ದಾವಣಗೆರೆ: ಮಧ್ಯ ಕರ್ನಾಟಕದ ಬಹುದೊಡ್ಡ ಕನಸಾಗಿರುವ ದಾವಣಗೆರೆ-ತುಮಕೂರು ನೇರ ರೈಲ್ವೆ ಯೋಜನೆಯು ಅಂತಿಮ ಹಂತಕ್ಕೆ ತಲುಪಿದ್ದು, ಈ ಮಾರ್ಗದ ಪ್ರಾಯೋಗಿಕ ಸಂಚಾರ ಯಶಸ್ವಿಯಾಗಿದೆ. ಹೆಬ್ಬಾಳು ಮತ್ತು ತೋಳಹುಣಸೆ ನಿಲ್ದಾಣಗಳ ನಡುವೆ ನೂತನ ಹಳಿಯ ಮೇಲೆ ನಡೆಸಲಾದ ಸ್ಪೀಡ್ ಟ್ರಯಲ್ನಲ್ಲಿ ರೈಲು ಗಂಟೆಗೆ 125 ರಿಂದ 130 ಕ್ಕೂ ಹೆಚ್ಚು ಕಿಲೋಮೀಟರ್ ವೇಗದಲ್ಲಿ ಸಾಗುವ ಮೂಲಕ ಎಲ್ಲ ಪರೀಕ್ಷೆಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ.
ಯಾವುದೇ ತಾಂತ್ರಿಕ ಅಡೆತಡೆಗಳಿಲ್ಲದೆ ಪರೀಕ್ಷೆ ಮುಗಿದಿರುವುದರಿಂದ ಶೀಘ್ರದಲ್ಲೇ ಈ ಮಾರ್ಗಕ್ಕೆ ಗ್ರೀನ್ ಸಿಗ್ನಲ್ ದೊರೆಯುವ ನಿರೀಕ್ಷೆಯಿದೆ. ಈ ಯೋಜನೆ ಸಂಪೂರ್ಣ ಕಾರ್ಯಾರಂಭ ಮಾಡಿದರೆ ದಾವಣಗೆರೆಯಿಂದ ಬೆಂಗಳೂರಿಗೆ ಕೇವಲ ಎರಡೂವರೆ ತಾಸಿನಲ್ಲಿ ತಲುಪಬಹುದಾಗಿದೆ.
ಈ ಹೊಸ ಮಾರ್ಗದಲ್ಲಿ ದೊಡ್ಡ ಸೇತುವೆಗಳು, ಸುರಂಗಗಳು, ನದಿಗಳು ಅಥವಾ ಕಡಿದಾದ ತಿರುವುಗಳು ಇಲ್ಲದಿರುವುದು ರೈಲುಗಳು ಪೂರ್ಣ ವೇಗದಲ್ಲಿ ಚಲಿಸಲು ಪೂರಕವಾಗಿದೆ. ನಿಯಮಿತ ಸಂಚಾರಕ್ಕೆ ಗಂಟೆಗೆ 110 ರಿಂದ 120 ಕಿಮೀ ವೇಗದ ಮಿತಿಗೆ ಅನುಮೋದನೆ ದೊರೆಯುವ ಸಾಧ್ಯತೆಯಿದೆ.
ಸದ್ಯ ಬೆಂಗಳೂರು ತಲುಪಲು ಅರಸೀಕೆರೆ, ತಿಪಟೂರು ಸುತ್ತು ಬಳಸಿ ಹೋಗಬೇಕಾಗಿದ್ದು, ಐದರಿಂದ ಆರು ಗಂಟೆ ಹಿಡಿಯುತ್ತಿದೆ. ನೇರ ಮಾರ್ಗ ಆರಂಭವಾದರೆ ವಂದೇ ಭಾರತ್ ರೈಲು 2.30 ಗಂಟೆಗಳಲ್ಲಿ ಹಾಗೂ ಸಾಮಾನ್ಯ ಎಕ್ಸ್ಪ್ರೆಸ್ ರೈಲುಗಳು ಸುಮಾರು 3.30 ಗಂಟೆಗಳಲ್ಲಿ ರಾಜಧಾನಿಯನ್ನು ತಲುಪಲಿವೆ. ಇದರಿಂದ ಪ್ರಯಾಣಿಕರಿಗೆ ಕನಿಷ್ಠ ಎರಡೂವರೆಯಿಂದ ಮೂರು ಗಂಟೆಗಳ ಅಮೂಲ್ಯ ಸಮಯ ಉಳಿತಾಯವಾಗಲಿದೆ ಎನ್ನಲಾಗಿದೆ.
