೆಯುವ ಬಪ್ಪಾಯಿ ಹಣ್ಣಿಗೆ ಬೇರೆ ರಾಜ್ಯಗಳಲ್ಲೂ ಭಾರಿ ಬೇಡಿಕೆಯಿದೆ.

ಯಶಸ್ಸಿನ ರಹಸ್ಯವೇನು?

ಸಾವಯವ ಕೃಷಿ: ಮಹೇಶ್ ಶರ್ಮ ಅವರು ತಮ್ಮ ತೋಟದಲ್ಲಿ ಯಾವುದೇ ರಾಸಾಯನಿಕ ಗೊಬ್ಬರಗಳನ್ನು ಬಳಸುವುದಿಲ್ಲ. ಸಂಪೂರ್ಣವಾಗಿ ಸಾವಯವ (Organic) ಪದ್ಧತಿಯಲ್ಲಿ ಕೃಷಿ ಮಾಡುತ್ತಿದ್ದು, ಗಿಡಗಳನ್ನು ಸ್ವತಃ ತಾವೇ ಆರೈಕೆ ಮಾಡುತ್ತಾರೆ.

ಹನಿ ನೀರಾವರಿ (Drip Irrigation): ರಾಜಸ್ಥಾನದಲ್ಲಿ ನೀರಿನ ಅಭಾವ ಹೆಚ್ಚಾಗಿರುವುದರಿಂದ, ಪ್ರತಿಯೊಂದು ನೀರಿನ ಹನಿಯನ್ನೂ ಸದ್ಬಳಕೆ ಮಾಡಿಕೊಳ್ಳಲು ಇವರು ಹನಿ ನೀರಾವರಿ ಪದ್ಧತಿಯನ್ನು ಅಳವಡಿಸಿಕೊಂಡಿದ್ದಾರೆ.

ಪರ್ವತ ದಾಟಿ ಬಂದ ನೀರು: ತೋಟಕ್ಕೆ ನೀರು ಒದಗಿಸಲು ಇವರು ಪಟ್ಟ ಶ್ರಮ ಸಾಮಾನ್ಯದ್ದಲ್ಲ. ತಮ್ಮ ಜಮೀನಿಗೆ ನೀರು ತರಲು ಸಾವಿರಾರು ಅಡಿ ಎತ್ತರದ ಪರ್ವತದ ಆಚೆ ಕಡೆಯಿಂದ ಸ್ವಂತ ಖರ್ಚಿನಲ್ಲಿ ಪೈಪ್ಲೈನ್ ಅಳವಡಿಸಿದ್ದಾರೆ. ಇದಕ್ಕಾಗಿ ಸುಮಾರು 140 ಕಬ್ಬಿಣದ ಮತ್ತು ಪ್ಲಾಸ್ಟಿಕ್ ಪೈಪ್ಗಳನ್ನು ಬಳಸಿ ನೀರನ್ನು ಜಮೀನಿಗೆ ತಂದಿದ್ದಾರೆ. ಅಲ್ಲಿಂದ ಹನಿ ನೀರಾವರಿ ಮೂಲಕ ಗಿಡಗಳಿಗೆ ಹರಿಸುತ್ತಾರೆ.

ನೇರ ಮಾರುಕಟ್ಟೆ (Direct Marketing):
ಸಾಮಾನ್ಯವಾಗಿ ರೈತರು ಮಧ್ಯವರ್ತಿಗಳ ಕಾಟದಿಂದ ನಷ್ಟ ಅನುಭವಿಸುತ್ತಾರೆ. ಆದರೆ ಮಹೇಶ್ ಶರ್ಮ ಅವರು ವಿಭಿನ್ನ ಹಾದಿ ಹಿಡಿದರು. ಇವರು ಹಣ್ಣುಗಳನ್ನು ಯಾವುದೇ ಮಾರುಕಟ್ಟೆಗೆ ಅಥವಾ ದಲ್ಲಾಳಿಗಳಿಗೆ ನೀಡದೆ, ನೇರವಾಗಿ ಟ್ರ್ಯಾಕ್ಟರ್ ಟ್ರಾಲಿಯಲ್ಲಿ ತುಂಬಿಕೊಂಡು ಹೋಗಿ ಗ್ರಾಹಕರಿಗೆ ಮಾರಾಟ ಮಾಡುತ್ತಾರೆ.

ಮಧ್ಯವರ್ತಿಗಳಿಲ್ಲದ ಕಾರಣ ಇವರ ಹಣ್ಣುಗಳ ಬೆಲೆ ಮಾರುಕಟ್ಟೆಯ ಇತರ ಅಂಗಡಿಗಳಿಗಿಂತ ಕಡಿಮೆ ಇರುತ್ತದೆ ಮತ್ತು ಹಣ್ಣುಗಳು ಫ್ರೆಶ್ ಆಗಿರುತ್ತವೆ. ಹಾಗಾಗಿ ಇವರು ಸ್ಟಾಲ್ ಹಾಕಿದ ಕೇವಲ 2 ಗಂಟೆಗಳಲ್ಲೇ ಹಣ್ಣುಗಳಿಂದ ತುಂಬಿದ ಟ್ರ್ಯಾಕ್ಟರ್ ಟ್ರಾಲೀ ಪೂರ್ತಿ ಖಾಲಿಯಾಗುತ್ತದೆ ಎಂದು ಮಹೇಶ್ ಶರ್ಮ ಹೆಮ್ಮೆಯಿಂದ ಹೇಳುತ್ತಾರೆ.

ಸರಿಯಾದ ಯೋಜನೆ, ಕಠಿಣ ಪರಿಶ್ರಮ ಮತ್ತು ಮಾರುಕಟ್ಟೆಯ ಜ್ಞಾನವಿದ್ದರೆ ಕೃಷಿಯಲ್ಲೂ ಕೋಟಿ ಕವರಬಹುದು ಎಂಬುದಕ್ಕೆ ಮಹೇಶ್ ಶರ್ಮ ಅವರೇ ಲಿವಿಂಗ್ ಎಕ್ಸಾಂಪಲ್!