ಬೆಂಗಳೂರು: ಹಿರಿಯ ನಟ ಲಕ್ಷ್ಮಣ್ ಇಂದು ಹೃದಯಾಘಾತದಿಂದ ನಿಧನರಾಗಿದ್ದಾರೆ. ಲಕ್ಷ್ಮಣ್ ಅವರು ಸುಮಾರು 300ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ, ವಿಲನ್ ಆಗಿ ಅಬ್ಬರಿಸಿದ್ದಾರೆ. ಯಜಮಾನ, ಮಲ್ಲ, ಸೂರ್ಯವಂಶ ಸೇರಿದಂತೆ ದಿಗ್ಗಜರ ಜೊತೆ ನಟಿಸಿದ್ದಾರೆ. ಆದ್ರೆ ನಟನೆಗೆ ಬರುವುದಕ್ಕೂ ಮುನ್ನ ಸೈನ್ಯಕ್ಕೆ ಸೇರಬೇಕಾಗಿತ್ತಂತೆ.
ನಟ ಲಕ್ಷ್ಮಣ್ ಅವರಿಗೂ ಸೈನ್ಯ ಸೇರುವುದಕ್ಕೆ ಬಹಳಷ್ಟು ಆಸೆ ಇತ್ತಂತೆ. ಅವರ ಇಡೀ ಫ್ಯಾಮಿಲಿ ಸೈನ್ಯದಲ್ಲಿಯೇ ಇದೆ. ಲಕ್ಷ್ಮಣ್ ಅವರ ತಂದೆ ಸೈನ್ಯದಲ್ಲಿದ್ದರು. ಅದರಿಂದ ಸ್ಪೂರ್ತಿಗೊಂಡ ಲಕ್ಷ್ಮಣ್ ಅವರು ಕೂಡ ಸೈನ್ಯಕ್ಕೆ ಸೇರಬೇಕೆಂದುಕೊಂಡಿದ್ದರು. ಆಯ್ಕೆ ಕೂಡ ಆಯ್ತು. ಆದರೆ ಅಮ್ಮ ಬೇಡ ಎಂದ ಕಾರಣಕ್ಕೆ ಸೈನ್ಯಕ್ಕೆ ಸೇರುವ ಬಯಕೆ ಕಮರಿ ಹೋಗಿತ್ತು. ನಂತರ ಸಿನಿಮಾ ಕ್ಷೇತ್ರದಲ್ಲಿ ಮುಂದುವರೆದರು.
ಆದರೆ ತಮ್ಮ ಮಕ್ಕಳ ಮೂಲಕ ಆಸೆ ಪೂರೈಸಿಕೊಂಡಿದ್ದಾರೆ. ಅವರ ಪುತ್ರ ಭರತ ನೌಕಾಪಡೆಯಲ್ಲಿದ್ದಾರೆ. ಪುತ್ರಿ ಅವರನ್ನು ಆರ್ಮಿಯಲ್ಲಿ ಸೇವೆ ಮಾಡುತ್ತಿರುವವರಿಗೆ ಮದುವೆ ಮಾಡಿಕೊಟ್ಟಿದ್ದಾರೆ. ಹೀಗೆ ಇಡೀ ಕುಟುಂಬ ದೇಶ ಸೇವೆಗೆ ಮುಡಿಪಾಗಿಟ್ಟಿದ್ದಾರೆ.
